Faamanuiaga Tausaga Fou 2021 – Afioga i le Alii Palemia

0
187

SAUNOAGA FAAMANUIA TAUSAGA FOU – 2021 A LE AFIOGA I LE PALEMIA

Tuilaepa Dr Sailele Malielegaoi 

Ua tū tonu tū toa tū mua pea mea i Matāutusa o le tatou faafetai, le vi’iga ma le faane’etaga lea i le Atua o le Faavae Papa o le Malō Tutoatasi o Samoa, i lana taitaiga alofa ua tatou aulia ai le tausaga fou 2021.  Sa o tatou faafeagai i lenā tausaga ua mavae ma le anoano o le mau faafatiatama’i o le foafoaga, na lu’itauina ai lo tatou ola faatuatua. 

Ou te faatulou ma faatalofa atu ai i paia o Samoa i ona tulaga faalupea, paia ua popo ma pa e lē soloia.  Afio o le Ao Mamalu o le Malo, Lau Afioga Tuimalealiifano Vaaletoa ma lau Masiofo,  le afio o le Sui Tofia lau Afioga LeMamea Ropati ma lau Masiofo, le Tafatolu o Itutino Fefa’atauagai o Pulega masani faale-Malō e faafoe ai faigamalo faatemokalasi.  

Ae ā le tapuaiga mamalu i Aiga ma a latou Tama, Tulatoa o Aiga ma Faleupolu tofia, Tumua ma Pule, Ituau ma Alataua, Aiga i le Tai ma le Vaa o Fonoti. Afifio Faauluuluga o Matagaluega ma Faalapotopotoga ma le Aufaigaluega a le Malō sa outou fitāituga i le ao ma le po i  outou tiute tusa ai ma lou tou valaauina. 

 Ou te faatalofa atu foi i Sui o Malō ma Faalapotopotoga o tatou Paaga tumau, tainane Faauluuluga o kamupani ma pisinisi ‘ese’ese ‘olo’o gafa ma le atina’e o le tatou tamaoaiga.   Liliu le vai o Sinafutulua, Tulouna le afio o le Alii Kovana ma le Faigamalo a Tutuila ma le Motu Sa, o mamalu faasino i le Falelima i Sasae ma le Falelima i Sisifo, le Nofoama’opu, Ali’i Faatui, To’oto’o ma Upu  i le Manu’atele.  Matua le tu’u i le faanōnōgāmanu a le Aiga Sa Levī e le’o mapu lo latou faasifo i luma o le Atua ina ia tō manū mo Samoa-na-lua. O mamalu atoa ia o Samoa nei ma tatou uso-a-Malo i Sasae –  Nu’unu’u atu faatini o Tausala.               

Pe a tatou toe tō manatu i tua, ua afulelea lenei tausaga mai lava i le tau faai’ui’u o le 2019, na tatou feagai ai ma faama’i o le Misela, faaauau mai ai i le Koviti-19 ma to’atūgā feso’otai mo le puipuiga ma togafitiga.  

O lologa foi ma tafega matuia uiga ese o vaitafe i Fuluasou ma Vaisigano i le aso 18 Tesema na matua faatamaia ai le tele o oloa o faleoloa i le taulaga aia ai ma fanua o aiga e alala i autafa o vaitafe i le talafatai lava o le taulaga i Apia, i le vaitau tonu foi lea na aafia ai Fiti ma Toga i afa fulifao o se faamanatu i le mala pito matautia ‘olo’o feagai nei ma le lalolagi atoa o suiga matuia o le tau – tatou te molimauina pea i TV i aso uma i mala faapenei sa le masani ai atunuu uma o le lalolagi.  ‘Olo’o faagasolo atina’e tetele a le Malō e tagofia ai le mala lenei ua leva ona aafia ai le tatou taulaga i Apia.  Sa tapā ai e le Malō lau tou lagolago, le onosai ma le faapalepale a’o alofaiva le aufaigaluega a lo tatou Malō e faatino le latou auaunaga. 

O vavao foi ma poloaiga faale-Tulafono o Faalavelave Matuiā e faatino ai galuega laveai e le tatou Malō, ia lē faalavelaveina, o faiga taualoa ia e faafoe ai le agaga naunautai e ave le fesoasoani i ē ua tatau iai le fesoasoani.  Ae ui lava i nei gaioiga a lo tatou Malō e faavae i le agaga lelei, e tupu a’e lava uiga ma lagona faaletagata ua faoa i le ta. Matou te avatu malū i puega, i e o mafatia ona o poloaiga ma vavao. Talitonu e lē po pea se nu’u, e sau foi ao o nu’u. E fōfō alamea foi lagona tigā i le totogo a’e o malama o le tofā loloto ma le utauta mamao e fetala’i.

