Faamanatu mai e le Ofisa o Faigapalota Itu Uma e Faasāina e le Tulafono o Faigapalota

Ua tuuina mai e le Ofisa o Faigapalota se faamanatu tāua ao alu atu le itumalo o Vaimauga 3 e filifili so latou sui faipule mo le Palemene o Samoa.

E pei ona faasalalauina mai e Sui Komesina o Faigapalota, le afioga ia Mulitalo Fetogi Vaai faapea Fuimaono Uili Sio i se lā polokalame na pueina e le WT Media – e iai itu tāua e tatau lava ona māta’itū e le tagata palota, aemaise le au fai palota faapea ma sui tauvā.

O le itu muamua – e tatau lava i ē ua maea ona resitaraina suafa i le lola palota, ona faatino a latou palota (compulsory voting).

E $100 talā le sala e tuuina atu ia i latou uma e lē palota.

“E tatau lava ona faataunuu le faatinoinaina o lau palota.”

Sa saunoa foi Mulitalo i le itū tau taavale, auā e matua’i faasā i le tulafono ona alu atu se sui tauvā poo se isi o lana komiti, e piki pe momoli se tagata palota.

“E te susū lava oe e faatino lau palota, ae faamolole, e lē faatagaina i lalo o le tulafono lou faatalitali ma faapea ane, sei iloga lava e sau se isi e piki a’u faatoa ou alu ou te palota.”

I le itū tau taumafataga, sa faamanatu foi Mulitalo, “E matua’i faasāina le tufa o ni meaai poo ni mea inu, poo ni tupe foi..”

O le fautuaga a le Ofisa, ia tapena lelei sau taumafataga ae e te lei susū atu e faatino lau palota, ma tapena lelei sau fagu vai e te agai atu ma oe.

Saunoa Mulitalo, “O tulafono lava ia e faasa i le taimi ao le’i faia le palota, ma le aso o le faigapalota, faapea foi ma le maea ai ona faatino lau palota.

“Faatoa toe tatala lava pe a oo i le aso e tuuina mai ai le faaiuga o le palota, poo official results.”

O le isi itū tāua e ono molia ai tagata palota faapea sui tauva, “E faasa foi ona iai se sui tauva i totonu o le falepalota pe talanoa foi se sui tauva i tagata e vaavaaia palota. E faapena foi i le sui palota – e faasa ona talanoa i tagata o loo tofia e vaavaaia palota.”

“Ma e oo foi i sui tauva e faasa ona tuuina atu ni tupe poo le (bribe).”

“E faasa foi telefoni ona susu atu ma se tagata palota i le vaega o loo faatino ai palota.”

O le isi itu i tinā ma tamā matutua pe afai e le mafai ona oo mai i totonu o falepalota e faatino a latou palota, o le a iai le auaunaga a le tatou Ofisa e mafai ai ona oo atu i fafo e faatino palota a nai tagata matutua.

“Elderly voters can request assistance of polling officials.”

Ae nonofo pea i latou i totonu o taavale.

Manuia tele le alo atu o Vaimauga 3 mo le latou Palota Laititi.

(2)