Faamanuiaina Tinā o Samoa i le “Suga Loan Saver” a le Faletupe o Tagatanuu

O le Suga Loan Saver e uunaia ai foi avanoa mo tina e finafinau ai mo soo se faitotoa e matala mai mo faamanuiaga eseese auā le tausiga o latou aiga. 

0
509

Ua iai nei se auaunaga a le Faletupe o Tagatanuu o Samoa, le National Bank of Samoa (nbs) e fesoasoani ai i tinā auā le atiinaeina o aiga.

O le Suga Loan Saver, o le igoa lea o se polokalame sa faalauiloaina mai e le nbs i le vaiaso ua tea nei, e o gatasi ma le fa’amoemoe o le Aso Faapitoa mo Tina o le Lalolagi – o tinā e uunaia le alualu i luma o atiinae “Invest in Women: Accelerate Progress”.

Seulupe Michelle Macdonald.

I se saunoaga a le Sui Taitaifono a le Komiti Faafoe, le afioga iā Seulupe Michelle Macdonald, sa ia tā’ua ai o lenei auaunaga e faapitoa mo soo se tinā o loo iai sana teugatupe i le nbs.

“E amata mai i le $20 tala sana teugatupe, ae aunoa ma se tupe totogi (fee) ae ofoina atu e le faletupe ni tului poo ni pasene faaopopo i lau teugatupe (saver), aemaise o se ponesi faaopoopo pe afai o le faaauau pea ona tului lau paleni ma fafagaina pea ae le talaina i tua.

Saunoa Seulupe, o lenei faamoemoe e lē na o le faalauiloa o le Suga Loan Saver ae o le uunaia lea o avanoa mo tina e finafinau ai mo soo se faitotoa e matala mai mo faamanuiaga eseese e maua ai le avanoa mo le tausiga o latou aiga.

E au le inailau a tamaitai – e tāua tinā mo le atiinaeina o aiga.

Ua matauina le tele o faalauiloa fou mai le faletupe o le National Bank of Samoa talu ona amatalia lenei tausaga.

E le’i mamao atu foi ona faalauiloa le amatalia o auaunaga feaveai (mobile banking services) e faatino e ni van se lua, aua le mamalu o le atunuu o loo alala i nuu i tua.

O le lua vaiaso talu ai sa tatalaina ai fo’i le lalā o le nbs i Vaitele, ina ua faaleleia ma faalauteleina.

E le gata i lea ae o le oo atu o le au siisii a Samoa e tauva i Niu Sila, ma tuuina atu ai se vaega tupe e $20,000 tala mo Tuaopepe Jerry Wallwork ma le Au Siisii Mea Mamafa a Samoa.

Ae o lea foi ua tuuina mai le Suga Loan Saver e faamanuiaina ai tina uma o Samoa.