Faamuta e le Kapeneta le Auaunaga a se Sui Ofisa Sili o le Matagaluega o Soifua Maloloina

0
7346

Ua faamaonia mai e le Minisita o Soifua Maloloina le afioga Valasi Tafito Luapitofanua Selesele, le faamuta pe faamalolo ai lea o le sa avea ma Sui Ofisa Sili (ACEO) le susuga ia Agnes Stowers.

O le Faaiuga a le Kapeneta na fua lea i luga o se fautuaga a le Komisi e Pulea Tagata Faigaluega a le Malo, le PSC.

Saunoa Valasi, “e iai le isi vaega o le fautuaga o le a iloiloina e le kapeneta, ona o le maitau iai e iai nisi o mataupu faapea e tuuina mai ai e le PSC le faasalaga, tai pei o se tasi o tagata faigaluega a le Custom poo le Tiute lea na faasala i le $1000..”

Saunoa foi le Minisita, “o le vaavaai a le Kapeneta e iai vaega ogaoga o loo tuua’ia ai le Sui Ofisa Sili i ni tupe se tele..”

“O lea foi e manino faamaoniga o mau e tusa ma suesuega a le PSC..

“O le manatu la lea, afai e tele se tupe o loo aafia ai, pe le talafeagai loa ona tuuina atu i leoleo o loo gafa ma soligatulafono..”

Sa saunoa manino lana afioga i le Minisita, o le fonotaga a le Kapeneta o loo loma nei, o le a talanoaina ai se vaega mulimuli o loo tuuina mai i le faaiuga a le PSC.. “ae o le tulaga manino lava, ua le toe talia e galue i le Matagaluega.”

O le tamaitai o Agnes Stowers o loo tuuaia i lona faia o ni auala faa’alatua i taimi e tufa ai galuega a le Matagaluega o Soifua Maloloina.

O loo tuuaia le lē faamaoni ona faatino auala o tauofoga mo auaunaga moomia e le Matagaluega, ma seleni o loo faaogaina ai.

Ina ua alia’e i luga lea mataupu na tuuina atu ai se tusi faamavae a le ACEO ia Agnes Stowers i le PSC ona ua aafia tele o ia i tuuaiga o loo ia tetee iai.

Peitai, e lei taliaina lana tusi faamavae, ae sa faasolo lava suesuega i lenei mataupu e faasaga ia te ia.

Sa taumafai atu lava le SGN i  fesootaiga masani ina ia mafai ai ona tuuina mai se tali a le susuga ia Agnes Stowers e tusa ma le faaiuga ae maise o tuuaiga e faasaga ia te ia.