Faamanino Itu Uma e uiga i Galuega a Seila Samoa

0
685
Seila Samoa, PC: SSS Website

 

O le fa’amuamua a le Faalapotopotoga o Auaunaga o Va’a o Samoa (Samoa Shipping Services) ma le Malo o Samoa, o le saogalemu o alo ma fanau ia o lo’o faigaluega i luga o va’a  i atunu’u i fafo i le taimi nei, ia lelei le tausiga ma ia aua nei tulai mai ai se faalavelave pe aafia foi i le ogaoga o le faamai o loo pepesi nei i le lalolagi.

O le saunoaga lea a le Ofisa Sili o Pulega o le Faalapotopotoga o Auaunaga o Va’a a Samoa le Afioga ia Lautimuia Afoa Uelese Vaai i se faatalanoaga i le amataga o le vaiaso nei.

Afioga ia Lautimuia Afoa Uelese Vaai

Sa faailoa o le taimi nei, o loo iai lava Cruise Ships la e feoai, ae na’o totonu lava o Europa, ma e tusa ma le 321 alo ma fanau a Samoa o loo iai a latou konakarate i ia va’a. E taofia mai nei femalagaiga, o loo silia i le 200 seila Samoa o loo i luga o vas.

E 35 ua maea konekarate, ma o latou ia lea s talosagaina e le Kamupani Vaa a Samoa (SSS) le tausia pea i luga o vaa, sei oo i se taimi e tatala so tapu o atunuu o loo aafia, ona toe aumai lea o tatou tama fanau.

Saunoa Lautimuia, “Sa silasila lava lo tatou malo aemaise o la tatou kamupani vaa, i le tulaga fo’i lea o le option sili lea ona saogalemu, o le tu’u ai luga o va’a e tausi ai, nai lo le omai lea i malavaalele, taofia ai aemise o atunuu ia lea e malosi le pepesi tele ai le faamai. Aemaise le tulaga fo’i lea o le leai o nisi e tua iai, aua o atunuu ia Europa ma Asia o atunuu ia e ui mai ai a tatou seila”.

E 64 seila Samoa o loo faigaluega i luga o va’a la’u oloa, ma o le taimi nei o loo faigaluega uma lava i latou ia, aua e loo faaauau pea lena auaunaga.

E 12 seila Samoa o loo iai i luga o le vaa laupasese a le kamupani o le MSC le  Armonia, e toatolu o lo’o galulue pea i le taimi nei, o isi o lea numera ua maea konekarate ma o loo tausi ai pea i luga o lea va’a, e aofia ai ma Taulapapa Pao Sa’ale lea sa faalauiloa mai lana talosaga i luga o le social media.

“E iai fo’i isi tama la e faigaluega pei e partime, e fua i le manaomia, e fua i le valaau mai o le kapeteni (call in) aemaise i le maintenance o le va’a. O latou taimi la ia e faigaluega ai o loo maua ai a latou seleni, ae o si vaega lea ua maea konekarate o le tala mautinoa lava ia e lē o toe maua se totogi. O lona uiga o le 35 lea ua maea konekarate ua le’o toe iai se tupe o maua, aua ua le’o toe faigaluega”.

Faafitauli

Na laga le mataupu lenei ina ua silasila le lalolagi i le ata video ua pu’eina e le Afioga Taulapapa Pao Sa’ale, ma le aioi mai i se fesoasoani a lo tatou atunuu i lo latou faafitauli, ua fia fo’i mai i Samoa nei. Sa faailoa fo’i e lea tamalii le tusi sa tuuina atu e le Samoa Shipping Services, ma faauiga faapea ua tuulafoaiina i latou ma le mananao e fo’i mai.

Ina ua fesiligia le Pule Sili o le faalapotopotoga, sa ia faapea mai o le naunautaiga lava o i latou ia o le fia fo’i mai, peitai o lea ua maea faamalamalama atu iai e le Faalapotopotoga le tulaga o loo ua iai i le taimi nei ma le tapunia ai o atunuu.

“E leai se tusi sa tu’uina atu faapea, ma e leai fo’i se faamatalaga e faapea ua mumusu e faafo’i mai i latou nei. O talanoaga uma lava sa faatino ma i latou nei i luga o le Chat Group a le faalapotopotoga, o iina sa faailoa ma faamalamalama ai ia i latou nei le tulaga lea e tupu”.

