Ua ave le faamalo a le taitai o le itu agai Tuilaepa Sailele Malielegaoi i le afioga i le Palemia mo le tofā na faia ai suiga ua toe faatulaga ma fetuunai ai tofiga a le kapeneta o Samoa.
O le Aso Lulu i le maea ai o le fonotaga a le Kapeneta sa fofogaina ai e le Palemia Hon Fiame Naomi Mata’afa suiga i tofiga o le Kapeneta lea ua faaopoopoina ai Minisita e toalua, ma le Matagaluega fou o Taaloga.
Ua filifilia Lautimuia Uelese Vaai, e avea ma Minisita o Tupe, ae see atu le afioga ia Mulipola Anarosa Ale Molioo i le Matagaluega o Tina ma Tamaitai.
Saunoa ai le taitai o le itu agai, “O Lautimuia o se tagata sa galue i le SSS, ae o se tagata e tele lona tomai i mea tau tupe, ua fetaui lelei foi le suiga, ma o se itu lelei tele foi.”
Saunoa Tuilaepa, “E na o Fiame e malamalama lelei i le tulaga ma le mafuaaga e faatino ai se suiga faapea, ma o le tiute lena o se Palemia, e mataala i vaega e ao ona faia iai se suiga poo le faatūmauina.”
“Ou te taliaina foi le suiga lea ua agai mai ai Mulipola Anarosa i le matagaluega o le poloketi, aua o ia lea sa ia faasoaina mai seleni o le miliona.”
E lagolagoina foi e le taitai o le itu agai le tulaga o suiga o le faasee atu o le Pulega o Tagata Maimoa mai Fafo (STA) i le vaavaaiga a le Palemia.
“Aua o le fatu lea o le tamaoaiga le atunuu o turisi..”
Na faailoa e Tuilaepa, sa faia foi e le latou faigamalo le HRPP suiga faapea ona e tatau lava ona iai se fetuunaiga pe afai e matau le taitai, e iai lava vaega e ono moomia ai se suiga.
“O le fuainumera e toaiva o minisita o le kapeneta sa amata mai ai, peitai, o le tausaga 1991, na toe faatino ai le suiga na faaopoopo ai isi minisita fou ma maua ai le fuainumera e 12 i le taimi ao Palemia Tofilau Eti Alesana..”
“Ae o lou tulai mai na toe faaopoopo ai isi minisita fou ma maua ai le aofaiga o minisita le 15. O le aso 15 Setema 2020 na faia ai le faaopopooga. Sa fua la’u matau i lena taimi, ina ua tupu ma televavave le tamaoaiga o le atunuu.”
Read in English Here.
