Lau Afioga i le Fofoga Fetalai faapea foi le mamalu o le Maota nei, tainane foi le faafogafoga mai a le mamalu o le tatou atunuu.
Ou te taofi ua tatau ma onomea ona ou tula’i atu, e avea ai a’u ma sui e faia se faamaisega mai totonu o le Palemene lenei o Samoa, e leai nisi o toe ‘aisilĩ; o Ta’ita’i nei o Samoa ma lana Fono usu, e ao ai ona avea tatou uma, ma sui o Ta’ita’i o le atunuu, auã le tapuaiga a Aiga ma a latou Tama, o Tama foi ma Aiga, tainane Tumua ma Pule, Ituau ma Alataua, Aiga i le Tai ma le Vaa o Fonoti, ae a le tapuaiga ma le faanoanoagãmanū a Auauna o le Talalelei o loo talafaauto i le tauasuina o le ipuvai o le soifua faaleagaga o tagata o Samoa.
O paia foi faa-le-malo, auã le Afio o le Ao Mamalu o le Malo, le Sui o le Fono Suitofia, le Faamasino Sili ma le Faamasinoga, o paia ia o Samoa o lea ua tatau ai ona avea ai a’u ma sui o tatou uma e momoli le faamaisega i le Ta’ita’i o Niu Sila ma tagatanuu uma o Niu Sili ona o le tagatavaleina o le 50 o i latou na maliliu ia faapea foi ma i latou na manunu’a ona o ni faufauga a i latou, le moemoenoa ma le laufa lế ‘ainã.
O le tagatavaleina o i latou na maliliu faapea foi i latou na manunu’a, o le tã lava lea iã Samoa ma atunuu uma o le Pasefika o loo i totonu o le li’o o le Fono a Malo o le Pasefika (Pacific Islands Forum), o loo tatou galulue faatasi mo le tulaga o le saogalemu o tatou tagatanuu uma, aemaise o le atunuu lenei o loo tumutumu ai ia o tatou tagata.
O se faalavelave na mamao iã i tatou uma se manatu e ono tupu i lo tatou itu lagi, a’o ituaiga faalavelave ia e tula’i mai i le ao ma le po i atu Europa ma Sasa’e Tu Totonu i atunuu Arapi. O le uiga lea o i latou o loo faatupuina le vevesi i le lalolagi, ma o loo latou faaogaina ai fesootaiga televavave, lea foi ua maoa’e le tulaga ua i ai Samoa i le tulaga o atina’e nei o fesootaiga televavave. O ni faiga e faaputu ai le feinoinoa’i le hatred i le va o tagata, i le va o aiga, i le va o uso, i le va o tuafafine ma tagata o le atunuu.
Uiga ia o lea foi ua oo mai i Samoa, lea ua faaogaina ai le finauga ma mau o le aia tatau; o le aia tatau e faaali sa’oloto ai o latou manatu lế taupulea, ma aumaia ai ma ni gagana maoa’e le solia ai o le va tapuia o tatou tagata, a’o loo nanã mai ai i tua aia faaletatau, uiga faasolitulafono ma uiga e talepe ai le mafana ma le maopopoga o pulega mamalu a Alii ma Faipule i totonu o o tatou nuu. O tatou o Ta’ita’i o le atunuu lenei, o Ta’ita’i o Itumalo e ao ai ona tatou li’oli’o i ai i uiga ia ua tula’i mai pea i aso uma aso uma e o tatou lava tagata, ua faata’ita’i i uiga ia faatupu vevesi ia e faatupu mai fafo.
O se faalavelave faatupu manatu ia i tatou o Ta’ita’i o le atunuu i totonu o le Palemene lenei, tatou o loo malamalama lele i fenumiaiga nei e le malamalama i ai le toatele o ta’ita’i o õ tatou nuu; e ao ai ona aua nei o tatou faatamala. A tilotilo foi i tagata nei e faatinoina uiga faapenei, e le’o fealofani foi o latou aiga o la foi e malepelepe, ma o uiga la ia e tatau ona li’oli’o i ai tatou uma, aemaise o le faatalanoa i o tatou Itumalo ia aua ne’i tupu i Samoa mea ia na tupu i Niu Sila, tupu foi i isi atunuu aemaise Amerika; o le õ atu o latou ma laau malosi ma faauma ai le ola o fanau.
O le ala lea ua ou tula’i atu ai Lau Afioga i le Fofoga Fetalai; le faafogafoga mai foi a le atunuu, ia mau pea le toovae i le pulega mamalu a Alii ma Faipule, ona e oo foi i le pulega mamalu a Alii ma Faipule ua ofi atu i ai talaiga nei; nai o tatou tagata e le’o malamalama i uiga loloto o latou nei, o tagata faatupu vevesi.
Lau Afioga i le Fofoga Fetatlai, o le mafuaaga na ua ou tula’i atu ai ona o lea ua usu le Fono a Ta’ita’i o Samoa a’o lea e lei umi ona tupu mai le faalavelave lenei i totonu o Aotearoa o loo toatele nai o tatou tagata o loo aumau ai.
O le faafetai ona e foliga mai e oo mai i le taimi lenei e lei oo mai se tala o aafia se tagata Samoa i nei uiga na tulai mai e faavevesi ai e le gata o Niu Sila, o le tatou itulagi a’o le lalolagi atoa.
O le tatalo ia fesoasoani mai le Agaga o le Atua; o le Atua o loo Faavae ai le Malo lenei ina ia maua pea e le tatou atunuu le filemu ma le saogalemu.
Faaifo mai lagĩ manū mo le tatou fonotaga i le aso; faapea foi le tatou atunuu o loo tapua’i mai.
Soifua ma ia Manuia.
