11 September 2019, Apia Samoa. O le asõ i le tala faasolopito o Samoa sa faalauiloa aloaia ai le vaega faaupufai o le Samoa National Democratic Party (SNDP) Toefuataiina i le maota o le Tuutuuileloloto i Apia.
Na valaaulia le Afioga i le Alii Palemia o Samoa e saunoa faapitoa aua le faamoemoe.
I lana saunoaga sa faamanuia ai le Susuga ia Tuilaepa Sailele Malielegaoi i sui o le patī fou ma faailoa le agaga faafetai i le finau ina ia tauvā aua lava le filifiliga o ni taitai lelei o le atunuu.
“Aua o ai ma iloa pe alu alu ae maua mai i lenei vaega faaupufai se taitai o le atunuu ma ni minisita i le lumanai,”
Na tā’ua foi e le taitai o le HRPP le tele o lu’itau e feagai ma vaega faaupufai.
“E le o se tulaga e faigofie, ma o le tatou atunuu foi e atamamai tele i mataupu tau polokiki”.
Sa tuuina atu le meaalofa a le HRPP mo le vaega faaupufai fou e $2000 tala.
I le saunoaga a le Afioga i le taitai o le SNDP Toefuataiina o Asiata Valasi Aulavemai Tafito Togamaga, na ia faapea ai, o le patī fou o se toe faatulai mai lea o le SNDP lea sa taitai ai Tuiatua Tupua Tamasese Efi, lea e māfua ai ona faaigoa i le SNDP Toefuataiina.
Sa saunoa foi se tasi o sui o le vaega faaupufai ia Vui Masina i le taua tele o le tulai mai o se vaega faaupufai e latou te mafai ona agaia le Malo i totonu lava o se faigamalo faa temokorasi.
Sa ia saunoa foi e faapea, ana lē taofia lava mataupu tau fanua o le atunuu, ma le faatagaina o lisi i fanua faale atunuu – e lē oo atu ia te ia le manatu, e tatau ona fai loa se patī malosi.
Saunoa foi Vui Masina e silia ma le 20 a latou sui auai ae peitai e le o se aso lenei e faalauiloaina ai a latou sui tauva.
“O lenei aso o le Thanksgiving. E faafetai i Le Atua ai ina ua mafai ona faamaopoopoina lenei faamoemoe.”
(0)
