Faamatuu atu Seleni o le Poloketi Miliona Tala mo nisi o Itumalo

0
44

E lima itumalo na sainia a latou maliega (funding agreement) mo le faamatuuina atu o le $150,000 mo le faamautuina o ofisa fonofaavae.

O Lotofaga, Salega 2, Vaa o Fonoti, Faleata 4 ma Gagaifomauga 2.

O le Minisita o Tupe, afioga Mulipola Anarosa Molioo, na momoliina le saunoaga autu, e fai ma sui o le Malo.

Saunoa Mulipola e faafetaia itumalo ua lautogia, e amata mai lava i faipule faapea komiti o itumalo taitasi.

“Faafetai ona o le tofa ua a’e e galulue faatasi ai ma le Malo aemaise o le sosolo lea i alafua ma taiala e lima taitaiina ai faatinoga o komiti.”

E valu foi nisi itumalo na faalauiloa e le minisita, o le a tuuina atu iai le seleni e $425,000 pe a maea ona faamautu mai a latou fuafuaga mo le faaogaina o lea seleni.

O itumalo e valu o loo ua agavaa mo lea seleni $425,000 e aofia ai Salega 2, Aleipata Itupa i Luga, Faleata 4 ma Faleata 1, o Vaimauga 4, Siumu, Lefaga ma Faleaseela faapea ma Sagaga 4.

O le itumalo o Lotofaga lea o loo tulai mai ai le sa’o faapito ia Fiame Naomi Mataafa.

Salega 2, lea o loo tulai mai ai le Minisita Olo Afoa Fiti Vaai.

O le itumalo o Aleipata Itupa i Luga, lea o loo tulai mai ai le afioga Fua’ava Suluimalo Amataga o le HRPP.

O le tofa Ale Vena Ale o le faipule lea o Faleata 4, ae o le afioga Manuleleua Paletasala e faipule i Faleata 1.

O Siumu, o le tofa Tu’uu Anasii Leota, le Sui Tutoatasi o le Maota.

O le itumalo o Lefaga ma Faleaseela o loo tulai mai ai Masinalupe Makesi Masinalupe, Papalii Tagaloa Pasi Poloa mo Sagaga 4.

O Vaimauga 4 o le itumalo lea a le Minisita o Leoleo, ia Lefau Faualo Harry Schuster.

Saunoa le tamaitai Minisita, mo itumalo lea ua sainia le $150,000 – e lima aso faigaluega ona maua lea o le tino i tupe i totonu o le tusi tupe a itumalo, ae mo itumalo o loo agavaa i le $425,000 – e sefulu aso faigaluega ona mafai lea ona maua lea seleni i a latou tusi tupe.

O le Poloketi Miliona, e faamatuu atu ai le miliona tala i tausaga faaletupe taitasi (annual budget) mo Itumalo faalepalota e 51.