O le vaiaso nei sa tulai ai Pelepesite Faavae Toala mai Faga Savaii ma Alafua, i le Faamasinoga Faaitumalo, e tali atu i moliaga o le umia lea o ni paipa se lua (utensils), faapea ni pulufana faasolitulafono (illegal ammunition).
O Pelepesite Toala lea sa lipotia e le SGN lana molimau i le Faamasinoga Maualuga mo le mataupu a lē sa avea ma Komesina Lagolago o Faigapalota, Afualo Daryl Mapu.
Sa molimau Pelepesite e lagolago Afualo ma faapea mai ai; o ia na te tuleia fualaau faasaina mo se tasi o tamā e nofo i Vaitele. O ia e ona laau malosi ma paipa sa maua atu e leoleo i le aso sa osofaia ai, ae o ia foi e ona le ofuvae sa ofuina e Afualo, faapea ma fualaau faasaina (aisa) sa maua i le taga o le ofu.
Sa molimau foi Pelepesite o laau malosi sa maua atu e leoleo i lea aso, o fana e avatu i tagata pe afai e leai se tupe e totogiina ai fualaau faasaina. Sa lauina e Pelepesite suafa uma o i latou sa aumai ai laau malosi.
O le vaiaso nei lea la sa tulai ai Pelepesite faapea le tamaitai o Utuagiagi Taumaloto Faumuina, o Vaiusu ma Mulifanua.
I tolaulauga o lenei mataupu e faapea; i le Aso 25 o Ianuari 2020, sa lipotia ane ai i le ofisa o leoleo i Faleata e se tasi o le atunuu e faapea o loo vevesi se ulugalii i totonu o se taavale o loo tu i luma o Gym 1 i Tuanaimato.
Na tali atu le ofisa o leoleo ma faatonuina le ugalii ina ia latou agai ane i le ofisa i Faleata.
Sa tapā e Malu o le Malo le laisene o le ave taavale ae tali ane Pelepesite, o loo i totonu o le taavale lona laisene.
Na agai ane le alii leoleo i le taavale e saili le laisene ae maua ai e leoleo ni paipa se lua poo ni mea faitino (utensils) e faamoemoe e faaoga e ulaina ai le laau malosi o le aisa.
O loo tuuaia faapea sa iai ma ni black straw, ma ni pulufana o le laau malosi 22.
Na molia e leoleo i la’ua uma nei e toalua, o Pelepesite ma Utuagiagi, lea na agai ane le taavale,
Ae le faaiuga na tuuina mai le Alii faamasino Leota Raymond Schuster, na ia saunoa ai e faapea, “Ua mafai e le itu a leoleo ona faamaonia le moliaga faasaga ia Pelepesite – o le umiaina (possession) o paipa se lua e faamoemoe e ula ai le aisa (utensils) mo Pelepesite, ua mafai foi ona faamaonia i le maualuga e aunoa ma se masalosaloga tatau le moliaga o le umiaina o pulufana poo ututau 22.
“Petai ua le mafai e le itu a leoleo ona faamaonia se moliaga e faasaga i le tamaitai o Utuagiagi Taumaloto Faumuina.”
Saunoa le alii faamasino, “pau le sootaga o Utuagiagi, o le va faaleuo poo se ugalii foi ma Pelepesite, ae e le o iai ni faamaumauga maumaututū e faamaonia ai sa fesoasoani Utuagiagi ia Pelepesite i le faatinoina o le soligatulafono,”
Pei ona silafia o le masina lenei o Oketopa i lona aso 14 lea sa faamoemoe e lauina ai le faasalaga o Afualo Daryl Mapu, ina ua faamaonia e le Faamasinoga Maualuga lona umia lea o le aisa, o paipa, o se fua, ma ni laau malosi e le faatagaina, faapea ni pulufana faasolitulafono. peitai o lea lava mataupu ao suesueina na tulai ai Pelepesite ma faaleo lana molimau o mea uma sa maua totonu o le fale, o loo tuaia ai Afualo, o ia lava e toatasi e onaina.”
Ua faatulaga e le faamasinoga le Aso 14 o le masina nei, e tuuina mai ai se faaiuga o lenei mataupu.
(0)
