6 Setema 2022 Apia Samoa. O le taeao nei sa maitauina ai le taimi muamua i le tala faasolopito o Samoa le faamanatuina lea o le tutoatasi o le atunuu i le motu tele i Salafai.
Na molimauina le auai ai o le Palemia le afioga Fiame Naomi Mataafa, faapea minisita o le kapeneta, o minisita lagolago faapea faipule o le maota fono.
Aa auai ai foi le tamaitai Faamasino Sinia le afioga Niava Mata Tuatagaloa, le Peresetene o le Faamasinoga o Fanua ma Suafa, Fepulea’i Otila Ropati, faapea faauluuluga o Matagaluega a le Malo.
Na auai ai foi ma le mamalu o le au valaaulia faapitoa; le Komesina o Sulufaiga a Niu Sila, Misa Peter, faapea le Kovana a le Malo Niu Sila, Dave Sydney, aemaise lana Afioga le Ao Mamalu o le Malo, Tuimalealifano Vaaleto’a Sualauvi II ma lana masiofo.
Na tomua le sauniga lotu ona sosoo lea ma le saunoaga autu a le tamaitai Palemia, ona sisi lea o le tagavai o le atunuu.
Na sosoo ai ma savali faa’aloalo a aoga, o faalapotopotoga, atagaluega a le Malo faapea nisi o Komiti Tumama a tinā.
O le maea o savali, na alo mai ai lea o le faili pu a leoleo mo le latou faafiafiaga, sosoo mai ai lea o le autalavou EFKS i Iva, ae taualuga i le faafiafiaga a le kolisi o matata eseese, Don Bosco.
Na saunoa le Sui Palemia le afioga Tuala Tevaga Ponifasio e faamatafi ai le aso, ona saunia lea e le Taitai o le Sauniga le tatalo faaiu ma lulu lima ai ma faatofa.
Na toatele nisi o le atunuu na toe taliu mai i Upolu ae mo le Kapeneta, faatoa malaga mai i le aso a taeao i le maea ai o le fonotaga a le kapeneta o le a faatautaia i le motu tele i Salafai.
