Faaoga e se Tamā se tama’i naifi e faafefe ai lona afafine ao ia faia ni uiga mataga ia te ia

E 51 tausaga o se tama ua faamaonia i luma o le Faamasinoga Maualuga lona faia o ni uiga mataga i lona afafine fai (step daughter).

O le Aso Lulu sa faamaonia ai e se vasega o faatonu (panel of assessors) moliaga o lenei tama mai se afioaga o Savaii.

E fa moliaga na finauina e le itu a leoleo e ala atu lea i tamaitai loia o le Ofisa o le Loia Sili (Prosecution).

O nei moliaga e aofia ai le faigaaiga faamalosi, feusuaiga ma se tasi e i lalo o le 21 tausaga, ma le umia o se aupega matautia.

I faamaumauga a leoleo, na faia e lenei tamā nei uiga faasolitulafono i le va o le Aso 21 Setema agai le Aso 31 o Tesema i le tausaga 2020.

I le lipoti a leoleo o loo tā’ua ai, sa faaogaina e lenei tamā se tamai naifi, e faafefe ai lona afafine fai, ae faatino feusuaiga faamalosi ia te ia.

O loo tā’ua foi i ripoti e faapea sa tulai mai lenei soligatulafono ma faatino e lenei tamā uiga mataga, i se taimi o loo toesea ai le tinā o le aiga.

Peitai, o mafaufauga ma tuuaiga na, e tusilima ai i tinā, ua fai ma alofaga i tamā o loo faatinoina nei uiga mataga, agai i fanau teine ma ua lē malu ai i latou i totonu o aiga.

Na autasi le laulau faatonu e faamaonia moliaga uma sa faasaga i lē ua molia.

Sa poloaia ai loa e le Alii Faamasino ia Lesatele Rapi Vaai, le nofo taofia ai loa o lenei tama i le toese (in custody), e talia ai le aso 12 o Aokuso, e tuuina mai ai se faasalaga a le faamasinoga mo lenei mataupu (sentencing).

I le masina o Novema 2021, sa tuuina mai ai e le Faamasino ia Tologata Tafaoimalo Leilani Tuala-Warren se faasalaga e 20 tausaga i le toese, mo se tama e faa 32 ona ia faia ni feusuaiga faamalosia i lona lava afafine e 17 tausaga.

E faatupulaia pea sauaga i fanau teine o Samoa, i totonu o aiga. O se suesuega a le Ofisa o Sulufaiga, sa faamauina ai le 10 pasene o ē sa faatalanoaina, e faapea sa faia ni faigaaiga faamalosi ma i latou (rape). Ae sa faatino e se tasi e masani lelei iai i totonu lava o aiga.

E le misi se vaiaso ma se mataupu i luma o le Faamasinoga Maualuga, e tuuaia ai tamã matutua, e toatele o loo uuina suafa matai ma ua tā’ua i latou o ulu o aiga – i lo latou faia o ni uiga mataga i fanau teine o loo nonofo i totonu o latou lava aiga.

(0)