Ua faaleo se finagalo tetee o le sui tauva tutoatasi o loo sauni atu nei mo le faigapalota laititi, i le faaogaina lea o le ata o le tamaitai Palemia e faalauiloa ai le sui tauva o le Faatuatua i Le Atua Samoa ua Tasi (FAST).
O le afioga ia Feagaimaalii Bruce Toomalatai Utaileuo, e toatolu iai sui tauva mo le filifiliga o se sui mo Vaimauga 3, lea o loo avanoa nei ina ia maliu le afioga ia Papalii Niko Lee Hang.
Saunoa Feagaimaalii, o loo ia maitauina i faalauiloa i luga o le auala ma upega tafailagi, o loo iai le ata o le tamaitai Palemia.
“Talofa ua faatasina, o le Palemia o Samoa atoa. O Fiame o le tatou Palemia, e le o se Palemia a se vaega faaupufai poo se pāti.”
“Peitai ua maitauina ua iai le ata o le Palemia i laupapa faalauiloa mo le sui tauva a le FAST. Afai o lea, sa tatau foi la ona aumai le ata o le Palemia i la’u laupapa faailoilo, poo faailoilo a Samau, auā o le palemia mo tagata uma ma Samoa atoa.”
E le o se tulaga fou le iai o le afioga i le Sa’o Faapito i faalauiloa mo sui tauva o le FAST.
I se isi mataupu ma faailoa foi e le sui tauva lona matuai tetee i le fuafuaga a le Malo e faa’aogaina ai se vaega o le fanua 250 eka o Alaoa e fausia ai le faatanoa vai.
Saunoa Feagaimaalii, e le saogalemu lea fuafuaga mo le itumalo.
“A oo ina pā pe faaletonu le faatanoa lea, e ono telē se aafiaga, e le gata o le aafia ai o mea totō, o mea fafaga, lafu manu, o maota ma laoa aemaise o le soifua o tagata lautele.”
Na saunoa foi Feagaimaalii, o lea ua faamatu’u mai le $150,000 mo lona itumalo, ae sa tatau ona aumai uma le seleni e fesoasoani i tagata o lona itumalo e tua iai tagata ona o le taugata o le soifuaga o loo iai nei.
Na faaiu le saunoaga a le sui faaolioli i lona tatalo mai i lona itumalo e tuu atu lo latou faatuatuaga ia te ia.
“Ua tāpena Feagaimaalii Bruce Toomalatai Utaileuo, e faaleo manaoga le itumalo Vaimauga 3.”
O le afioga Feagaimaalii sa tauva foi i le palota tele na sei mavae atu nei e pei ona tuuina atu le iuga o le palota. Sa tu tolu Feagaimaalii i le tauvaga ma palota e 66.
(0)
