FAAMANUIAGA A LE AFIOGA I LE AO MAMALU O LE MALO – TUIMALEALIIFANO VAALETO’A SUALAUVI II MO LE KERISIMASI 2021
Lau afioga i le Sui o le Fono a Sui Tofia
Lau afioga i le Tamaitai Palemia ma lau Kapeneta, faapea Sui Minisita
Lau afioga i le Faamasino Sili ma le Vasega o le Faamasinoga
Lau afioga i le Fofoga Fetalai ma Sui Mamalu o le Palemene
Le Paia o le Aufaigaluega totofi a le Atua
Sui o Malo mai Fafo
Le faafofogaaga a Samoa mai ona atululuga seia oo atu i ona papa tuloto.
O paia aua Tama ma o latou Aiga, Aiga ma a latou tama, Tumua ma Pule, Ituau ma Alataua, Aiga i le Tai ma le Vaa o Fonoti. Malo le soifua laulelei.
E faatalofa atu foi i le faafofoga tapuai mai a le faigamalo a Tutuila ma Manu’a. I le afio o le Afioga i le Kovana sili, le Kovana Lutena, ma le Tafatolu o le Faigamalo a Amerika Samoa. O paia aua Sua ma le Vaifanua, Fofo ma Aitulagi, Saole ma le Launiu saelua, faapea le Laau na Amotasi. Afifio Faatui, Tootoo o le Faleula, ma upu i le Manuatele.
E ofo alofa atu i le paia ma le mamalu maualuga o Samoa le atunuu pele, o lo’o faafofoga tapuai mai, e le gata i Samoa nei, ae faapea atunuu e mamao. Faamalo le folau manuia, faafetai le faatoatoa.
O le asō, ua talaleomalie, ma logo i matagofie lo tatou taunuu manuia mai, i le faamanatuina o le Kerisimasi o lenei tausaga. I le 2021 tausaga taluai, na molimauina ai e le lalolagi atoa, le faataunuuina o valoaga a le au perofeta, ina ua finagalo le Atua, e afio mai i le paneta lenei. O ia lava o le Lokou na afio mai e ala i a Iesu Keriso, e mau faatasi ma ona tagata. O le asō, na fanau ai le Tupu o Tupu, ma le Alii o Alii i Peteleema, o Ia o le Mamalu atoatoa o le Atua, o le ulumatua o mea uma, o le Perenise o le lagi. O le viiga i mea aopito aluga, ma le filemu ua oo mai i le lalolagi.
E le mavae le agaga faafetai i le Atua, aua o lea ua tuta fiafia i fanua le tatou folauga sa taupale ma le lā. A toe tepa i le tatou malaga talu mai Ianuari o lenei tausaga, tatou te maofa i le tele o lona alofa tunoa. A o ai ea le tagata ua ia manatu mai ai? ma le atalii o le tagata ua ia asiasi mai ai? Se a ea so tatou lelei ua mafua ai lenei alofa ina ā tele? Samoa e, o lo tatou ola, ua na o se puao e aliali mai i se ituaso. Peitai o la tatou faafetai, ma le viiga e tuuina atu i le Atua, e sula ai lona alofa, aua o Ia o loo faamatua i tumu i lenei folauga.
E momoli lau faafetai i Taitai o Ekalesia, faapea le aufaigaluega totofi a le Atua o loo talafaauto i le atunuu atoa. Faafetai le moli talosaga, faamalo le nono manū. O lo outou toele i le Atua i le ao ma le po mo le atunuu e ala i lo outou faiva faaositaulaga, ua a’e malo ai le faatamasoaliiga a Samoa ma lana faigamalo i lenei tausaga. O le a le lagisoifua o lenei mau? A lea o loo folau pea le atunuu i le laula’i o manū, ma le fanā o lona filemu. Faafetai tele le faitatalo.
