Faamanuiaga o le Kerisimasi mo Samoa mai lana Afioga i le Ao Mamalu o le Malo

0
452
Afioga i le Ao Mamalu o le Malo. Pu'eina: Leota Marc Membrere.

MANUIA LE KERISIMASI SAMOA; AO MAMALU O LE MĀLŌ. Tusia: Tusiga Pesetā Taofiga

“Ia fa’amanuia oe Samoa e le Atua, ma ia na tausi iā te oe. Ia fa’amalamalamaina e le Ali’i ona fofoga iā te oe, ma alofa atu iā te oe. Ia fa’asaga mai e le Ali’i ona fofoga iā te oe, ma tu’uina atu iā te oe le manuia ma le fīlēmū.”

O le malelega fa’amanuia lea mai lana Afioga i le Ao Mamalu o le Mālō Tuto’atasi o Samoa iā Tumaleali’ifano Va’aletoa Suālauvī II.

I le tauāluga ai o galuega ma tiute sa feagai ma Samoa aoao i lenei tausaga, e lē itiiti le agaga fa’afetai o Lana Afioga i le Ao Mamalu o le Mālō Tuto’atasi o Samoa iā Tuimaleali’ifano Va’aletoa Suālauvī II ma Lana Masiofo i le soifua tautua o nai o tatou tagata mai lava i tinā ma tamā mātutua se’ia o ‘o i fanauiti ua afua ai ona tumau pea i le ola atia’e ma saogālēmū Samoa aoao.

From the Unit Trust of Samoa!

O le vi’iga lava lea e fo’i i le Atua, ona o lana tausiga manana iā Samoa ua aulia manuia mai ai le masina 12 o lenei tausaga 2023.

I le Malelega Fa’amanuia a Lana Afioga mo le atunu’u atoa;

“Lau afioga i le Sui o le Fono a Sui Tofia;

Lau afioga i le Palemia ma le Kapeneta fa’apea Minisitā Lagolago;

Lau afioga i le Fa’amasino Sili ma Ali’i ma Tama’ita’i o le Fa’amasinoga;

Lau afioga i le Fofoga Fetalai ma Sui Mamalu o le Fono Aoao Faitulafono;

Members of the Diplomatic Corps;

Fa’auluululuga o Matāgaluega ma Fa’alapotopotoga a le Mālō, Pisinisi ma le Vaega Tumā’oti;

Le Pa’ia o Ta’ita’i o Ekalesia fa’apea le pa’ia o Ositaulaga i le atunu’u;

Le Pa’ia mauāluga o Samoa mai ona pona o’o se’ia o’o atu i ona fatu tuloto. O le pa’ia lava lea auā Tama ma o latou ‘Āiga, ‘Āiga ma a latou Tama, Tumua ma Pule, Ituau ma Ālataua, ‘Āiga i le Tai ma le Va’a o Fonotī.

 

“Ou te fa’atalofa atu fo’i i le fa’afofoga tapua’i mai a le Faigāmālō a Tutuila ma Manu’a. I le afio o le Afioga i le Kovana ma le Kovana Lutena, aemaise le pa’ia mauāluga o le Tafatolu o lana Faigāmālō. O le pa’ia lava lea auā Sua ma le Vaifanua, Fofō ma ‘Āitulagi, Sa’ole ma le Launiu Saelua. Afifio Fa’atui ma To’oto’o, ma ‘Upu i le Manu’atele. Ua fa’amālō le soifua manuia.

“O lea ua fa’aifo le na’aloa i lona taogāmutia lelei, ina ua mou mālie atu le taulaumea. Ua fati ta’oto fo’i āuma fatiloloa o le vasa ina ua atuē le faga i pa’au ma ua a’e sagisagi i nu’u lelei le folauga. Le Atua e ou Mālō ua fa’afetai, o lenei ua tautai a’e le folauga a Samoa i le tafa malama o lou lelei. Auā ua fa’afaō le va’a o mala, ae se’e i fatiga o galusisina le va’a o manū. Ua tepa ai nei i ula ma ua taga’i i ula. Ua tatou sapi i le malu tauifo ma tiu i le matagofie o le Atua foafoa. O le Māta’isau o le foafoaga, o le Atua o ‘Apera’amo, o Isa’ako ma Iākopo, o le Atua o Samoa. O Ia sa tu i matagi ‘olo e fa’atonu folau la tatou savaliga, ua mafua ai ona tau i manū le folauga i le fa’amanatuina o le Kerisimasi o lenei tausaga 2023. Ua mālie pule, ua malie mālō.

“O le asō, o le aso fiafia e fa’ailogaina ai le o’o mai o le fa’aolataga ma le manuia i le lalolagi ina ua soifua mai Iesu le Fa’aola. O le fatu lea o le Kerisimasi ma le fa’ataunu’uga o perofetaga i le Mesia, o Ia o Emanuelu, na te tu’imomomoina le ulu o le gata. Se alofa ina a tele, le faula’i o lona fa’apalepale ma lona fa’amaoni i le tagata, i lana fa’atōfālā’iga mamana, e afio mai i le lalolagi. Le talalelei na fa’ailoa e agelu i leoleo mamoe i le soifua mai o le Ali’i Fa’aola,

“’Aua tou te fefefe, ou te avatu iā te outou le talalelei e olioli ai nu’u uma. O le aso nei ua fanau ai iā te outou i le ‘ā’ai a Tavita le Fa’aola, o Ia o le Keriso le Ali’i. O le vi’iga i le Atua i mea aupitoāluga; ma le manuia i le lalolagi i tagata ua alofagia e ia!”

