E toatolu nisi o tofiga fou mo le Malo o Samoa i Aotearoa Niu Sila ua faamautu mai e le Kapeneta.
I le uluai feiloaiga o lenei tausaga a le tamaitai palemia le afioga Fiame Naomi Mataafa ma ofisa faasalalau, na saunoa ai le tamaitai palemia i nisi o tofiga ua ma’ea faamaonia le Kapeneta.
Konesula Ueligitone – High Commissioner of Samoa Wellington
O le afioga Afamasaga Toleafoa Faamatala, ua filifilia nei e avea ma Konesula o Samoa i Ueligitone.
Na saunoa le afioga i le Palemia, o Afamasaga e le tau faailoaina lona silafia i galuega faa-konesula. Sa avea o ia ma konesula aoao o Samoa i Aukilani i le 1984, ae sa galue foi o se konesula i Pelesiuma (Belgium) i le 1989 agai le 1997.
O Afamasaga sa ia galue o se sui o le Komiti Faufautua i Totogi o le Malo (Remuneration Tribunal) mo le silia ma le 20 tausaga. Sa fai foi o ia ma Peresetene o le Faalapotopotoga Tumaoti o Faifaatoaga (Samoa Farmers Association) ma avea ai o ia o se Taitaifono i le Pasefika (Pacific Islands Farmer Organizations Network PIFON).
Konesula Aoao Aukilani – Cosular General Auckland
O lē sa avea ma taitai o le vaega faaupufai o le Tautua, le afioga ia Afemata Palusalue Faapo ll ua filifilia nei e avea ma Konesula Aoao mo Samoa i Aukilani.
O le afioga ia Afemata, sa avea o se Minisita i le faigamalo a le HRPP – Minisita o Felauaiga (Transport) faapea foi ma le Minisita o Fesootaiga (MCIT). E 20 tausaga o avea o ia ma sui faipule o Safata (1996 – 2016).
Sa tauva o ia i le faigapalota o le 2021 i lalo o le fua a le Faatuatua i Le Atua Samoa ua Tasi (FAST). Peitai sa malolo i le sui o le HRPP, afioga ia Lea’anā Ronnie Posini. Sa toe ave i tua le tagi a Afemata sa tuuaia ai ni faiga faaalatua i le taimi o le palota.
O Setema 2020 ao tapena le faigapalota tele o le 2021, sa manunalo ai i se faamasinoga le afioga ia Afemata Palusalue Faapo II ma Papalii Panoa Tavita Moala, ina ua la lui’ina ai le Tulafono o Faigapalota (Electoral Act).
Konesula Aoao o Fefaatauaiga – Trade Commissioner
O le afioga ia Vatu’itu’i Apete Mederith, ua filifilia nei i le tofiga o le Konesula Aoao o Fefaatauaiga. O Vatu’itu’i sa ia umia muamua foi lenei tofiga, ma ua saunoa Fiame, “O se tofiga tāua tele, e unaia ai le itu o fefaatauaiga mo tatou oloa e auina atu i fafo.”
O Vatu’itu’i sa avea o ia ma Taitaifono o le Komiti Faafoe a le Pulega o Malae Vaalele (Samoa Airport Authority). Sa avea foi o ia ma Peresetene o le Faalapotopotoga Tumaoti o Pisinisi i Samoa (Samoa Chamber of Commerce) ma o ia sa vaaia le faletalimalo o le Aga Beach Resort.
(1)
