Tusia: Pesetā Tusiga Taofiga. O le Fonotaga a le Palemene i le Aso Lua, 20 Iānuari 2026, na fa’asilasila aloā’ia ai e le afioga i le Fofoga Fetalai iā ‘Au’apa’au Mulipola Aloitafua, le tu’umālō o le sa avea ma Faipule mo le Itumālō Palota o Safata 2 iā Laumatiamanu Mathew Ringo Purcell i le Paeā’iga Lona XVII a le Palemene.
O le Aso 11 Iānuari 2026 na fa’amanava ai e le Atua, le tautua a lenei tamāli’i, ma na momoli aloā’ia ai fa’amaisega ma fa’amafanafanaga a le Fono Aoao Faitulafono i le Faletua, le Fanau ma le ‘āiga fa’avauvau ona o le valā’au pa’ia a le Ali’i e ala i le malaga a le maliu ma le oti.
O Laumatiamanu, na ulufale i le Palemene i le Paeā’iga Lona XVII mai le 2021 i le 2025, i le fa’amalu a le Vaega Fa’a’upufai a le Fa’atuatua i le Atua Samoa ua Tasi [F.A.S.T.].
Na tofia i le Komiti Fa’apalemene o Tupe Maua ma Tupe Totogi aemaise o le Komiti Su’esu’e Fa’apitoa a le Palemene.
Sa filifilia ma Minisitā Lagolago mo le Matāgaluega o Galuega Tetele, Fela’uā’iga ma Atina’e ‘Ese’ese [M.W.T.I.] mulimuli ane tofia e avea ma ulua’i Minisitā mo le Matāgaluega o Ta’aloga ma Alagā’oa mo le Soifua Fiafia o Tagata [M.S.R.] i le tausaga e 2024 – 2025.
I le Feiloā’iga a le afioga i le Palemia, Susuga i le La’aulialemalietoa Leuatea Polāta’ivao Fosi Schmidt ma Ofisa Fa’asalalau, na ia fa’afetaia fa’apitoa ai le tautua matavela a lenei tamāli’i i le atunu’u, aemaise o lona sao i ‘upufai o Mālō.
Saunoa La’aulialemalietoa, o lo’o tapena Malu o le Mālō mo le Sauniga Fa’alemālō o le afioga iā Laumatiamanu fa’atasi ai ma le Molimau a le Mālō, o le ā fa’afeao fo’i e Leoleo lona sā, o le fataina e Leoleo o lona pusa maliu, ufiina o lona pusa maliu i le tagāvai o Samoa, fa’atasi ai ma le tau’ā’aoina atu e le Mālō o le tagāvai o Samoa i lona ‘āiga, o le fa’aaloalo mauāluga a Samoa atoa, e fa’afetaia ai lana tautua matavela i nei tausaga e tele.
Na tūtūla’i le Palemene atoa, o se fa’aaloalo e toe to manatu ai i le sao tāua o lenei toa manumanu i ‘upufai o le atunu’u.
O le vaiaso fou ona Toe Sauniga Fa’alemālō.
- 194,267 Tagatanuu o Samoa sa maua le ta’i $150 tala - June 28, 2026
- A Fealofani tatou o Ta’ita’i – e Toafilemu foi le Atunu’u - June 27, 2026
- Pāsia Aloaia le Tala Faatatau Autu o le Tupe 2026/2027 - June 27, 2026
