FAALĒAOGAINA O LE FAUTUAGA MO SUNAMI
O Fautuaga mo Sunami sa fa’amalosia mo Samoa ua FAA-LĒ-AOGAINA nei. Ae peitai, mole silafia o le mamalu ole Atunu’u, o lo’o fa’atumauina pea ona mū le Maugamū i Tonga ma e ono āfua mai ai ni galu malolosi i isi itula ma aso o lumana’i. E ono fa’atupula’ia ai galu i nisi o nofoaga. O lo’o fa’amalosia fo’i fautuaga mo ‘ogasami ona o uiga loulouā o le tau o lo’o ufitia ai pea Samoa, ma e ono fa’ateleina ai lava le lamatia o ogasami. O lea, e fautuaina ai pea le mamalu ole Atunu’u ina ia nofouta ma fa’aitete ile sami ona e ono iai galu ma tāfega e ono tulai mai. O lo’o mata’itūina pea e le Ofisa tulaga uma i Toga ma tu’uina atu fautuaga ma fa’amatalaga talafeagai
——————–
Volcanic Ash | Lefulefu o Maugamū 🌋
2:50am, 17 January 2022
A’o fa’aauau ai pea le olaola o le maugamū i atu motu o Toga, o lo’o ta’ape pea lefulefu o maugamū ma si’omia ai motu o Toga ma le itu i Sasa’e o Fiti.
A tusa ma le ripoti lata mai a le Ofisa i Ueligitone e mata’itūina lefulefu o maugamū, ua iai nei se avanoa e ufitia ai se vaega maualuga o le vānimonimo i Saute o Samoa mai le vaveao nei ma i ona tua atu. Ua ala ai nei ona fa’asolo ina FEOLOLO se avanoa e ufitia ai Samoa.
E le’o matuā manīno a’afiaga o le atunu’u mai nei lefulefu e tafīa mai e le savili ae peita’i o le a ono mātele lava i vaega maualuga o le vānimonimo. O lo’o fa’ailo mai i le va’ai mamao le fa’aitiitia o le kasa o le SO2 i taimi o lenei aso ma le aga’i atu ā taeao.
O le a fa’aauau pea ona mata’itū suiga o lenei mauga mū ma tu’uina atu fautuaga talafeagai
📸 VAAC Wellington, ECMWF (Windy)
(0)
