Faamaonia e le LTC: Faaauau le Galuega a Afega, E Leai se Apili a Levi Saleimoa ua Tuuina Atu

E leai se talosaga apili a Levi Saleimoa ua faaoo atu i le Faamasinoga o Fanua ma Suafa. E mulimulitai le Faamasinoga i le faaiuga o le 1963, o eleele ei tua atu o le Faatafafa a Fata ma Maulolo, o fanua lava o Fata ma Maulolo e pulea e Alii ma Faipule o Afega. Ae tulai foi se tasi o alii loia mai Levi Saleimoa, e faapea mai, e ese foi lo latou mau ona e talitonu i latou, o fanua o Levi ua loa tausaga o galueina e latou tuaa.

0
5159

Ua faamaoniaina mai e le Faamasinoga o Fanua ma Suafa, le faatumauina pea o se faaiuga o le 1963 e uiga i fanua i le tuaoi o Afega ma Levi Saleimoa, o loo finauina nei e Alii ma Faipule o afioaga e lua. O le faaiuga o loo tuuina mai ai, o Fata ma Maulolo e pulea fanua o loo i tua atu o Leauvaa lea o loo feeseeseai ai nei.

📸 SGN. O se vaaiga i fafo mai o Potu Faamasino o Fanua ma Suafa. Aso Gafua 16 Oketopa 2023.

I se feiloaiga a afioaga e lua ma le Peresitene o le Faamasinoga o Fanua ma Suafa sa faamaonia ai, e leai se talosaga apili a Levi Saleimoa sa tuuina atu i le Matagaluega. Ae o le mataupu i fanua o loo feeseesea ai Afega ma Levi Saleimoa, ua fautuaina e le LTC – o loo tumau pea le faaiuga o le Faamasinoga o le 1963 – o loo tuuina mai ai, o laueleele o Fata ma Maulolo, e pulea e Alii ma Faipule o Afega.

O lenei feiloaiga sa faataunuuina i le aoauli o le Aso Gafua 16 Oketopa, ma taitaia e le Ofisa Sili o le Matagaluega o Faamasinoga, le afioga ia Papalii Afele John Taimalelagi ma lona auvaa, e aofia ai Letogatalima La’iafi Papalii ma Asiata Ripine o nisi ua loa tausaga o tautua i le LTC.

Sa auai ai foi le Komesina o Leoleo, le afioga ia Auapaau Logoitino Filipo, le Sui Komesina ia Lafai Hebert, ma le silia ma le 20 Malu o le Malo sa i totonu o le potu faamasino. Sa faapena foi ma fafo mai o potu faamasino, sa faatumulia ai le vasega o alii ma tamaitai Malu o le Malo.

Sa tulai mai nei feeseeaiga ma siisii ai finagalo o sui o nuu e lua, ina ua oo atu Afega e galueina fanua o loo i tua atu o se 723 eka lea e faaiogaina, o le Faatafafa a Fata ma Maulolo.

O se feeseeseaiga na tulai mai i le va o Afega ma Levi Saleimoa, sa faigata ona faatoatoa e Malu o le Malo.

O lea 723 eka, o eleele ia sa faamatuu atu e Fata ma Maulolo e faamautu iai tagatanuu o Mauga ma Samalaeulu mai le Itumalo o Gagaemauga i Savaii, sa sosola mai i vaa ina ua aafia i le mauga mu o le 1905-1911 (volcanic eruption of Mt Matavanu).

O le agai atu la o Afega e sua se auala galue i fanua ia o loo i tua mai o le faatafafa, sa tulai mai ai lenei feeseeseaiga. Sa tutu malosi mai le Matagaluega o Leoleo, e puipui le saogalemu o sui o afioga e lua, e pei ona silasila iai le mamalu o le atunuu i se ata video lea ua faasalalau faalauaitele i luga o upega tafailagi. Sa maea lena vevesiga, ina ua fautuaina e le Matagaluega o Leoleo, se feiloaiga e taumafai ai e soalaupule le mataupu. Sa faatinoina i le Ofisa o Leoleo i Matautu i le Aso Faraile talu ai lea taumafaiga, peitai, e lei maua ai se tasi.

A satellite image of the area showing Afega, Leauvaa and Levi Saleimoa.

O le faaiuga o le feiloaiga i le ananafi, Aso Gafua 16 Oketopa, e pei ona fofogaina e le afioga i le Peresitene o Fanua ma Suafa, e fa’aauau pea ona faatino le galuega a Alii ma Faipule a le afioaga o Afega, sei vagana ua faaulu ma iloiloina se talosaga apili a Alii ma Faipule o le afioaga o Levi e faasaga i le faaiuga o le 1963.