Faamālō le galulue, e le gata i kamupani ma pisinisi ‘ese’ese, ae faapea foi i latou o galueina le laueleele, faapea le Āiga Tautai.  Faafetai faapitoa i le fatu aiga tausi a Alii ma Faipule o nu’u, i le faatumauina o le nofo lelei ma le amio pulea o nu’u i nei ona aso i le lolofi mai o amioga faafafo e lepeti ai tatou tu ma aganuu ma mafutaga to’afilemu.  Faamalo i galuega lelei a Komiti a Tina – Faletua ma Tausi, Sa’oao ma Augafaapae ‘olo’o lagolago i polokalame ‘ese’ese a le tatou Malo e atia’e ai matafaioi faatinā aua faalavelave fai o aiga, le faaaulelei o nuu o le pae ma le auli o mea felefele, ma mea manumi e toe tau faamafola.  

O le unaia faifai pea o tatou polokalame ma atina’e ‘ese’ese ‘olo’o faapogai ai le tatou Malō, le Minisita ma le Matagaluega o Tinā.  O le ola atia’e, sogasoga, ma finafinau mo mea silisili o le tatou lea tofi mai Le Atua mai lava i le amataga o le foafoaga o le lalolagi – Na Ia poloai ai tatou te maua taumafa i le afu o le tino.  E leai se mea lelei e maua ma le filemu.  Lea ua tatou matau i le fememeai ma le lē mautonu o Malō mauoloa o le lalolagi ina ua pepesi le vairusi o le Koviti 19. Ae a Samoa? – ‘Olo’o lava pea taumafa mai lava i o tatou laufanua, ma i’a ma figota mai lo tatou gataifale. 

O le lagisoifua lea, e faamaonia ai le mau, e lē o tu’uaunoaina si o tatou atunuu e le Atua. O le feau taiala lea o le Kilisimasi, na malele ai lana afioga i le Ao Mamalu o le Malō.

Faapito augafa le faafetai iā tatou Pa’aga i le latou agaga fesoasoani mai iā Samoa.  E tupu le alofa faaSamaria agalelei i lo latou matau mai ‘olo’o fai foi le tatou sao, e le’o ola faalagolago atu i le afu liligi o latou foi tagata lafo lafoga, pe fausia ni fuafuaga e tupu atili ai le paiē ma le ola faalagolago.  ‘Olo’o iai i Samoa nei Ofisa o tatou pa’aga uma lava ‘olo’o latou matau lelei le Faaaoga tatau o latou fesoasoani aemaise mafaufauga ma faasalalauga faalauaitele e faatupulaia ai le paie e ono teva gofie ai le agaga fia fesoasoani mai.

 Na tupu muamua i Samoa mala maoa’e o le tatou tamaoaiga i uiga faapea tatou te lē toe fia o’o iai.  O le ‘au’au atoa lea o fuafuaga mamao ma atinae ‘olo’o fai nei ina ia tupu le tamaoaiga o Samoa ma siitia maualuga ai le soifua faaonaponei o nai o tatou tagata lautele.  E faapei ona toe faatulaga maualuga ai nei lo tatou atunuu e le Malō Aufaatasi talu mai le tausaga 2014, 6 tausaga talu ai, mai le lisi o atunuu matitiva o le lalolagi ua avea ai nei Samoa ma atunuu ua siitia lona tamaoaiga – “To a middle income level country”.  Pe taomi i lalo fua lelei o le soifua galulue o tatou tagata ‘olo’o auala mai ai faamanuiaga a le Silisili Ese, e ono alalaga mai ai lava ma’a ma alā, ona e lē tuua faaleiloga manū faaifo mai lagī mo si o tatou atunuu.

E lē galo le lagolago faifai pea mai o tatou aiga ‘olo’o tapua’i mamao mai i atunuu o alala ai e saili manuia mo fanau o au o matua.  Faafetai le galulue.  Faafetai le fesoasoani mai i aiga ‘olo’o taumalae e leoleo measina auā fanua ma suafa o tatou aiga.  Ua faamaonia nei Tulafono Taufaaofi sa so’ona vevesi ai ma ua aloaia nei i totonu o le Tulafono Sili – le Faavae, le malosi ua atoatoa i le Itutino faale-Faamasinoga o Fanua ma Suafa e tagofia ai mataupu ‘olo’o iai ni feeseesea’iga o aiga i fanua ma suafa e faapei ona lavasi iai o tatou matua na latou fausia le Tulafono Faavae i le Fono Faavae 1960. 

