Ua faaleaogaina e le faamasinoga maualuga i luma o lana afioga ia Leiataualesa Daryl Clarke moliaga o le gaoi a’o avea ma tagata faigaluega lea sa faasaga atu i le tamaita’i o Hilda Moelasi.
O Hilda Moelasi e 40 tausaga lona soifua ma e toasefulu ona alo, e toafitu tama ae toatolu teine. O le a ave nei sana tagi e toe maua uma lona totogi i le tolu tausaga sa faatea ai ia, ma nofo mai lana galuega ao suesue lenei mataupu, ua faapea mai le alii faamasino sa le tatau lava ona oo mai i le faamasinoga maualuga.
O le moliaga o le gaoi sa molia mai ai lea tamaita’i ao fai o ia ma tagata faigaluega i le vaega o Falepuipui ma sa tulai lava ia mo ia (self represented).
I le aso 7 o Oketopa a’o avea ai lea tamaitai ma tagata faigaluega o le vaega o Falepuipui (Prisons and Correctional Services) sa tuuaia ai faapea o pusa apa e lima na ia gaoia, ma o meaai a pagota. Sa faaalia i le taimi o le faamasinoga e tusa ma le $43.50 i le pusa e tasi, maua ai lona aofaiga e $217.50 i pusa e lima.
O ni faasea mai pagota tamaitai i le le lava o meaai, na mafua ai ona sailia le tulaga tonu ua tupu ai lea faafitauli, ma o’o mai ai loa i le faamasinoga.
Ua latalata i le tolu tausaga o faatali Hilda i se faaiuga o lenei mataupu, ma o le umi foi lena e lei toe faigaluega ai ona sa faateaina o ia mai le vaega o le Falepuipui.
Sa valaauina e leoleo molimau e toafa e aofia ai ma le Komesina o le Falepuipui ia Taito Winterstein, ma nisi sa faigaluega ai i lea taimi faatasi ma Hilda.
E tulai mai le mataupu lenei o Taitai Leoleo o le itu a pagota le sa molia.
I le folafolaina o le faaiuga o lenei mataupu ma le suesuega a le Faamasinoga na faailoa ai e le alii faamasino ia Daryl clarke e faalauaitele lea mau, ma e le o agai tonu e faamaonia o pusaapa o loo taua sa aveina e le ua molia, ma faatauina mo se penefiti mo ia lava.
O le molimau a le alii sui taitai, sa vaaia taofia atoa ai ma faasea a pagota e faaoo atu ia Douglas Fereti o loo taua ai sa iai faasea na tuuina atu e pagota e aofia ai ma le tamaitai pagota ia Vaioleti Stowers lea sa molimau foi faasaga i le sa molia.
E le o mautu mai i lea molimau le aso tonu o le faasea na tuuina atu, atoa ai ma le aofai o pusa apa na gaoia. E lei faailoa foi i lea molimau poo fea lea sa faatau ai ia pusaapa.
O le molimau a Vaioleti Stowers o loo taua ai o le na molia sa o ma le isi tamaitai ofisa e vaai pagota ave pusaapa ma faatau i le faleoloa o le Princessa i Vaitele, ma faatau mai ai aisakulimi ma pepa faivaiinu o le Tang atoa ai ma masi, e fai ai se vaimalu a pagota i lo latou aso taalo.
Na faailoa e le alii faamasino i le aotelega o lana faaiuga e faapea o le faatauina atu o pusa apa ma aumai ai le aisakulimi a pagota mo le vai malu, e aunoa ma se penefiti ai o le ua molia, ae o lea ua faaoga e molia ai le o loo tulai nei. O se tulaga e faigata tele ona malamalama iai le alii faamasino.
O lenei mataupu o se mataupu faalotoifale o galuega sa le tatau ona molia mai i le faamasinoga o soligatulafono, ma i lana vaai sa le tatau ona oo le ua molia i mafatiaga i lenei taimi atoa ao faagasolo ai le mataupu.
Ua tuuina mai ai la ma le faaiuga ua le mafai e leoleo ona faamaonia moliaga e faasaga atu ia Hilda e tusa ai o mafuaaga ma molimau sa faafofoga iai.
Ina ua talanoa mai le tamaitai o Hilda i le maea ai o le faamasinoga sa maligi loimata ma ia faafetaia lona aiga ma fapea mai ai,
Mai le 2016 seia oo mai i le aso lenei e ese le alofa o Le Atua, ua faaalia lava e le Alii le mea moni ma le sa’o.”
Sa ia taua o nei foi, “o nei tuuaiga sa fai ma tulaga e faamatagaina ai lou aiga o lou nuu ae faasilisili ai la’u fanau, o se mea matua faigata ma tiga, peitai, o lenei aso, o lea ua tali le Atua.”
Sa faailoa foi e Hilda, o le a ia toe finauina le maua o lona totogi mai lenei taimi umi, ma e toe fia fo’i lava i le galuega, o lana tautua sa iai e 18 tausaga, ma o lona naunautaiga e toe fia foi i le galuega.
Naa ia faailoa foi, e maliu lona toalua o talia pea le faagasologa o lenei mataupu.
“E alofa Le Atua i le fafine ua oti lana tane”