Na saunoa fo’i Lautimuia, o Taulapapa e lei atoa le 2 masina talu ona malaga atu, ae tulai mai ai loa se faalavelave sa tupu mai i luga o le vaa lea o le Armonia lea sa galue ai.

“O le susuga ia Taulapapa, faatoa malaga atu ia Ianuari e amata ai lana konekarate, ae poo se mea o Fepuari poo Mati, na aumai ai le ripoti mai le kamupani ua iai le faalavelave ua tupu i luga o le va’a. Ua faao’olima le Susuga Taulapapa Pao i le Posini, poo le supervisor – o le leading hand lea i luga o le va’a, o le Posini Italia.

Na faia le faaiuga a le Kapeteni, o le a faamuta le auaunaga a Taulapapa ae sei faia le suesuega, e maea ane la le suesuega lea, ma faamaonia ai le faaoolima a Taulapapa, ae lockdown loa ma malaevaalele, ma atunuu i le faamai.”

Na taua fo’i e le Pule Sili e le na’o le pau lea o se faafitauli na tulai mai, e maea atu le faalavelave lea na faaoolima ai Taulapapa, ae tulai mai foi le isi faafitauli sa ripoti mai foi e faapea, ua fufusu ni seila se toalua i luga o le va’a.

“Ua fufusu, ua tauaimisa lava seila a tatou lava ia i luga o le vaa lea, faaoolima ai loa le isi a tatou seila i le isi foi seila lava a tatou, sei tulou, ua tui i le naifi le tauau.”

Ua tuuina atu le alii na faao’olima i leoleo a Miami Florida ma o lo’o taofia ai nei i le Customs Corrections seia tatala malaevaalele ma atunuu ona aumai lea.

O lenei faafitauli, sa aumai ai loa ma le faatonuga a le Kapeteni o lea va’a, ina ia aveese uma seila Samoa lea e i luga o le vaa lea o le Amornia, aua ua le saogalemu ai le va’a.

Na taua e Lautimuia e tupu mai lea faafitauli ogaoga, ua lockdown le tele o atunuu o le lalolagi.

“Sa toe talosaga atu tatou i le Kamupani ia faao’o atu i le Kapeteni, e alofa, tausi ai pea tatou seila ia i luga o le va’a leaga o lea ua lockdown, ae sei maea, ona toe fo’i mai lea;

“Sa fesootai foi la i uso matutua ia o loo i luga o le va’a lea ia alolofa e faatoafilemu mataupu i faafitauli ma faalavelave”.

Sa tā’ua foi e lei iai faatasi se faafitauli tulai mai i seila o loo galueina vaa lau iloa, ae na o i latou i luga o vaa la’u pasese.

Ua maitauina le faaleo mai o ni popolega o le toalua o le seila o loo taofia e leoleo, faapea le toalua o Taulapapa. Ua tulai mai foi le SSIG e unaia le Malo e toe faafoi mai seila, e tusa ma le video aioi mai a Taulapapa. O loo iai foi se video a King Faipopo i lenei lava mataupu.

Taimi vave e toe faafoi mai ai

E lē o manao le SSS e toe tupu mai le tulaga lea sa o’o i le isi seila Samoa lea na uma lana konekarate agai mai loa e sau i Samoa nei. E oo mai i Dubai ae tapuni loa ma Niu Sila lea na tuu e transit ai, ona poloka loa lea i le malaevaalele i Dubai.

“Sa fesootai atu lo tatou ofisa i la tatou lala lena e i Dubai, ma tapena ai le avanoa na nofo ai lea alii i le Hotel, peitai, sa fesootai mai lava le tatou seila lea o ia ua le lavā nofo na’o ia.

O le tonu na fai o le meli laupasese na sau mai Italia fuafua mo Miami, na toe liliu a le meli alu piki mai le seila lea. O  loo iai nei la faatasi ai ma a tatou seila ia e tausi e le kamupani vaa o le MSC le  Armonia”.

Ua faailoa o mea ia e tilotilo iai i le saogalemu, ona e le o nonofo taitoatasi o la e toatele latou o loo iai faatasi, lelei tausiga i meaai, ma sefe potu o loo nonofo ai.

Na taua e Lautimuia e tele itu sa tagai iai le Malo faapea le Faalapotopotoga o Auaunaga o Vaa a le atunuu, ona o nisi fo’i o lo tatou atunuu o loo iai i le tulaga lava lea e tasi i atunuu i fafo, o loo taofia uma lava i le tapu lea.

