Tusia: Pesetā Tusiga Taofiga, Gvt Press. O le po o le Aso Tofi 10 Iulai, na fa’amanatuina ai i Samoa nei, le aulia manuia e le Malo Tele o Amerika o le 249 o lona Tuto’atasi talu mai le tausaga 1776.
E le gata i lea, ae ua fa’amanatuina ai fo’i ma le 54 tausaga o le so’otaga mafanafana fa’avāomālō o Samoa ma Amerika, e ala i le fefa’asoaa’i o tu ma aga tausili fa’atemokalasi, o le tausia o le fīlēmū, puipuiga o tuāoi fa’avāomālō, ma le tatala o avanoa tutusa mo tagata uma i so’o se auaunaga.
Na fa’afetaia e le afioga i le Palemia o Samoa iā Fiame Naomi Mataafa, le galulue fa’atasi ma le fesoasoani malosi o Amerika i si o tatou atunu’u i so’o se auaunaga.
E pine fa’amau i lea agalelei, le fa’aauau pea o le faigāpa’aga a Mālō e lua, e ala i le sao o Amerika i le fatu o a’oa’oga i Samoa. E o’o mai i le asō o lo’o fa’aauau pea le auina mai o Pisikoa Amerika mo a’oa’oga o le Gagana Peretania ma isi matā’upu i ā’oga i nu’u i tua i Upolu ma Savai’i.
O le vaiaso fou o le ā taunu’u mai ai i fanua le isi aumalaga fou o Pisikoa Amerika e to’a 23 mo la latou tautua i le atunu’u.
O le isi fesoasoani a Amerika, e aofia ai le puipuiga o tatou tuāoi fa’avāomālō aemaise o ogāsami o Samoa e ono fagota fa’asolitulafono e nisi, ma e matuā mata’itū lelei e fuāva’a a Amerika pe ā tatou mana’omia la latou fesoasoni.
O le tatala lea o le avanoa mo a’oa’oga i tomai fa’apitoa tau le puipuiga ma le saogālēmū, e ala atu i le Matāgaluega o Leoleo, Falepuipui ma le Ola Toe Fuatā’ina auā leoleo Samoa.
O le isi pine fa’amau o le maua’a pea o le so’otaga o atunu’u e lua, e aofia ai le fa’aopoopoina o le aufaigaluega galulue mo le Ofisa o le Amapasa o Amerika i Samoa nei talu mai le tausaga ua mavae.
O le ta’imua lea o Amerika i le Polokalame o le Soifua Manuia mo le soifua mālōlōina o tagata Samoa, e le gata o a’oa’oga fa’apitoa mo foma’i ma tausi soifua a’o le malaga mai fo’i o foma’i ma tausi soifua Amerika mo le galuega fesoasoani i siaki fa’afoma’i mo nai o tatou tagatānu’u.
O le tasi o itu tāua o lenei faigāpa’aga mafana, o avanoa sikolasipi mo nai a tatou fanau e fa’alautele ai lo latou silafia i matātā o lo’o i ai o latou tomai fa’apitoa auā sā’iliga manuia ma le fa’alagolagomaga o le atunu’u i lona atina’e ma lona tamāo’āiga.
Momoli le fa’afetai fa’apitoa a le afioga i le Palemia iā Fiame Naomi Mataafa i le Sui o Amerika o lo’o galue i Samoa nei le Chargé d’Affaires iā Daniel Tarapacki i le fa’aauau pea o le galulue fa’atasi o atunu’u e lua.
O le Palemia ma le Sui o Amerika i Samoa nei iā Tarapacki, na alaluaina le keke o le Aso Soifua o Amerika i lenei tausaga.
O lenei sauniga fa’apitoa, na auai ai Lana Afioga i le Ao Mamalu o le Mālō o Samoa iā Tuimaleali’ifano Va’aletoa Suālauvī II ma lana Masiofo, Sui o le Fono a Sui Tofia le Susuga iā Malietoa Molī II, Sui o Mālō mai Fafo, Fa’auluuluga o Matāgaluega ma Pisinisi Tumā’oti a le Mālō, Sui o Pisinisi Tumā’oti i le atunu’u fa’apea nisi o le auvalā’aulia e aofia ai tagatānu’u o Amerika fa’apea Samoa nei.
Ata Pu’eina: Pesetā Tusiga Taofiga
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
