Na suia le tali tete’e a le tamā 61 tausaga le matua mai le afioaga o Salani Falealii i le faamasinoga maualuga i le taeao ananafi, ina ua faatulaga suesuega a le faamasinoga i luma o lana afioga le tamaitai faamasino ia Tafaoimalo Leilani Tuala-Warren.
O Fuimaono Tanielu e 9 lelei lava moliaga sa molia ai i le faamasinoga. E tasi le moliaga o le toso teine poo le faia o se faigaaiga ma se teineitiiti e i lalo o le 16 tausaga (rape), atoa ai ma moliaga e valu o le pule le uma poo le carnal knowledge.
Sa māua i le taimi muamua le teena e lea tamā o ona moliaga, peitai ina ua agai mai le faamasinoga e amata le suesueina o lea mataupu ananafi, na molimauina ai le toe suia o le tali tetee a le na molia, i le tali ioe e tauala atu i lana loia o loo tulai mo ia.
O lē o loo aafia i lenei mataupu o loo taofia le faasalalauina o lona igoa ma isi faamatalaga uma e uiga ia te ia, peitai o se tamaitai e i lalo o le 16 tausaga le matua.
Ua tuuina atu nei la e le faamasinoga le tolaulauga o le faaiuga o lea tama i le aso 6 o Fepuari o le tausaga fou 2020.
O loo ua faagasolo foi le galuega a le ofisa o le Faanofovaavaia (probation), ma e tapa sa latou ripoti mo le faaiuga a le tamaitai faamasino.
O lenei solitulafono ua sasao faaafi i le atunuu, ae maise le vaaia ai o le molia mai o nisi o tama matutua, ua toe mataifale lava i le fanau poo nisi fanau a o latou aiga.
O le Aso Gafua na tea nei i le faasologa o mataupu (mentions) i le Faamasingoa Maualuga na tulai ai foi ni tamā matutu se toatolu.
E 51 tausaga o se faifeau Metotisi o loo talia nei lana tali i moliaga o le toso teine poo le faia o se faigaaiga ma se teineitiiti e i lalo mai o le 16 tausaga.
E 60 ma ona tupu tausaga o se tasi tamā mai le afioaga o Iva Savaii o loo talia foi sana tali i moliaga o le pule le uma poo le carnal knowledge e agai i lona lava afafine (grand-daughter).
O nei tama e toalua, e toe tulai i luma o le Faamasinoga i le Aso 4 Novema 2019 e tali i moliaga.
O le lona tolu ai o mataupu faapenei e aafia ai alo ma fanau teine, o se tamā 71 tausaga le matua o lona soifua, ua ioe i le moliaga le pule le uma poo le carnal knowledge i se teineitiiti e i lalo ifo o le 16 tausaga.