“Na pau lava le itu sa tilotilo iai o le mautinoa o la e saogalemu le nofoaga o loo nonofo ai ma tausi lelei – o le itu lena o lea e ave iai le faamuamua”.

Sa tā’ua e le Pule Sili o loo fesootai lava i aso uma i le kamupani, a uma ona fesootai atu lea i tatou seila e aumai ai le faamaoniga o la e lelei le tausiga o latou.

Toe Manuia Uma Seila na Aafia i le KOVITI19

Ua faamaonia e toalima lava seila Samoa sa aafia i le faama’i, ma na taua e lei malolo le fesootai atu iai a le Faalapotopotoga.

“O si atalii lea na maua muamua, sa maua loa ma faamaonia isolate loa, ma sa faaoga le isi fogafale atoa lava o le va’a e isolate ai i latou ua maua i le faamai lea, ae faafetaia le alofa o le Atua, o le ripoti lava ia a seila, e leai ma se suiga o la latou faalogo, pau le tulaga ua avatu a latou test ua positive, sa faia lava siaki ma togafitiga, ma ua toe recover uma, o le toalima la lea o la ua toe faigaluega uma lava”

Aafiaga o le  Lumanai

O le popolega tele i le SSS, e silia i le 200 alo ma fanau a Samoa o loo faatalitali avanoa mo galuega i luga o vaa nei i atunuu i fafo.

Saunoa Lautimuia, e lē o malolo foi le aoaoina o a tatou alo ma fanau i le aoga a le Marine i tausaga uma, ma e i’u mai lava le toatele i tausaga taitasi.

E aafia ai avanoa mo isi sella Samoa pe afai e le mafai ona faaitiitia faafitauli tulai mai, ae maise lava i va’a laupasese.

“O le itu la lea o loo tilotilo atu iai o va’a la’u oloa. O lea e vaai atu e sefe va’a la’uoloa, ae manatua foi e ese seamen skills e manaomia i luga o le vaa laupasese ma seamen skills e manaomia i luga o vaa la’uoloa. O le tilotilo mamao la e tatau ona aoaoina o tatou alo ma fanau ia, focus lava i skills i luga o vaa la’uoloa, aua o lea e pepesi le faama’i, ae o loo feoai lava va’a la’u oloa;

“E itiiti foi le tulaga lamatia o le soifua aua e le’o feoai ai ni tagata, na’o le la’uina o oloa, ae a taunuu foi i atunuu ia e ave iai oloa, e le õ i lalo le auvaa na’o le la’u lava o oloa”.

O le faamaoniga o le 64 tama Samoa ia o loo faigaluega i vaa la’uoloa i le taimi nei, e leai se isi ua maua i se faamai ma o loo faigaluega lava e oo mai i le taimi nei.

O le tulaga i va’a fagota na taua e Lautimuia e ui ina tele avanoa i vaa fagota, e lē o toe iai se seila Samoa i luga o se vaafagota i le taimi nei.

E tele faafitauli e tulai mai ai, ona o tausaga o nai fanau e iu mai i aoga e i le va o le 21-30 tausaga ma o le tele o tamaiti, e lē atoa se masina i luga o vaa fagota ae vili mai fanau nei ia te ia, ua toe fia omai.

O le faalavelave na taua ona e eseese working conditions i luga o vaa fagota ma vaa laupasese…o le upu faaperetania e unfriendly pe faigata tele itu eseese i le galuega.

Ua taua foi o loo iai avanoa i luga o vaafagota i le taimi nei, peitai o tulaga ia e faaeteete iai le Faalapotopotoga ona ua fai lava ma faasea mai kamupani vaa fagota ma faailoa mai, poo fea se ogasami mamao ua oo iai, ae tagitagi le tatou tama lea sa i luga o le va’a e toe fia sau.

“Ia o le mea e fai o le afe ane i se atunuu e pu’e ai iina se vaalele e toe faafo’i mai ai.”

O loo tilotilo la le SSS ma Kamupani nei i se tulaga e ao ona screen lelei ai tama poo ai tonu lava e fetaui ma mafai ona onosaia tulaga uma o le galuega.

Photo Credits: SSS Website.

Seila Samoa, PC: SSS Website

Maina Vai