Faamaonia nisi foi Moliaga Faaopopo o le Taufaavalea

0
1285

Ua faamaonia nei ni moliaga o le taufaavalea i ni taulelea se toalua, ae o loo tuli foi a lā’ua faasalaga i le moliaga lava lea e tasi.

O Viliamu Tuigamala Faaleleiga poo Vivien faapea foi ma Joseph Lafaele poo Joleen, o loo tuli a la faasalaga e fā tausaga ma le ono masina i le falepuipui, i le moliaga o le taufaavalea.

Peitai o le Aso Gafua na toe aumai ai nei alii mai le falepuipui i Tanumalala, e toe tali atu i ni moliaga e tolu o le faiga taufaasese ma le taufaavalea ma le faamoemoe e aoina mai ai se seleni mo i laua. (Obtaining by deception).

I taualumaga o le Faamasinoga Maualuga na ioeina ai e lā’ua uma moliaga e tolu e aofia ai le faia o ni faamaumauga sese i se siaki Samoa National Bank. O nei siaki ua faa’aogaina ai le suafa Patele Maselino Lafaele. Sa la faia ma le mautinoa ma lo la silafia lelei e sese faamaumauga.

E faapena foi se siaki sa faaogaina i se tasi o faleaiga i Samoa, e aumai ai ni pizza lapopoa se lua e $35 tala i le pizza e tasi, ma le lua pizza feololo e $23 tala i le pizza e tasi, ma se tino i tupe e $84.00 na ave ese mai le faleaiga.

Ua la ioeina la moliaga ae o loo tuli la’ua faasalaga i le moliaga lava o le taufaasese, lea na aafia ai nisi o taulelea sa saili avanoa mo galuega faavaitaimi. Sa aoina mai ai e Vivien ma Joleen ni seleni ta’i $300 i le tagata e toatasi, ae 13 ē na aafia.

E fā tausaga ma le ono masina lea o loo tuli mo lena soligatulafono.

Ua faatulaga mai e le afioga ia Fepuleai Ameperosa Roma le Aso 8 Fepuari 2023 e toe valaauina ai lenei mataupu ae sei aumai ai se fautuaga a le itu a leoleo poo le a le maualuga e amata mai ai se faasalaga. O loo tāpā foi e le Faamasino se avanoa e tuuina mai ai le lipoti a le Ofisa Faanofovaavaia.