Faamalosi’au le Minisita o le Soifua Maloloina i lana Matagaluega”

0
196

OFISA OLE SOOUPU – Na laualuga i le saunoaga a le Afioga ia Faimalotoa Kika Stowers o ia foi o le Minisita o le Soifua Maloloina le galulue faatasi lea o le Matagaluega e siitia le auaunaga e ofoina atu i le atunuu.

E pei ona silafia le toe feetuuna’i ai lea o muniao i tofiga a nisi o Minisita o le Kapeneta i auaunaga ma a latou matafaioi tauave lea ua see atu ai le Afioga ia Faimalotoa e avea ma Minisita o le Soifua Maloloina.

Saunoa Faimalotoa; “Ou te faafetai i le Atua ona o a’u, na tou te silafia e le o a’u o se foma’i, e le o a’u foi o se tausi soifua, masalo foi ua outou faapea; ia o fea o le a alu i ai le la loomatua e na te leiloa se mea”.

“Ae ou te talitonu o outou o polofesa o le galuega, ae a tatou galulue faatasi, tufa , faasoa ma soalaupule e mafai ona tatou fulia mauga, o le tatou manulauti o le tatou vaai taula’i i le soifua maloloina o le atunuu ma nai o tatou tagata o loo faalagolago mai, faagalo mea uma ae tatou galulue faatasi.”

“O la tatou galuega o outou e faatino le tatou auaunaga, o la’u galuega ma le Minisita Lagolago, Ofisa Sili ma Ta’ita’i o le tatou Matagaluega o le nonofo i lalo tufa ma faasoa.”

“Matou te mana’omia o outou leo, o outou lagona e tele le oa ma le tamaoaiga e mafai ona tatou fau faatasi ni auala tatou te savavali faatasi ai ina ia manuia le tatou taumafaiga mo Samoa o loo faatali mai.”

“E leai se isi e fiafia i le auaunaga a le soifua maloloina pe a fai e faaletonu le aufaigaluega e muamua e te taunuu mai i ai. A ou sau ou te ma’i, ua ou tigaina ua ou fia maua se fesoasoani, pau lo’u faamoemoe o le tagata lea o le a muamua mai, ae a ou sau ae le fiafia mai ma ota taoto faagaulua e pei ona ou vaai ai i le tele o taimi, a’o la e tami ane i o fai mai o le galuega a le sifi la o le a sosoo mai a’o lea o le a ou alu.”

“Afai o le a le afaina o le soifua, sa ou faaopoopo i le aveesea o le soifua o le tagata lea ona ou te le’i ofoina atu la’u fesoasoani i le taimi na taunuu ai ma ou fia maua le ola mai o outou aao, o la’u na maitau i le taimi ou te savali mai ai i totonu o le falema’i, ma o le maitau na a le tele o atunuu.”

“E tatau lava ona tatou gagana i le faamaoni ma ta’utino o loo i ai faafitauli i le faatinoga o a tatou auaunaga, e le mafai ona foia i se aso se tasi.”

“Mo le faamoemoe la ia faaleleia ma atina’e le faatinoga o auaunaga a le soifua maloloina i se tulaga tatou te manana’o i ai, ma se tulaga e moomia e o tatou tagata, e mana’o mia lava le i ai o se taiala alualu mamao, faapea ma se fuafuaga faataatia e limata’ita’i ina ai, ma e ao foi ona tatou galulue finafinau ina ia faia suiga ua tatou iloa e lelei mo a tatou galuega faatino, e lelei mo le mamalu o le atunuu o loo vaai maualuga mai ia i tatou.”

Na momoli foi le faafetai a le Afioga ia Faimalotoa i le sa avea muamua ai ma Minisita o le Matagaluega le Afioga Tuitama Talalelei Tuitama, e tusa ai ma galuega lelei i totonu o le Matagaluega e le gata ina avea o se Minisita ae o lana tautua faafoma’i lea e silia ma le limasefulu tausaga o tautua ai mo Samoa.