Faamalosia le Puipuiga o Faamaumauga a le Faamasinoga o Fanua ma Suafa

0
1662

16 Ianuari, 2021 O le fuaiupu 6 o le teuteuga o tulafono o le Faamasinoga o Fanua ma Suafa 2020, ua puipuia ai faila o faamaumauga o gafa ma meatotino a aiga o lo’o i le Faamasinoga mai le aveesea e soo se tagata e aunoa ma se faatagaga mai le Peresitene o le Faamasinoga o Fanua ma Suafa a Samoa.

O lea teuteuga o le tulafono e foliga mai o se tali atu i le mataupu sa tulai mai ia Me o le tausaga 2019, lea na faate’aina ai le Ofisa Sili o Pulega o le Matagaluega o Faamasinoga le Susuga ia Papalii John Taimalelagi, ina ua ia aveesea mai faila mai le ofisa o le Faamasinoga i Mulinuu.

O le a tulaga na mafua ona o le tali atu i se faatonuga sa tuuina mai e le Alii Minisita o Faamasinoga ia Faaolesa Katopau Ainuu, ma faatonuina ai loa e Papalii nisi o le aufaigaluega e auina atu faila nei i le ofisa o le Minisita i le Maota o le Malo i le Eleelefou.

Sa matua faatutu le mamafa o le su’esu’ega a le Ofisa o le Komisi o Tagata Faigaluega a le Malo i le Alii Ofisa Sili, ma tuuina mai ai se pepa moliaga sa faapea mai ai…..
“Ua solia le vaega 19(b) o le tulafono o tagata faigaluega a le malo 2004, i le va o le tausaga 2016 ma le 2017 sa e faatagaina ai le aveesea mai o faila o le Faamasinoga o Fanua ma Suafa i mataupu faatatau i le’Suafa Ainuu-Sapapalii’ ma le ‘Suafa Faumuina o Lepea.’

E ui i le suesuega a le Ofisa o le Komisi o Tagata Faigaluega a le Malo sa faatino ma faaalia manino ai o faila nei na aveesea e faatatau lea i faamasinoga tau fanua ma suafa a le aiga potopoto o le Alii Minisita, peitai sa faaalia mai e le Alii Palemia i lea taimi, e leai se amioga ua le tonu e afua ai se faasalaga e ono tuuina atu i le Alii Minisita o Faamasinoga, ona o lo’o iai le aia tatau i le Alii Minisita e talosagaina ai Faila nei.

O le asõ la, o lea ua faamautu mai ai e teuteuga o le tulafono o le Faamasinoga o Fanua ma Suafa, o faamaumauga nei a le Faamasinoga, o le a faatoa mafai ona aveesea mai i se faatagaga mai le Peresitene o le Faamasinoga o fanua ma Suafa…faaopoopo iai ma tu’utu’uuga faapea…’mo na’o mafuaaga tau faaamasinoga.’

O lona uiga, e le mafai foi e le Peresitene ona soona fai se faaiuga e aveesea atu ai faila.

O le faaupuga lenei o loo iai i le Tulafono o Fanua ma Suafa, Vaege 6 e puipuia ai faamaumauga a le Faamasinoga.

6. Faamaumauga a le Faamasinoga:
(1) E tatau i le Resitara ona teuina po o le taulamua ina
ia teuina faamaumauga o po o e faasino i le
Faamasinoga, ma i taualumaga uma taitasi i luma o
le Faamasinoga, e pei ona manaomia e lenei
Tulafono, po o e pei ona mafai ona faatonuina e
Tulafono Faafoe, po o le Peresetene.

(2) E leai se tagata e tatau ona maua avanoa i
faamaumauga a le Faamasinoga seia vagana ua i ai
faatasi ma le faatagaga a le Peresetene, po o le
Resitara.

(3) E lē mafai e se tagata ona aveesea faamaumauga o po
o e faatatau i le Faamasinoga seia vagana ua tuuina
mai se faatagaga a le Peresetene o le Faamasinoga mo
ni mataupu tau i le faamasinoga.

(4) So o se tagata o ia lea ua na solia le faafuaiupu (3) e
tatau ona noatia i se sala tupe e lē silia le 50 iunite tau
faasalaga po o le nofosala i le falepuipui mo se
vaitaimi e lē silia le tolu (3) tausaga, po o faasalaga
uma e lua.


Maina Vai