Faaleaogaina e le Faamasinoga Moliaga o le Fasioti Tagata Paivalea

March 30, 2023

Faaleaogaina le faamasinoga moliaga o le fasioti tagata paivalea

Ua solofua ma faaleaogaina e le Faamasinoga Maualuga moliaga o le fasioti tagata paivalea sa molia ai se tamā mai le afioaga o Lalomalava i se faalavelave na tula’i mai i le fitu tausaga talu ai.

O Steve Afiafi na molia i le tausaga 2016 ina ua tuuaia na ia faia ni gaoioiga sa oo ai le maliu ia Iese Petaia, o se tamā 44 tausaga mai Aele.

I faamaumauga a le Faamasinoga o loo tā’ua ai o le Aso 20 o le masina nei na tuu e fofogaina ai mau ma suesue ai lenei mataupu, peitai, sa oo atu sui o le Ofisa o le Loia Sili e taitaia le itu a leoleo (prosecution) ma talosagaina le toe faaui uma i tua o moliaga e faasaga e faasaga ia Steve Afiafi, ona ua le lava molimau.

“O nisi sa fuafua e molimau i lea mataupu, o lo ua malaga ese atu mai Samoa mo galuega faavaitaimi, faatasi ai ma se manaoga o le aiga o lē ua maliu, ina ia toe faaui i tua le tagi.”

Sa faali le lē fiafia o lana afioga i le Faamasino ia Leiataua Daryl Clark, ma ia fesiligia ai le tele o tausaga o tau tapena mai lava le itu a le Loia Sili ma Leoleo i lenei mataupu.

Saunoa Leiataualesa, e le talitonu lona i le lē mafai ona tapena vaega uma o lenei mataupu ae ua fitu tausaga o latou taulimaina faamaumauga o lenei mataupu.

Taua foi e le Faamasino, sa tatau e le Prosecution ona talosaga le Faamasinoga mo se avanoa e fofoga vave ai lenei mataupu, pe tuu atu foi se poloaiga i le Ofisa o Femalagaiga e taofia ai i latou o loo molimau i lenei mataupu.

Peitai na saunoa foi Leiataualesa, e tatau fo’i ona vaavaai i le aafia o aiā tatau a lē o loo tuuaia, ona o le leva o tausaga o toso pea lea mataupu, ma le mafai ai lava ona maua se tali i lona ta’uamiotonuina seia vagana ua faamaonia se soligatulafono.

O le sa talia ai loa le talosaga a le ofisa o le Loia Sili e faasee ese moliaga. Ua faalēaogaina moliaga (dismissed) ma le toe mafai ai ona toe tatalaina lava lenei mataupu i le lumanai.