O le vaiaso nei na molimauina ai le Sainigalima o Maliega Tau Tupe (Signing Funding Agreement) i le va o le Malo o Samoa ma sui o le Komiti o le Fono Faavae o le Itumalo o Vaimauga 4, ma faamatuu iai se vaega tupe e $700,000 mo le polokeit.
I le saunoaga a le Minisita o Tina ma Tamaitai, Nuu ma Agafesootai, le afioga ia Lagaaia Ti’aituau Tufuga, na ia failoa ai, o lea ua faafaigoifie e le Malo ae maise le Minisita o Tupe le tuuina atu o seleni i lalo o le Poloketi Miliona.
“Lea ua mafai ai ona faamatuu atoa atu le $700,000 afe tala i Fono Faavae a itumalo.”
O lenei seleni, e $160,000 e faagaganaina mo totogi a le aufaigaluega o loo gafa ma le faatinoina o gaioiga a Fono Faavae, ma nisi vaega moomia e ofisa o Fono Faavae. Ae o le $540,000 tala, e mo le faatupeina o atinae poo poloketi a itumalo.

O Itumalo e tolu mai le motu tele i Salafai lea sa ta’imua i vaiaso na te’a nei, i le faamatuuina atu o lenei vaega tupe o le Miliona Lona Tolu (TF2024-2025). O Faasaleleaga 1, Faasaleleaga 4, ma Vaisigano 1 lea ua maea ona faamatuuina atu a latou ta’i $700,000.
O Vaimauga 4 lea ua muamua mo itumalo o Upolu nei, ae o le vaiaso fou, o loo faamoemoe e maea ai ona iloilo talosaga a Faleata 1, Palauli 1 ma Aiga-i-le-Tai.
O le maea ai ona iloilo ma pasia lipoti a suetusi i le fa’aaogaina o le miliona ($1,000,000) sa tuuina atu mo le Tausaga Faaletupe 2023-2024 mo atinae a itumalo, lea e mafai ai loa ona faagasolo seleni mo le TF 2024-2025.
Suiga Fou
Na saunoa le Minisita ia Lagaaia e faamanino nisi o suiga fou i le faagasologa o le Poloketi Miliona. Ua faafaigofie, ma tuuina faatasi atu le 70% o le seleni a le poloketi.
Saunoa le Minisita, o le vave lava ona tuuina atu o lipoti o galuega ma lipoti a suetusi, o le vave foi lena ona mafai ona fai le iloiloga a le Komiti Faafoe a le poloketi, ma faamatuu mai ai le seleni $700,000 muamua mo le TF 2024-2025.
O le tausaga faaletupe 2025-2026, o loo iai le faamoemoe o le a faamatuu atu ai fo’i e le Malo le vaegatupe e le’i mafai ona tuuina atu mo le tausaga faaletupe muamua o le paiaega lenei: TF 2021-2022.
O le isi suiga i le Poloketi Miliona ua iai lea i le Komiti Faafoe. Lea ua faaitiitia ai le fuainumera o sui o le Komiti Faafoe. Ua totoe ai na o le toalua minisita, o le Minisita o Tupe i le afioga ia Lautimuia Uelese Afoa Vaai, ma le Minisita o loo faauluulu iai le Poloketi, le Minisita o Tina, Tamaitai, Nuu ma Agafesootai le tofa ia Lagaaia Ti’aituau Tufuga.
E 51 itumalo o Samoa o loo faamatuu atu iai le $1,000,000 tala i tausaga taitasi i lalo o lenei poloketi. O nisi o atinae ma galuega ua faatino ai, o le totogiina lea o pili a le fanau aoga ua latou ausia le iunivesite e pei o le NUS ma le USP.
O loo faatupeina fo’i i lalo lenei polokeiti nisi o atinae tau maumaga, lafu manu, faatoaga ma faigafaiva. Ae mo nisi itumalo o loo faamatuu atu mo le faaleleia o faleaoga a nuu o le itumalo.
O loo faatupeina fo’i i lalo o lenei poloketi polokalame faalauiloa ma aoaoga i mataupu ogaoga o loo aafia ai Samoa (development issues) e pei o Pulega Lelei (good governance), ma Sauaga i Totonu o Aiga (family violence).
- Moomia e le Faamasinoga Mafuaaga Tatau e toe Faitau ai Palota mo Itumalo e 10 - September 10, 2025
- Vave ona talia ma faaulufale e Faumuina le ifoga a Alii ma Faipule o Safua - September 9, 2025
- Talosaga Faaolatane Fiu lea sa tū lua, ina ia Toe Faitauina Palota mo Palauli 2 - September 8, 2025