I le tolaulauina o le finagalo a le Peresitene ia Lesatele Rapi Vaai, sa ia taua ai o le 1963 na fofogaina ai le faaiuga o lenei mataupu; “O le 723 eka o eleele ua faaigoaina o le Faatafafa a Fata ma Maulolo, sa tuuuna atu mo le afioaga o Leauvaa e faamautu ai i le tausaga 1911.. Mai lena taimi sa tuuina atu ai le faaiuga, e oo mai lava i le taimi nei, e leai se apili a le afioga o Levi ua tauaaoina e le Faamasinoga.”

Faatumulia totonu ma fafo mai o le Fa’amasinoga o Fanua ma Suafa i Alii ma Tamaitai Malu o le Malo. Aso Gafua 16 Oketopa 2023.

Ao faaauau pea le feiloaiga, sa tulai ai se tasi o tama matua mai le afioaga o Levi, o Tanoa Mua’au Misi, ma tuuina mai se tuuaiga matuia e faasaga i Alii Malu o le Malo. Na ia saunoa ai, “Na matou tatalo i le Matagaluega a Leoleo i le aso o le matou feiloaiga mo se poloaiga e taofi ai le galuega a Afega seia maea le apili, peitai, e tu leoleo agai ia Afega, e foliga mai ua togi tupe e Afega leoleo.”

Na teena malosi e le Komesina o Leoleo, le afioga ia Auapaau Logoitino Filipo lea saunoaga le faavaea. “E sese lea tuuaiga. O le Matagaluega o Leoleo, latou te tutu e faamalosia le finagalo o le Faamasinoga e ala i le usitaia lea o faaiuga e tuuina mai e le Faamasinoga.”

“The Ministry of Police stands to uphold the Law and enforce the final decisions of the Court.”

Sa finau atu se tasi o tapa’au o le afioaga o Afega, le afioga ia Ututaaloga Fata Charlie Ulia; “Levi, ua leva na tou inu le sua o fanua o Afega, ma ua leva na saili se laolao e faatino ai galuega a Alii ma Faipule o Afega, o le mea lea, malilie maia…”

Na faauilavea se tasi o matai o le afioaga o Levi, le afioga i le loia ia Tuisa Tasi Patea e aumai se mau a Levi; “O lo outou lava na finagalo, ae o lea foi matou te finau atu, o eleele lava ia o Levi Saleimoa, ua au tausaga o galulue ai nei afioaga, ua tatanu ai tua’a, ua iloga foi atiina’e o loo faatino ai, ae o ai o le a totogia mea toto ma ationa’e o loo iai i le taimi nei? O le tatalo, fai se auala e filemu ai, ia aua nei maimau ai se soifua.”

Na faamanatu mai e le Ofisa Sili o le Matagaluega ia Papalii John, e le o iai se talosaga apili a Levi i le taimi nei. Ma toe faamanatu mai e Papalii, o talosaga apili, e ao lava ona muai tuuina atu e suesue, pe talia pe leai.

“E tatau ona faaulu se talosaga, ona tuuina mai lea o se finagalo o le Peresitene, pe talia le talosaga apili.”

Na toe saunoa foi le Komesina o Leoleo, e faamanatu i Alii ma Faipule o Levi, o le soli tulafono le faalavelave i le galuega a le afioaga o Afega, e tusa ma le faaiuga a le Faamasinoga o Fanua ma Suafa, e fa’aauau le galuega a Afega.

Ae o le saunoaga a le tofa ia Maulolo Tavita Amosa poo le afioga i le Sui Faipule i fafao mai o le potu faamasino; “Na omai lava Afega, o lea lava le finagalo o le Peresitene, pe taofi foi le galuega, e usitaia lava.”

Maulolo Tavita Amosa, lana saunoaga i fafo mai o Potu Faamasino, Aso 16 Oketopa 2023.

Peitain ina ua tuuina mai le finagalo o le Faamasinoga, na saunoa ai loa Maulolo Tavita, o taeao, le Aso Lua 17 Oketopa, o le a toe faa’auau ai le galuega a Alii ma Faipule o Afega.

O le aso la lea ua faatumulia ai lea itu o le tuaoi, ao faaauau le galuega a le afioaga o Afega, e sua le auala, ma faamautu le tuaoi ma Levi, Saleimoa.

O loo vaaia i ni ata sa pueina e nisi o le afioaga, o loo faatumulia ai sui o Afega, faapea foi ma nisi o Levi Saleimoa i le galuega o loo faia i le taimi nei (Aso Lua 17 Oketopa). O loo toatela foi Malu o le Malo o loo auai atu ai i le taimi nei e puipuia le saogalemu o le mamalu o le atunuu.

Aso Lua 17 Oketopa. Ua faaauau le galuega a Afega e tusa ai ma le fautuaga a le Peresitene o le Faamasinoga o Fanua ma Suafa.