Ua teena e le Faamasinoga Faaitumalo tuuaiga faasaga i le failatusi o le vaega faaupufai e Puipuia Aia Tatau a Tagata le HRPP.
O lenei mataupu o se tagi na faaulu atu e le failautusi a le vaega faaupufai a le Faatuatua i Le Atua Samoa Ua Tasi (FAST) le afioga Va’aaoao Alofipo, i se tuuaiga e faapea sa tuuina atu e Lealailepule Rimoni Aiafi le tai $100 i ni matai se toalua o le afioaga o Ma’agiagi a’o loma le faigapalota laititi a le itumalo o Vaimauga 3.
I le tuuina mai ai o le faaiuga a le Alii Faamasino le afioga Loau Donald Kerslake, sa saunoa mai ai, “o lenei mataupu ua maea ona faia iai le faaiuga a le Faamasinoga Maualuga, ma e lē o faamaonia tuuaiga e faasaga i le afioga Lealailepule Rimoni Aiafi, ma e manatu, o le faaiuga foi lea o lenei mataupu.”
Saunoa le Faamasino o le Faamasinoga Faaitumalo, o le tuuina mai o lana faaiuga, o le maea ai foi lea o lenei mataupu.
I fafo o le potu faamasino na saunoa ai le afioga ia Lealailepule e faali lona lē fiafia i le failatusi a le FAST, ae maise o le lē auai atu o Va’aaoao i le faamasinoga.
Saunoa Lealailepule, “O fea lā o iai Va’aaoao? Na o le fai o nei mea ona le omai lea matou te faafesagai!”
“Alu ai ma le kaimi..”
O lenei mataupu sa tulai ai le alii loia ia Fetu Lagaaia mo le failatusi a le FAST, ae o Fuimaono Sefo Ainuu sa tulai mo Lealailepule.
I le masina o Oketopa 2022, sa faaleaogaina ai foi e le Faamasinoga Faaitumalo se tagi na tuuina atu e Vaa’aoao Alofipo e faasaga i se tasi o faasalalau i se auaunaga leitoa i Ausetalia (radio announcer).
I lena mataupu sa faatonu ai e le Alii Faamasino ia Leota Raymond Schuster le toe faafoiina o pepa malaga a Tiumalumatua Maifea Fetu, ina ua lava mau e faamaonia ai tuuaiga a le failatusi a le FAST.
O loo i luma foi o le Faamasinoga Faaitumalo se isi foi tagi na faaulu e Va’aaoao e faasaga i se tamaitai Samoa e nofo mau i Amerika, o loo tālia ai foi se faaiuga a le faamasinoga.
I lena mataupu o loo tuuaia e le Failautusi a le FAST le tamaitai ia Pekina poo Perkins Tauvao i lona faia o faamatalaga e tauleagaina ai le tamaliiaga o sui o le vaega faaupufai.
Avanoa Faigaluega – Taula Beverages
