Faaleagaina Pa’u o Vaalele Samoa Airways i le Patupatu o le Ala Vaalele i Fagalii

0
4649

O le aso ananafi, Aso Lua 27 Iuni sa toe tatalaina ai le malae vaalele i Fagalii mo femalagaiga i le va o Samoa e lua ae peitai, ua saunoa le Ofisa Sili o le Samoa Airways, sa afaina ai lava pa’u o le vaalele i le tulaga o loo iai le tā (tar) o le ala vaalele.

“Sa faaleagaina isi pa’u o le matou vaalele i le aso ananafi talu ona tatala Fagalii.. e mafua mai i le patupatu ma le lē lamolemole o le tar..”

Saunoa Fauoo Fatu Tielu i se faatalanoaga ma lau Samoa Global News, o loo iai foi nisi o popolega sa faaoo atu e le mamalu o pailate a le kamupani vaalele.

O le ālā vaalele i Fagalii sa faaleagaina ai pa’u o vaalele a le Samoa Airways i le aso muamua na tatalina ai.

“E le gata i le patupatu o le malae, ae o nisi o popolega o loo faaali mai lava e matou pailate, e pei o le puupuu o le malae (runway)..

“E tau stress laititi ai le landing ma o le a tele ai vaega e ono faaleleia (maintenance) o matou vaa..”

Saunoa le Pule o le Samoa Airways, o loo iai foi se popolega a pailate ona o pou moli o loo i le itu Sisifo, ma laau o loo i autafa o le malae vaalele, faapea le pou a le Digicel lea e tu i le Kolisi o Samoa, e maualuga ese lava pe a aagai mai i lalo le vaalele e land i Fagalii.

Saunoa Fauoo Fatu Tielu, e ono siitia le tau o pasese mo le mamalu o le atunuu o loo fa’aogaina le tautua ma le auaunaga a le Samoa Airways, ona o le tele o tupe faaalu ua tula’i mai i le toe faaauauina o faigamalaga mai Fagalii.

Saunoa Fauoo, e le gata i le faaleagaina lea o pa’u o vaalele mai le patupatu o le tar, ae o loo feagai foi le auaunaga a le Samoa Airways ma le faafitauli o le lē mafai lea ona faauma malaga o le aso i Fagalii.

“A oo na tau afiafi ona muta lea o malaga i Fagalii ona o le pogisa, ae faa’auau atu malaga vaalele mo le va o Samoa e lua, i Faleolo.”

“E toe foi lava malaga i Faleolo ona e le mafai e vaalele ona sese’e pe a oo i le afiafi e pogisa.”

O le isi itu tāua sa saunoa iai le Ofisa Sili, e na o Faleolo e mafai ona faatino ai vaega faaleleia o vaa (check and maintenance work). E leai ni insinia i Fagalii e latou te siakiina vaalele.

Saunoa Fauoo, “A tulai mai se faaletonu i le vaa, ona lele lea i Faleolo e faatino ai vaega faaleleia.”

O le isi tupe faaalu, ona e feaveai ai foi ma le aufaigaluega i le va o Faleolo ma Fagalii.

“O le totogi o rent i ofisa o loo fa’aogaina e le matou aufaigaluega i Fagalii, totogi pili telefoni ma le eletise..”

Saunoa Fauoo o vaega uma ia o loo tagatagai ai e ono faatino ai se siitaga i tau o pasese.

“Atonu e le atoa se sefulu pasene, tusa lea poo le $20 tala Amerika.”

O le tau o le pasese i le va o Samoa e lua, e lata i le $780 tala Samoa. O le siitaga o loo saunoa iai le Ofisa Sili, “poo le US$20 tala Amerika”  =  $60 tala Samoa.

Toe tatalaina o le malae vaalele, May 2023.

Ina ua toe tatalaina le malae vaalele i le faaiuga o Me 2023 na saunoa ai le afioga le Minisita o Galuega Tetele ia Olo Afoa Fiti Vaai, “ua ausia ma faamalieina tulafono uma o malae vaalele savili, ma ua faamaonia lona saogalemu.”

Sa saunoa le Minisita e $2.6 miliona talā le tau o le toe faaleleia o le malae vaalele, o fale mo le sauni ai o pasese e tuua faapea foi le taunuu mai.

O le isi tulaga tāua, o le toe faaleleia lea o le malae e sesee ai vaalele (runway) lea ua toe faaopopo le isi 100 mita.

Saunoa Olo, “Ua 800 mita ai le umi e faatusa atu i le 700 mita sa iai”.