Faamanuiaina le Pulega o Tineimu ma Faalavelave Faafuasei i se Meaalofa mai le ADRA Samoa

0
29

Ua tuuina mai se faafatai a le Komesina o le Pulega o Tineumu ma Faalavelave Faafuasei, le afioga ia Tanuvasa Petone Mauga, i se meaalofa sa tauaaoina atu e le ADRA Samoa mo le matagaluega, e fesoasoani ai i le feagai ai o i latou ma le auaunaga, ao aafia foi nisi o le aufaigaluega i le Koviti-19.

E silia ma le $65,000 se faatupega o se meaalofa na tau’aao atu e le ADRA Samoa i le Pulega o Tineimu ma Fa’alavelave Tutupu Faafuasei a Samoa (FESA), faapea le Matagaluega o Leoleo.

E 1,000 taga araisa ma le 1,000 pusa saimini faapea le 92 o nisi o vaega e faaoga e le matagaluega aua le aafiaga o le koviti (care bags) sa mafai ona ave mo le Matagaluega o Leoleo ma Falepuipui.  E 200 taga araisa ma le 200 pusa simini sa maua e le FESA, ma a latou foi carebags e 79. O lenei fesoasoani, sa mafai ona tufatufaina i sui o aufaigaluega o nei matagaluega taimua (frontline staff).  

Sa saunioa le Faatonu (Director) o le ADRA Samoa, le afioga ia Su’a Julia Wallwork, o lenei fesoasoani, ona ua maitauina le aafia o le Pulega o Tineimu, faapea le Matagaluega o Leoleo ma Falepuipui i le faamai, ae o i latou tonu lava lea, o loo gafa ma le tali atu i nisi o le mamalu o le atunuu o loo telefoni mai pe a fia vave maua se fesoasoani. 

I se faatalatalanoa ma le susuga i le faafeagaiga ia Sione Ausage, o le Taitaifono o le Komiti Faatonu o le ADRA Samoa, o ia foi o le Peresetene o le Ekalesia Aso Fitu o le Toe Afio Mai, sa ia faapea mai ai, o lea ua oo mai le polokalame fesoasoani a le ADRA Samoa i le Pulega o Tineimu, e fesoasoani atu ai i nisi o aufaigaluega o loo taimua i le galuega fita o loo faatinoina nei.

“O loo timuia ma laina, e le o mafuta foi ma aiga ae o loo iai tolauapiga ona o le puipuiga o le atunuu atoa, aemaise foi, ua aafia lava i latou i le faama’i ona o le faatinoga o le galuega.”

Pastor Sione Ausage (Chairperson)

Ua saunoa faafetai le Komesina o Tineimu e faafetaia le agalelei ma le alofa o le ADRA, ua tuuina mai tonu lava i se taimi sa feagai ai i latou ma le faigata o le toatele ua maua i le faamai, ae o loo faatinoina pea le auaunaga.

“Faafetai tele i le afioga ia Su’a Julia ona o se finagalo e amanaia ai le auaunaga a le FESA, ua ala mai lenei fesoasoani. I agalelei Le Atua ma toe faatutumu mea ua faagaogaoina ona o le tou alolofa mai.”

Saunoa Tanuvasa, e toa 79 sui o le FESA sa aafia (test positive) i le Koviti, ae sa faanofoesea lava ma toe taliu mai i galuega ina ua te’a le faamai. “E toa 65 alii, toa 14 tamaitai, ae 25 volunteer sa maua i le faamai.”

Sa saunoa faafetai foi le Sui Komesina o Leoleo, Auapaau Logoitino Filipo, ona o lenei meaalofa sa tauaaoina mai le ADRA. Sa ia ta’ua foi, e silia ma le 300 sui o le aufaigaluega taimua, sa maua i le Koviti.

Sa saunoa Pastor Sione Ausage, o le tausaga 2020 i le taimi ao aafia foi Samoa i le misela, na tuuina atu ai foi se fesoasoani i alii ma tamaitai fomai faapea tausi soifua, i lena foi faalavelave sa feagai ma Samoa ona o i latou foi lea sa fita i tuga mo le galuega faigata. O lea sa tuuina atu ai taumafa (launches) mo le aufaigaluega atoa i Upolu ma Savaii.

“O se faiga’pa’aga a le ADRA Samoa ma le Ofisa High Komisi a Niu Sila lea na mafai ai ona faatino lena foi faamoemoe, ma e $400,000 lona faatupega..

“O lea lava foai na fesoasoani mai ai foi le Ah Liki Wholesale i food items e tusa lona tau ma le $15,000 lea na fesiasoani i le faatino o taumafa i le afiafi (dinner) mo le aufaigaluega o le soifua maloloina..”

Sa saunoa foi le taitaifono o le ADRA o lena polokalame, e fa lelei lava masina o tuuina atu taumafa mo fomai ma tausi soifua i le 7 aso o le vaiaso.

Na saunoa manino lava le faafegaiga, e le o faapito le polokalame i tagata o le Ekalesia SDA ae o loo faasafua fesoasoani mo soo se faalapotopotoga, matagaluega, afioaga ma itumalo faapea aiga taitasi, o loo manaomia se fesoasoani.

O le ADRA o le tasi lea o faalapotopotoga sa tuuina atu iai le $2,000,000 mo ana polokalame fesoasoani, e tau ala mai i fesoasoani a le Malo sa tufatufaina. Sa faamanuiaina foi le ADRA is se meaalofa tupe mai le SNPF mo le faamanatuina o le latou Iupeli Auro, o seleni tai $10,000 i faalapotopotoga e 13, lea e aofia ai ma le ADRA Samoa.

O le ADRA Samoa ua lauiloa foi i le tele o fesoasoani e ofoina atu i le toe fausia lea o maota ma laoa o aiga taitasi, o fale apitaga mo nuu ma itumalo faapea le tuuina atu o fesoasoani i nisi o matagaluega faapea komiti tina ma tamaitai i afioaga i tua.