Faamaonia e 235 i Latou Fou ua Pesia i le Faama’i, 7 i Latou na Malaga mai Fafo ua A’afia

0
48

Ua fa’amaonia mai e le Matāgaluega o le Soifua Mālōlōina le pesia ai o i latou fou e to’a 235 i le fa’amai o le Koviti-19 i totonu o lenei 48 itula ma le to’a fitu (7) na malaga mai fafo ua fa’amauina o lo’o a’afia i le taimi nei.

O lenei e amata mai i le 2:00 i le aoauli o le Aso 24 Me 2022 i le 2:00 i le aoauli o le Aso 26 Me 2022.

Mai lea 235, e to’a 228 i latou fou ua a’afia mai tua i le mamalu lautele o le atunu’u.

Faailoa foi e le Matagaluega ua si’itia ai le aofa’iga oi latou (community & border cases) ua a’afia i le siama o le Koviti – 19 i totonu o Samoa i le 13,380, ae to’alima o lo’o taofia pea i le taimi nei i nofoaga fa’apitoa i le Falema’i i Moto’otua.

O fautuaga e tumau pea i le mamalu o le atunu’u, auā le puipuiga o le soifua mālōlōina lautele, ina ia faia tali fofoga i taimi uma, tausisia le nofo ma le tutū vāvā i nofoaga faitele ma ia faia lou tui puipui auā o le puipuiga sili lea mo tagata uma e tete’e atu ai i le sosolo fa’aafi o le Koviti – 19.

‘”Afai ua masalomia le a’afia i āuga o le fa’ama’i, fa’amolemole nofo lelei i ‘āiga ma fa’anofoesea i se nofoaga fa’apitoa e tau mamao ‘ese mai i ‘ai latou e pele iā te oe, se’ia mautinoa ua saogālēmū  ma ua toe fa’afoisia le malosi o le tino.”

“O le puipuiga o tatou ‘āiga, uo, ma e pele iā i tatou o le tatou galuega fai fa’atasi lea.”

O le Aotelega lea o le tulaga o lo’o i ai le pepesi o le Koviti – 19 i totonu o Samoa, ua fa’amauina mai i totonu o le 48 itula mai le 2:00 i le aoauli o le Aso 24 Me 2022 se’ia o’o mai i le Aso 26 Me 2022.