Ua tuuina atu nei i luma o le faamasinoga maualuga se talosaga a le Ofisa o Faigapalota (OEC) mo le faamautuina mai o se aso e faatino ai le faigapalota tele a le atunuu, talu ai le faataapeina o le Palemene ina ua lē pasia le Tala Faatatau o le Tupe 2025-2026.
O le taeao nei, Aso Toanai 31 o Me, na valaau ai e le Faamasinoga Maualuga le talosaga a le OEC e uiga i se aso e faataunuu ai le faigapalota, ona o loo feteenai le Tulafono o Faigapalota (Electoral Act 2019) ma le Faavae o Samoa (Constitution).
I le Vaega 64 o le Faavae o Samoa o loo tuuina mai ai le 3 masina e tapena ai se faigapalota tele pe afai ae taape faafuasei le Palemene.
Peitai, o le Tulafono o Faigapalota, o loo tuuina mai ae le ono masina, ona o loo fua lava le tulafono o faigapalota masani pe a maea lelei le 5 tausaga o se paeaiga.
E lua ni auala mo le agai i luma sa talosagaina e le Komesina o Faigapalota, le afioga ia Tuiafelolo John Stanley.
O se auala muamua, o le faatino lea o faigapalota i totonu o le tolu masina, ae faataunuu i le Aso 29 o Aukuso 2025.
Lona lua, ia tuu avanoa mai mo tapenaga tāua ae maise le Lola Palota e le’i taitai ona soo le resitaraina o le mamalu o le atunuu. Afai e tuuina mai le 4 masina ma le 2 vaiaso e tapena ai le faamoemoe, lona uiga o le Aso 17 Oketopa le faigapalota.
E pei ona faamamafa e le Komesina o Faigapalota, o le itu e pito sili ona tāua, o le maua lea o se avanoa e resitala uma ai le atunuu mo le faigapalota.
O le afioga i le Famasino Sili ia Satiu Simativa Perese, faapea le Faamasino Sinia o le Faamasinoga Maualuga ia Vui Clarence Nelson ma le afioga i le tamaitai faamasino ia Leutele Niava Mata Tuatagaloa, le saofaiga toatolu sa latou iloiloina le talosaga i lenei Aso Toanai ao loma le faamanatuina o le Tutoatasi o Samoa.
I le taimi nei e na o le toalima vaega faaupufai o loo faamaonia mai e le OEC ua maea ona resitala aloaia atu i le Ofisa o Faigapalota.
O le HRPP ma sa auai atu le alii loia ia Fuimaono Sefo Ainuu.
O le SNDP e le’i iai se latou loia ae na tulai ai le alii o Papalii Malietau Malietoa.
O le alii loia ia Arthur Lesā, sa tula’i mo le Samoa United Party, lea sa resitaraina i le aso ananafi, ma o le a tauva uma ai le afioga i le Palemia ma le Kapeneta.
O le Constitution Democracy Republic Party, sa auai atu ai le alii o Maiava Osborne.
E le’i auai le tamaitai loia ia Mauga Precious Chang mo le Faatuatua i le Atua Samoa ua Tasi.
O faamaumauga a le Ofisa o Faigapalota, talu mai le ta tonu o le itula e valu i le po anapo (8pm) e 62,339 le aofai o le atunuu ua resitalaina ma faamauina i luga o le Lola Palota. E tusa lea ma le 53% o le fuainumera o le atunuu e 117,225 ua agavaa mo le faigapalota o le 2026.
E 54,886 le aofa’i o le atunuu e le’i resitalaina. E tusa lea ma le 47%.
Saunoa Tuiafelolo John Stanley, “E le mafai ona faatino se faigapalota i le fuainumera lea e na o le 62,339.
Ua toe tolopoina le mataupu sa valaauina i le asō mo le Aso Lulu o le vaiaso fou, ae se’i tuuina atu le avanoa i alii ma tamaitai loia e tuuina mai ai a latou talosaga tusia.
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025