O le latou finagalo manino lea faamauina i felafolafoaiga o le Fono Faavae 1960, o mea ia ua latou lē mafai ona tu’u i le Faavae ona e lamatia ai se faaiuga a Malō Aufaatasi – i le tatou talosaga e Tutoatasi le Malō o Samoa, tu’u mai i se Pālemene o le lumanai latou te tago fia.  Mea tonu uma ia, lea ua i totonu o le Tulafono na soona vevesi ai nei i latou na tete’e. O a foi ni finagalo faitau ‘ese’ese, o upu masani a le atunu’u, e tetele a Pesega ae matua lava i le ōō.  

Lafo mai lo outou faatuatuaga iā i matou nei ‘olo’o taumalae i Samoa nei, ua matou masani ma ituaiga faafitauli ‘ese’ese faaneionapo o le soifuaga. Mau pea le to’ovae auā tatou tu ma aga masani e fofō alamea ai fe’ese’esea’iga faalelotoifale. O matai ia ‘olo’o saofafai i le Pālemene a Samoa e ese ai ma Pālemene o isi Malō ua pulepule faasoloatoa latou pulega, o tagatanuu ‘ese’ese mai ī ma ō.  Ma e lē faia e matai o le atunuu ni tulafono e toe afaina ai fanua o ‘auaiga ‘olo’o faasa’osa’o ai. 

Atonu e le’o toe mamao, tatala o tatou tuaoi o femalagaiga ina ua maua togafitiga tumau o le vairusi ‘olo’o aafia ai le lalolagi atoa.  Ia to’a pea le tai, ma ia maua outou i le filemu. Aua le soona vevesi fua ini faaliga lē faavaea e alu atu i’inei.  E tupu ai le sesē, maimau atu ai ma avanoa maua-gatā na folau atu ai e atia’e āiga ma fanau, ae toe faafoi mai ini moliaga o le faatupu vevesi e pei o le toatele ua toe faafoi mai Ausetalia, Niu Sila ma Amerika .

I nai masina ‘olo’o totoe, alofaiva Samoa i lana faiga filifiliga lautele i le totofi o sui mo nofoa o Itumalo i le Pālemene o Samoa – Faataua le filifiliga mautinoa e ala mai ai le manuia o āiga aemaise fanau lalovaoa. O Samoa o le ulua’i teritori lea o le saofaiga a Malo Aufaatasi na faamatuu mai iai le fatagana faapitoa mo lona Malo ia Tuto’atasi i le 1962 – 59 tausaga talu ai.  Na faalagolago uma iai se faaiuga mo le anoano o le mau teritori o le lalolagi ‘olo’o tālia pe i’u lelei ma filemu le taunuuga o le Tutoatasi o Samoa ua ave iai le faamuamua ae mataitu mo nisi faaiuga ‘olo’o faatalitali.  Ina ua tau lelei le faamoemoe ona faatoa faasolosolo loa lea ona faatutoatasi isi Malo i le Pasefika, Aferika ma Karepeane.  ‘Ole’ā le uiga o ia mea?  Ua matua le Malō o Samoa i le saofaiga o Malō o le lalolagi.  Ua tatou masani i le filifiliga o Faigamalō faatemokalasi e tausili i mea silisili mo a tatou fanau o le lumanai.  Ia soso’o ai pea le fau ma le fau.

Lafo i le aufaigaluega totofi a le Atua ma le latou faanōnōgāmanū ina ia tō ni manū mo Samoa e ala i le musumusuga lilo, i le tofia o se Malō e faatautaia lo tatou Sā o Faigamalo i le Paea’iga Fou o le Pālemene i le tausaga fou.

Ua faailo nei faalauaitele e le Fono a Ekalesia So’ofaatasi le vaiaso o Talosaga a le tatou atunuu atoa i le amataga o Ianuari.  Tatou te faasifo ai i luma o le Atua Silisili ‘Ese e momoli le faafetai i lana taitaiga mai o Samoa i le tele o le galuā ma le souā o to’atūgā ‘ese’ese ua tuana’i atu. Ae ā la tatou folauga ‘ole’ā amatalia i lenei tausaga?  – Tautai ma foemua pea le Atua o le Faavae o le tatou Malō ia sao i matau o tatou lavasiga uma mo lenei Tausaga Fou.

Ia manuia tele le Tausaga Fou.     

Soifua.