Faaleaogaina e le Faamasinoga Tagi uma i le Mataupu a Vaimauga 3

0
34

Ua faaleaogaina e le Faamasinoga Maualuga tagi uma sa tuuina atu e tuuaia ai sui tauva o le faigapalota laititi a Vaimauga 3.

I le lauina o le faaiuga a lana afioga ia Leiataualesa Daryl Clark, sa ia tā’ua ai, “ua faaleaogaina e le faamasinoga le tagi a Samau Leatigaga Timani Samau, e faasaga ia Lautimuia Uelese Vaai..

“E faapea foi ona faaleaogaina e le faamasinoga le tagi a Lautimuia Uelese e faasaga ia Samau Leatigaga.”

Sa folasia e le Alii Faamasino, e le faamaonia nei tuuaiga uma ona e aunoa ma ni mafuaaga tatau na folasia i luma o le faamasinoga.

“Sā lē tatau lava ona aumaia se tagi i luma o le faamasinoga ona e lē lava mafuaaga e mafai ai e le faamasinoga ona faamaonia tuuaiga sa folasia..”

I se faatalatalanoaga ma le afioga ia Lautimuia Uelese na ia saunoa ai e faafetaia le alofa ma le agalelei o Le Atua ina ua iu ma le manuia le faamasinoga.

“Faafetai ua tali Le Atua e pei ona iai lenei aso..”

Sa ia momoli foi le faafetai i le itumalo lo le latou lagolago.

“Sa maitauina e mai lava i le amataga ao faagasolo taualumaga o lenei faamasinoga sa taumulimuli lava le itumalo.. e amata mai lava i lau ao sinasina e oo lava i tupulaga talavou sa latou tapuai lava..”

Sa momoli foi le faafetai a le Sui Faipule o Vaimauga 3 i le tofā ia Samau.

“O upu a le atunuu e ta’aalo lava tama e uso.. Malo le faatoatoa, malo foi le tapuai, malo le tofā…

“Ia o le upu moni e lē avea nei faamasinoga e va ai le fogavaa, ae tuli i luma so tatou ai…

“E manaomia le tatou galulue faatasi mo se manuia o le itumalo.”