Faamanuiaina le Aoga Tulagalua i Lona Fagaloa

0
311

#SaunoagaAutu

O le saunoaga a le Afioga i le Palemia, Susuga Tuilaepa Sailele Malielegaoi mo le tatalina o le faleaoga o Lona, i Fagaloa.

Ua taoto tafaitoa pa’ia o le taeao ma le aso. Ua malumaunu foi le fogatia auā o lupe sa vao eseese ao lenei ua fuifui faatasi. O le viiga ma le faafetai i le Atua e lē faaitiitia. Faafetai i le ta’ita’i o le sauniga mo le fe’au folafola. Ia foai e le Alii le mau e tele auā lana feau ma le galuega.

O pa’ia o le taeao ma le aso ole’a nu’unu’u atu, na ona ou fa’atulou i pa’ia fa’alemalo ma le mamalu o le au vala’aulia ua aofia tatou te molimauina le falea’oga fou mo alo ma fanau a Lona i Fagaloa. O paia lava ia i le afio o Salevalasi ma Gafa, Alalata’i foi lo la Toalua ma Pule e fia.

Ua silasila le aofia i le matagofie o le galuega ua mae’a sa feagai ma le afioaga. Faamālō i lo outou manatu alofa i le lumanai o outou alo ma tatou fanau. Faafetai le lagolago i le taumafai mai a lo tatou Mālō ina ia lelei ma saogalemū faleaoga e aoaoina ai fanau.

Tasi nei o atinae tāua mo le manuia o le atunuu pei ona tatou faipa’aga ai ma mālō mai fafo. Lea fo’i ua fesoasoani le Mālō o Iapani ma o latou tagatanuu. Ua le gata i le toe faafouina atoa o le faleaoga, ae ua faaopopo isi potuaoga fou, faatasi ma le faaleleia o fale e tua iai tamaiti ma faiaoga. E le o lilo foi le telē o le sao o le afioaga, i alii ma faipule, o le komiti aoga ma mātua, ua atoatoa lelei ai le galuega. 

Ua matauina ‘olo’o tumau pea le aofai o alo ma fanau aoga ‘olo’o agai mai i le tatou aoga lenei, mai tausaga ua te’a e o’o mai nei, i le va o le 80 ma le 85 ae lei ausia lava le selau. O faiaoga ‘olo’o galulue nei e toatolu, aofia ai ma le puleaoga, o ni auauna loto tetele ma le lē fiugofie.

O lenei vaitau ‘olo’o iai le lalolagi ma lo tatou atunuu i faama’i, e le o tuulafoaina i tatou e lo tatou Matai Sili. Lea lava ‘olo’o faaauau polokalame e tapu’e ai le soifua aoaoina o outou alo ma fanau pei ona taumafai mai le matagaluega. Faamalo le onosa’i, faafetai le vaai alofa i le manuia o tama ma teine o le laumua nei.

Le pa’ia i le Komiti Ā’oga, le mamalu o mātua ma faia’oga, fa’amālō onosa’i, fa’afetai i lo outou lē faalogologotiga. Ia iloa e tama ma teine ia le aogā o falea’oga fou mo i latou aemaise ai lo tatou faama’ite i le teuteuina ma faatumau lona manaia.

Faafetai i le matua o faiva ma le falefa o lo outou aiga, mālō le tautua. Ia faamanuia le Alii.

Toe o se aga ona taualuga lea o lenei tausaga. O le tuualalo i le pulea’oga ma faia’oga, tautuanā lau matāfaioi ne’i fa’apa’ole ona fai. Manatu i le manuia o fanau mo a taeao. O le fe’au foi lea mo fanau a’oga ina ia maua le poto auā lo latou lumana’i.

A taape lenei aofia, afifio ia i le lagi e mamā. Puipui mai a’ao alofa o lo tatou Alii.

 

SOIFUA.