E toalua ni sui tauva a le Faatuatua i Le Atua Samoa ua Tasi ua faalauiloa mai o le a tauvaina le sailia ai o se tofi o le itumalo o Lotofaga i le faigapalota o loma nei.
O le itumalo o Lotofaga ua 40 tausaga o loo tauaveina pea e le afioga i le Sa’o Faapito poo le uluai Palemia tamaitai a Samoa ia Fiame Naomi Mataafa.
E masani foi ona tapuvae tasi le faatuatuaga a le itumalo i le afioga ia Fiame i le tele o paeaiga ua mavae, ma leai se palota e faatinoina.
Peitai ua faamaonia mai i faalauiloa a le vaega faaupufai o le FAST le tauva ai lea o le afioga ia Fuimapuao Taliilagi Beth Onesemo; faapea ma Fiaola Iosua Lole, i le faigapalota mo le tofi o le itumalo o Lotofaga.
O le afioga ia Fuimapuao, e le tau faailoaina lea tamalii i lona sao i le tele o Matagaluega a le Malo sa tautua ai faapea foi auaunaga tumaoti i totonu o le atunuu.
Sa ia taitaia le Matagaluega o Tinā ma Tamaitai, Nuu ma Agafesootai, sa avea ai o ia ma Ofisa Sili. Sa ia taitaia foi le Matagaluega o le Komisi e Pulea Tagata Faigaluega a le Malo le PSC.
Sa filifilia foi Fuimapuao e fai ma sui o le Komiti Faafoe (Board Member) o le Pulega o le Eletise poo le EPC, faapea ma le Komiti Faafoe o le Faletupe o Atinae o Samoa le Development Bank.
Ua iloga fo’i le sao o Fuimapuao i mataupu tau avanoa tutusa o tina ma tamaitai. Sa tautua fo’i o ia i le Komiti Faatonu o le Lakapi Samoa i tausaga ua tuanai.
O Fuimapuao e se tamaitai loia, ma o loo galue i le taimi nei, o se Konosale o lana lava pisinisi tumaoti.
O le afioga ia Fiame Naomi Mataafa, ua 40 tausaga talu ona ia tautua o se Sui Faipule i lona itumalo o Lotofaga – talu mai lava le 1985 ina ua ofi mai i le Palemene o Samoa o se Sui Faipule o le vaega faaupufai e Puipuia Aia Tatau a Tagata le HRPP.
O le Sa’o Faapito sa fai ma ulua’i tamaitai e uumia le tofi Minisita o le Kapeneta ina ua tofia e taitaia le Matagaluega o Aoga i le 1991 – 2006. Sa Minisita o Tina ma Tamaitai mai le 2006-2011. O le tausaga 2011 – 2016 sa ia uumia ai le tofi Minisita o le Matagaluega o Faamasinoga ae o le 2016 sa fai ai o ia ma uluai Sui Palemia o Samoa ma uumia ai fo’i le tofi Minisita o le Siosiomaga.
O le tausaga 2020 na faamavae ai ma le tofi Minisita faapea le Sui Palemia o Samoa, i luga o lona le lagolagoina o tulafono taufaaofi ia sa vevesi ai le atunuu.
Na avea ma uluai Palemia tamaitai o Samoa e pei ona silafia i lalo o le Fu’a a le Faatuatua i le Atua Samoa ua Tasi i le 2021 ma o loo ia taitaia le vaega faaupufai fou ua faaigoaina o le Samoa Uniting Party.
I le taimi nei e le o iai ni sui tauva a isi vaega faaupufai ua faalauiloaina mai mo le itumalo o Lotofaga.
- Molia nisi se toafa i le tuuina atu o faamatalaga taufaasesē i le Ofisa o Faigapalota - July 9, 2025
- Faalauiloa Sui Tauva mo le Itumalo o Lotofaga - June 26, 2025
- Police Investigate Olo’s Defamation Complaint Under Criminal Libel Laws - August 24, 2022
