Ua tuuina mai le faaiuga a le Faamasinoga mo Lema’i Simanu “Manu” Sione ma Malele Paulo “King Faipopo” e faamaonia ai moliaga o le taupulepule e faaoo le oti i lē sā avea ma Palemia o Samoa, Tuilaepa Sailele Malielegaoi, faapea lē sā avea ma Komesina o le Matagaluega o Leoleo, Fuiavailiili Su’a Egon Keil.”
Sa tula’i le sui o le vasega o Faatonu, e na te lauina mai lenei faaiuga ina ua latalata i le 7pm i le po o le Aso Faraile.
Saunoa le sui o le Vasega o Faatonu e toa lima sa latou iloiloina molimau o lenei mataupu, o le latou faaiuga, “e tusa ai ma le tulafono autu (Crimes Act 106 (6)) o le 2013, lea ua solia e i la’ua nei – o le taupulepule lea e faaoo le oti se isi.”
E lua lelei vaiaso sa faagasolo ai le iloiloina o lenei mataupu, ma e silia ma le to’a sefulu molimau a le itu a leoleo na folasia i luma o lana afioga i le Faamasino Sinia, Justice Vui Clearance Nelson, faapea le Vasega o Faatonu.
O ia molimau e aofia ai matai o le afioaga o Laulii, faapea lē sa faatonuina e le au taupulepule e na te faatinoina le gaioiga, o Taualai Leiloa.
O Taualai Leiloa o loo tuli nei le lima tausaga o lana faasalaga, ina ua ia ioeina lona moliaga o le taupulepule e faaoo le oti – ma o ia foi sa fai ma molimau autu a leoleo.
I le folasaga faaiu a le afioga i le Faamasino ia Vui Clarence Nelson o loo tā’ua ai, e tolu nofoaga eseese sa taumafai i latou nei e faataunuu ai le soligatulafono.
“E aofia ai le malumalu o le Ekalesia Katoliko i Siusega, o le Maota o Tuilaepa i Siusega poo Ululoloa, faapea le nofoaga maketi o i’a i Apia lea e masani ona faataui’a ai Tuilaepa.”
I fafo mai o le potu faamasino sa faaalia ai se finagalo o Malele Paulo poo King Faipopo, e na te lē talia le faaiuga a le vasega o faatonu ua tuuina mai nei, ma o ia, e mamā lona tagata mai lenei mataupu.
O le Aso 24 o Aperila o le a tuuina mai ai e le Faamasino Sinia ia Vui Clarence Nelson se faasalaga a le faamasinoga mo lā’ua nei. O loo tatala pea i tua Lemai ma Malele e tālia ai se faasalaga e tuuina mai e le Faamasinoga.
Peitai e lima tausaga i le toese le faasalaga na tuuina mai e le afioga i le Faamasino ia Tologata Tafaoimalo Leilani Tuala-Warren, mo le soligatulafono lava lea e tasi, ina ua taliaina e Taualai Leiloa ona moliaga.
O loo tumau pea le poloaiga a le Alii Faamasino ia Vui Clarence Nelson, e faasa ai ona faasalalauina taualumaga o lenei mataupu e ui lea i faamatalaga a molimau na fōlasia.
Peitai, i le tuuina mai o le faasalaga a Tologata Tafaoimalo Leilani Tuala-Warren ia Tesema 2020 mo Taualai Leiloa, sa auiliili mai ai le itu a leoleo, lea sa ioeina e Taualai.
O le mafuaaga o le faasa ona faasalalau faamatalaga a molimau na tuuina mai, ona o lenei mataupu e toe toatasi lē o loo molia ai, e lei faataunuuina lana faamasinoga.
Sa molia faatasi Taualai, Malele Paulo, Lemai Faioso Sione ma Talalelei Pauga aka Ninja poo ‘Tala’.
O Talalelei Pauga, e aumau i Ausetalia ma o loo tālia se aso e toe taliu mai ai e tali atu i moliaga o loo faasaga ia te ia.
O Lema’i sa tulai ai le afioga ia Unasa Iuni Sapolu, ae o Malele Paulo sa tula’i ai le susuga ia Quentin Sauaga. O Lupematasila Iliganoa Atoa sa taitaia le itu a leoleo.
