O le afioga ia Leausa Samau Toleafoa Tupai Dr Take Naseri sa avea ma pule sili o le Matagaluega o le Soifua Maloloina mo le valu tausaga.
Faasalalauga Tāua
O le taeao o le Aso Faraile sa maitauina ai se aso o loimata o le faanoanoa e pei ona molimauina ai le masii mai o itu uma o le matagaluega, e le gata i sui mai falemai faaitumalo uma o Upolu ma Savaii, ae faapea foi ma sui taitasi o vaega eseese o le matagaluega (divisions).
E toatele nisi sa molimau i le latou mafutaga ma Ofisa Sili, ma faasoa mai ai, o Leausa o se taitai na ia tautaia le Matagaluega ma le faamaoni.
Sa ia lē tuua lava ni talosaga e tuuina atu mo le faaleleia o le auaunaga. O se taitai foi e lē siia lona leo i le au faigaluega, ae tū malosi e lagolago soo se tasi o i latou.
Faasalalauga Tāua
I tulaga o mea’alofa ma ai’avā e silia ma le 100 ie solosolo, o ofutino, ula eseese faapea ma mea’alofa afiafi.
O ata ua ma’ea ona faavaaina, o moli saina, koko Samoa, o falalilii ma le tele o nisi mea’alofa eseese.
Na tuu faatasi soifua maloloina i Salafai ma latou faatino ai nisi o faa’aloaloga e pei o le faatamalii mo le Taitai o le Sauniga, o le Minisita o Soifua Maloloina faapea Leausa Dr Naseri.
Sa latou faamealofa atu foi mo Leausa, ae teutusi e $5,000 tala faapea palapala malo, faapea se manu papalagi, o le alala fa, aemaise o le 10 pusa pisupo, ma le 20 size 2 ua maea ona faamamaina, sei tulou.
Ae o Upolu lava ia, na latou tau’aaoina se seleni e $10,000 tala, e fai meaalofa ai.
Sa momoli foi se meaalofa mai le Sosaiete o Tausi Soifua a Samoa, e $3.000 tala.
Sa saunoa Leausa, “Ou te faafetaia le aufaigaluega atoa i lo outou sao tāua mai lava i sui ofisa sili seia oo mai lava i leoleo po, ave taavale faapea i latou o loo faamamaina fanua..
“Faafetai mo lo outou sao, o le upu moni, ana le senoa lo outou tiute e le a’e ma le manuia tatou faiva..
“Ua iloa a’u ona o lo outou sao, ua iloa foi a’u ona o lo outou tiute sa faatino, faafetai faafetai faafeta tele lava..
“O le tuualalo, o ai lava o le a filifilia na te tauaveina le Matagaluega, ia ave iai lo outou lagolago, ia sili atu se mea lelei tou te faia iai nai lo le lelei sa outou faia ia te au.”
Na faaiu le saunoaga a Leausa e faapea, “Ou te faatoese atu foi i se faaiuga sa ou faia, aemaise foi o gaigoiga ao se faamatalaga sa ou faa’aogaina.. faamagalo mai.”
Faasalalauga Taua
O molimau o le aso i le soifuaga tautua ma le avea ai o le afioga ia Leausa ma taitai, na fofogaina lea e taitai o falemai faaitumalo taitasi:
1. Mulipola Avei (Health Center)
2. Talalelei Tapua’i ( Lalomanu Hospital)
3. Nila Lene (Lufilufi Hospital)
4. James Belford (Poutasi Hospital )
5. Pisimaka Papalii (Leulumoega Tuai)
6. Pili Solia Alatimu (Sa fai ma Sui o Salafai atoa)
7. Henry Taylor
8. Solofua Tafa sa fai ma sui o nisi o auaunaga lautele i totonu o le atunuu.
9. Fuimaono Aleki (auaunaga tau fomai tipitipi).
O i latou ia sa faaleoina le lagona misia ai o Leausa. O le latou molimau e tele nisi o atinae eseese e latou te talosaga mo le faaitnoga o le auaunaga, peitai sa tali atu lava Leausa, e pei o le finau i talosaga ma auala e maua mai ai fesoasoani e pei o taavale mo falemai faaitumalo, o mea faigaluega mo falemai e faatino ai le auaunaga, ma nisi o masini e faafaigofie ai galuega a alii ma tamaitai fomai.
Sa ia sailia foi auala e faatino ai aoaoga e siitia ai le tomai o le aufaigaluega, aemaise o le apoapoai ma fautua ma tuu avanoa i taimi e sasi ai le auaunaga.
O lagona ia e faagalo gatā ai le mafutaga e pei ona tā’ua e nisi.
O le tofa ia Leausa, ua ia faailoa mai, o le’a agai atu e tautua lona atunuu e ala i le faatuina lea o sana private clinic e faaauau ai le auaunaga mo Samoa.”
