Faamalolo Tumau le Tamaitai Faigaluega a le Mr Chicken, Faatoese le Pule Sili

"O le faaletonu i le auaunaga a le aufaigaluega, o se lape fo'i lena i le pulega. O lea e faatoese atu ai iā Samoa, ae maise o le tinā sa aafia. Faamolemole faamagalo mai.."

0
3808

Ua faamaualalo le pulega a le faleaiga o le Mr Chicken i se lape o le auauanaga e pei ona molimauina i ni ata video sa faasalalau faalauaitele i luga o upega tafa’ilagi i le vaiaso na mavae atu nei.

Ua faamaonia mai e le Susuga ia Chu Lei Sam, ua faamalolo tumau e le faleaiga le tamaitai sa tula’i mai ai le vevesi i le va o le aufaigaluega ma se tasi o tina sa agai ane e faatau ma taumafa i le faleaiga.

I se faatalanoaga ma le alii pule sa ia saunoa ai e faamaualalo ma faatoese i le faaletonu na oo iai le auaunaga a le aufaigaluega, ae maise le tamaitai sa lafo ni upu mamafa ma faaali uiga le talafeagai agai i le tinā ma si ana tama sa aafia.

Saunoa le alii pule, “Ou te asu atu vai malu i finagalo a si tina lea na aafia i se auaunaga lē atoatoa aemaise o le maitau mai o le atunuu..

“Ou te faatoese atu ma faamaualalo atu i aiga ma uo faapea le mamalu o le atunuu.”

“Faamolemole, faamagalo mai se sese ma se tautua ua lē tau i la outou silasila..

“Faamolemole, faamagalo mai..”

O le tulai mai o lenei vevesi i le vaiaso ua mavae i totonu o le faleaiga, sa mafua mai i ni uiga faamaualuga o se tasi o le aufaigaluega. Sa faalogoina le lē malolo o upu lafo a lea tamaitai agai i se tina sa faaali lona lē fiafia i le tuai o le auauanaga ma le leva ona faatali o lana oka.

Saunoa le alii pule ia Chu Lei Sam, ua matuai soli e lea tamaitai le va fealoai i le va o le auaunaga ma paaga e oo atu i le faleaiga.

Saunoa Chu Lei Sam, o le auaunaga lelei e moomia i taimi uma, e faatino ai faatau a le mamalu o le atunuu i se gaioiga vave ma le atoatoa.

“A tula’i mai se lape e pei o le tuai o le auaunaga i lena aso, e ao ona faamalulu ma faalalolalo i le mamalu o le atunuu..”

“E lagona lava le faanoanoa ona o upu sa lafoina, ae maise o amioga sa vaaia i ata faasalalau i lea aso..

“O le faaletonu i le auaunaga a le aufaigaluega, o se lape fo’i lena i le pulega. O lea e faatoese atu ai iā Samoa, ae maise o le tinā sa aafia.”

Mo le aga’i i luma ua tā’ua e le pule sili, ua amata aoaoga mo le aufaigaluega a le Mr Chicken i le itu tau Customer Service poo le faatinoga o auaunaga lelei.

O le faleaiga a le Mr Chicken, na amata faatuina i le tausaga 2012 ma ua tolu ona lala i Samoa nei. O le SNPF Plaza, o le lalā i le nofoaga a le Gold Star building, faapea le lala i Vaitele.

E toa 17 le aofai o le aufaigaluega o loo galulue ai i lala nei e tolu ma o le toatele lava o lea aufaigaluega, o tamaitai.

Faasalalauga Taua mai le Samoa Business Hub