Faamalolo se Alii Leoleo Satini ao Faagasolo Suesuega a Leoleo

0
191
Sui Komesina o Leoleo Papalii Monalisa Tiai-Keti.

O loo iai ni tuuaiga matuia faasaga i se tasi o alii Satini a le Matagaluega o Leoleo, lea ua faamalolo nei ao faagasolo suesuega o le mataupu.

O se molimau mai i totonu o le Matagaluega o Leoleo ua faapea mai, o se tagi sa faaulu atu e se tamaitai leoleo, 21 tausaga, o loo ia tuuaia ai le Satini i le faamalosi o ia.

“O le tagi a lea tamaitai leoleo, e faapea sa faia e le Satini ni uiga mataga tau faiaiga fai faamalosi.”

Ua faamaonia mai e le Sui Komesina o Leoleo le afioga iā Papalii Monalisa Tiai-Keti, o loo faamalolo se Satini, ao faagasolo suesuega i se tuuaiga o loo faasaga ia te ia.

Peitai e le’i faamautu mai e Papalii poo a tonu vaega e pei ona tā’ua e le molimau, ae nā o le faapea mai, o loo faamalolo o ia, ae o loo faia suesuega.

O le tausaga nei sa lipotia ai fo’i se alii leoleo Inspector ua savalia le 15 tausaga o lana tautua i le Matagaluega, o loo molia o ia i luma o le Faamasinoga i moliaga lava tau feusuaiga (sexual assault).

O le tamaitai leoleo o loo aafia, e faapea e na o le 21 tausaga ae e le’i leva fo’i ona galue ma tautua i totonu o le Matagaluega ao lea ua tula’i mai ai le faaletonu.