“Samoa e, e lē mavae pe gase le feau o le Kerisimasi mo i tatou o le fanau a le Atua. I lenei tausaga umi sa o tatou tauasa mai, sa i ai fītā ma lu’itau, o aga ia o le soifuaga i le ola nei. A’o le ‘au’au o le feau o le Kerisimasi o lenei tausaga, e fa’avae i le mau na momoli e agelu i leoleo mamoe. “’Aua le atuatuvale’. Auā o le tama o le a fanau mai o le a ia aumaia le talalelei.” O le tala moni lea, o le mau o le ola e olioli tele ai, o le fa’amoemoe i le mamalu o le tōfā mamao a le Atua alofa mo i tatou uma, ina ia avea le talalelei ma sili’aga o lo tatou ola auauna, ina ia ola ai o tatou agaga ma tatou maua ai le fīlēmū ma le olioli, tatou te pepese ai;

Ua ou maua le olioli iā Iesu

Ua ia aumai i lo’u olaga le fīlēmū

O o’u noanoataga ua matala

Ina ua ia fa’asa’oloto a’u mai le leaga.

“O le feau autū lea o le talalelei iā Iesu Keriso, o lo’o molimoli mai e le aufaigaluega totofi a le Atua, o lupesina o le talalelei o lo’o fa’anōnōmanū pea ina ia so’o fau le finagalo o le Atua ma le tagata. Ia o’o mai lona Mālō, ia faia lona finagalo mo Samoa.

“Ou te fa’afetai atu i Ta’ita’i o Ekalesia Kerisiano i le atunu’u, aemaise le aufaigaluega totofi a le Atua. Fa’afetai le fai tatalo ma le anapogi, ma le laugaina o le Talalelei i si o tatou atunu’u. O lo tatou tiute fai fa’atasi lea ma si o tatou atunu’u mo le Atua.

“Ou te momoli atu le fa’afetai tele i lau afioga i le Palemia, le Sui Palemia, ma le Kapeneta, ae tainane le Afioga i le Fofoga Fetalai ma Sui Mamalu uma o le Palemene o Samoa. Fa’afetai mo galuega lelei uma sa outou fa’atinoina i lenei tausaga mo le atina’eina o le atunu’u. Fa’amālō le galulue, fa’afetai le fa’apalepale. Ia fa’amanuia le Atua i lo outou faiva.

“Ou te momoli atu fo’i le fa’amālō ma le fa’afetai i lau afioga i le Fa’amasino Sili ma Ali’i ma Tama’ita’i o le Fa’amasinoga ona o lo outou lē fa’alogologo tigā e tali atu i lo outou valā’auina, ina ia malu ma mautū le Tulafono. Fa’amālō le mā’elegā ma le galulue punoua’i.

“E manatua fo’i le sao o Fa’auluululuga ma Aufaigaluega o Matāgaluega ma Fa’alapotopotoga a le Mālō, o Pisinisi ma le Vaega Tumā’oti, i la outou tautua fa’aauau o lo’o fa’atinoina pea i so’o se auala mo le manuia o le atunu’u. Fa’amālō le onosa’i. Fa’afetai le tautua.

“E lē fa’agaloina lau tapuā’iga Samoa le atunu’u pele, i le āfua mai i mauga tetele, se’ia pa’ia mauga iti, i Samoa nei ma atunu’u e mamao. Fa’afetai i lo outou sao tāua i le atina’eina o le atunu’u. Ua outou sasa’a fa’aoti lava le utu a le faimea i so’o se vala ina ia manuia ‘āiga, o nu’u, o ekalesia, o le Mālō, ma le atunu’u. Fa’afetai le faitaulaga mo si o tatou atunu’u, fa’afetai le alofa, fa’amālō le lagolagosua i si o tatou Mālō i so’o se auala, i galuega ma atina’e mo le manuia o Samoa.

“Ou te fa’amālō fo’i i alo ma fanau i lo latou taumafai i a’oa’oga ua fa’ai’uina i lenei tausaga. O outou o le lumana’i o Samoa, Ae ia manatua “O le Mata’u i le Atua o le amataga lea o le poto”. Fa’afetai tele fo’i i ‘ave fu’a mo Samoa ua si’itia ai pea le tulaga o Samoa i fa’agatama ma ta’aloga ‘ese’ese i le Pasefika ma le Lalolagi.

“Samoa e, ua tele lava le alofa o le Atua i la tatou folauga. O le toe ‘upu, ‘aua ne’i mavae lo tatou fiafia i lona malamalama. Auā e lē muta i le ola nei le fa’amoemoe o so’o se Kerisiano. O lo tatou nu’u moni o i lagi lea, o lo’o fa’atali mai ai lo tatou Ali’i o Iesu Keriso, na te liua o tatou tino, e avea ma tino matagofie. O le mea lea, ‘aua le atuatuvale o tatou loto i lu’itau o le olaga nei, auā ua o tatou mautinoa e lē mafai e le oti po’o le ola, po’o agelu, po’o ali’i, po’o e mālolosi, po’o se tasi lava mea na faia, ona fa’ate’aina mai i tatou i le alofa o le Atua, o lo’o iā Keriso Iesu, lo tatou fa’aola.

“E manatua foi i lenei vaitaimi o tatou ta’ita’i ma le Mamalu o le Atunu’u o lo’o feagai ma gasegase, ma mafatiaga ‘ese’ese. Ia outou maua le fa’amafanafanaga ma le fa’amalologa mai le Atua.

“Ia manuia tele le fa’amanatuina o le soifua mai o Iesu le Perenise o le Fīlēmū i le Aso Kerisimasi o lenei tausaga 2023

“Soifua ma ia manuia.”

 Faasalalauga Tāua

Vacancy

Other Notices


Tusiga Taofiga