E momoli atu le faamalo i lau afioga i le Tamaitai Palemia ma lau Kapeneta, i lo outou tulai mai i le foe, e faatautai le sa o Samoa i lenei paeaiga. E ui i fatia ua alu i mataupu na tulai mai i vaega faaupufai, a o lea ua te’a taisousou, ma ua togo malama i lo outou faiva malō. Ia tului mai lagī lo outou soifua laulelei, aemaise le poto ma le faaaliga mai le Nofoalii o le alofa tunoa, e taitai ai le sa o Samoa i le manuia, ma le to’a filemu. Ia faamanuia le Atua i lo outou tulai mai.
Lau afioga i le Fofoga Fetalai ma Sui mamalu uma o le Palemene o Samoa, faamalo le soa, faafetai le pale i le lipoiina o upufai o malo. E tutupu pea matagi i liu o va’a. O aso e folau e ai i le malū, ma aso e taili ai le matagi toga. O luitau ia o le soifuaga e feagai pea ma soo se taitai. O la’u tatalo, ia fusi pea i fau o malo, ae lautua i le alofa lo outou faiva.
E momoli atu foi le faamalo i lau afioga i le Faamasino Sili ma alii ma tamaitai o le Faamasinoga mamalu a Samoa. Faafetai tele le galulue ma le tautua atunuu. Ia tutaumua pea le Atua i la outou galuega, ma lo outou faiva, aua le faamasinoga mamalu a Samoa.
Le atunuu peleina, e afua mai i le saofaiga mamalu a Alii ma Faipule, Saoao ma Augafaapae, Faletua ma Tausi, aualuma ma le malosi o Nu’u, faamalo le ta’i, faafetai le taputapua’i. O soo se galuega sa outou faisao ai i taumafaiga uma a le Malo ma a tatou paaga mo le atina’e manuia, le puipuiga ma le saogalemu, le soifua tapuai, ma le nofo fealofani o afioaga ma alalafaga i lenei tausaga atoa, e leai se vala o ‘aua’oa i le silafaga a le Atua. E faapea foi i tupu ma e’e, o aiga ma fanau pele o loo faaauau pea ona alolofa mai i o tatou aiga i Samoa, faafetai tele mo lo outou sao.
O loo tatou folau pea i le vaitau faigata ona o le Koviti 19, ua oia ai soo se tafa o le lalolagi lea lava ua i Samoa nei. Ua sautuafia aafiaga o lo tatou soifuaga faaletagata soifua i nei ona po, ona o le anoanoa’i o faafatiatama’i ua fetuleni faatasi mai. E ono mafai ona fetafeaina ai lo tatou faatuatua ma le talitonuga maumaua’i i le Atua soifua.
Ou te manatua ai le faamalosiau ma upu faalototele a le Perofeta o Sapakuka i lona Mataupu e 3, fuaiupu e 17-18. O lana molimau ola lenei – ‘E ui lava ina lē fuga mai le vine, le mati, ma le olive; ua augapiu foi ni meaai i le fanua. E ui ina faaumatia le lafu mamoe i le lotoā, ma ua leai foi ni povi i le fale povi, ae peitai a’u, ou te olioli lava i le Alii; e tumau pea lo’u fiafia i le Atua, o lo’u faaolataga’.
Samoa e, o le upu moni, e le o tuulafoaina tatou e lo tatou Atua. E ui i le fesouaina o le la tatou folauga i fitā e oo mai, e tumau pea lona alofa tunoa mo i tatou. E le o so tatou nuu tumau lenei, ae i ai le Nuu moni ua maea ona tapena maeaea e le Atua i le lagi, ma ua foaiina fua mo so’o se tasi e tautino ma talitonu o Iesu Keriso, o le Upu a le Atua na liutino tagata. O le mafuaaga lea na olioli ai le au agelu uma, ma fai pesega, e viia le Tama na valoia, ua afio mai e faaola le lalolagi i le Aso Kerisimasi.
Ia tausia ma leoleoina e le Atua le atunuu atoa i lenei vaitau paia o le Kerisimasi, ma ia tatou maua faatasi pea le filemu o Iesu Keriso, o lo tatou Alii ma lo tatou faaola i o tatou aiga, fanau ma le atunuu. Ia manuia le Kerisimasi.
SOIFUA
