O le vaiaso nei lea na tatalaina aloa’ia ai nisi o fa’amoemoe taua a le Pulega o Tagata Tafafao Maimoa Mai i Fafo (Samoa Tourism Authority) e ala i lana faigapa’aga ma le Malo o Niu Sila mo se polokalame ua fa’aigoaina o le STSP (Samoa Tourism Support Programme).
O se polokalame e tusa ma le $400,000 tala le faitau aofai o le seleni na mafai ona faaleleia ai nisi o mata’aga i Savaii, e aofia ai ma le vaitafe o le “Afu o Aau” i Vailoa, Palauli.
Sa mafai ona asiasia e le to’atele o le ‘au fai faletalimalo i Savaii fa’apea sui o le ‘au fai pisinisi ma le Asosi o Tagata Tafafao Maimoa mai i Fafo i Savaii ia le toe fa’aleleia (upgrade) o lenei mata’aga matagofie.
Na mafai ona maua se fa’atalatalanoaga ma le afioga i le alii faipule o le Itumalo lenei o Palauli No.3 ia Tuifaasisina Misa Lisati Leleisi’uao Palemene, e ala i sona finagalo ma sa ia faapea mai ai o se tasi o faafitauli tele le leai o ni faamaumauga pe toafia se Aofai o ē asiasi mai iI tausaga ma lea tausaga.
Sa ia fa’afetaia le poloketi ua matagofie ai mea uma na fa’aleleia e pei o le pakaga o ta’avale, o le auala savali ma vaega e mafai ona fa’aaoga e tagata e sopoia ai lalo o lenei vaitafe o le “Afu o Aau”.
Saunoa Tuifa’asisina e fa’afetaia le Malo o Niu Sila ona o le fesoasoani tau seleni lea ua mafai ona si’itia ma fa’aleleia ai le mata’aga lenei o le ‘Afu o A’au.
E iai le talitonuga o Tuifa’asisina, e le’o lelei ona aoao fainumera ma fa’amaumauga o tagata asiasi atu i lenei mata’aga sili ona matagofie i Savaii.
“Tele tagata mai fafo e latou te asia le mata’aga lenei, oute iloa o le 99 pasene o tagata tafafao mai fafo e afea Savaii e fiafia e omai i le mata’aga lenei,” o le saunoaga lea a Tuifa’asisina.
“Peita’i o le fa’afitauli pito sili ona tele lea e tula’i mai, o le leai o ni fa’amaumauga o le fainumera o tagata na asiasi mai i lenei mata’aga i tausaga ua alu, ma o se taumafaiga lea e una’ia ai tagata o le afio’aga ma le itumalo aemaise o le faigapa’ga ma le Malo o Niu Sila ma le Ofisa o Turisi ina ia atina’eina le tulaga lenei i le aoaoina o le fainumera,” o le saunoaga lea a Tuifa’asisina.
O le matau a Tuifa’asisina, so’o se mata’aga lava i nei ona po e pei lava na’o le seleni e ano iai ae le’o ave le fa’amamafa i le fa’amaumauina o fainumera o tagata asiasi i mata’aga fa’apenei aua e fesoasoani malosi e una’ia ai nisi fesoasoani tau seleni mo le lumana’i pe a lelei ona fa’atino ma gafataulimaina.
O le afu lenei e tolu vaitafe, e aofia ai le vaitafe tele ma tama’i vaitafe e laiti e lua lea e tele ina fa’aaogaina uma e tagata tafafao maimoa i Savaii pe a o latou afea lenei afio’aga i le itumalo o Palauli.
O itu lea ua mafai ona fa’aleleia e aofia ai pakaga o ta’avale (car park), o faleleta’ua atoa ai ma auala e mafai ona sopo’ia ai e tagata tafafao ia vaitafe nei e tolu.
“O le mata’aga lenei e “Pick and Choose” e mafai e so’o se tagata tafao mai i Savaii ona filifili po’o fea le vaitafe e talafeagai ma ia ona fa’aaoga lea,” o le saunoaga lea a Tuifa’asisina.
O le Afu o Aau e aofia i le seleni e silia ma le $400,000 tala Niu Sila lea na fa’aaluina e fa’aleleia ai ni mata’aga e o’o atu i le 5 i Savaii.
O lo’o iai le naunauta’iga o le afioga i le faipule e una’ia se tasi o poloketi lea o le a talosagaina ai le UNDP ma le GEF mo se vaega seleni e fa’atupe ai le toe totoina o la’au Samoa mao’i lava ia i autafa o le auala o lenei mata’aga (indigenous trees) ina ia avea ma auala e atili fa’atosina ai turisi i le matagofie o la’au Samoa moni e pei o la’au e fai ai vai Samoa ma la’au taumafa mata.
- Hearing Date Set for Four People Charged with Sexual Acts on Woman with a Disability - October 5, 2021
- Two Sasina Matai Charged with Uttering Threatening and Insulting Words - October 5, 2021
- Male Prisoner at Tanumalala Pleads Guilty to Acts of Sodomy - October 5, 2021
