Ua faailoa mai e le komiti o le tutoatasi le polokalame o le a faatino i le vaiaso fou mo le faamanatuina o le 60 tausaga talu ona tutoatasi Samoa mai pulega a Niu Sila ma Peretania.
Sa saunoa le taitaifono o le komiti le afioga ia Agafili Shem Leo, o le taeao o le Aso Lulu 01 Iuni, i le itula e 7 o le a faatino ai le sauniga mo le faamanatuina o le tutoatasi, e pei ona masani ai i tausaga taitasi, e pei o le taunuu ai o lea o le au valaaulia, aemaise o le Ao o le Malo.
A maea loa le malelega a le Ao o le Malo, ona sisi lea o le tagavai o le atunuu, faapea ma le tulai faa’aloalo a Malu o le Malo e pei ona masani ai tausaga ua mavae.
Ona sosoo ai lea ma se faafiafiaga ua saunia e le faili o leoleo, ae faaiu i se taumafataga ma taa’ape ai lea.
Saunoa Agafili, o le polokalame lea i le malae i Tiafau, ae o le a taoto atu lava i afioaga ma itumalo taitasi le faatinoga o latou sauniga ma polokalame mo le faamanatuina o le tutoatasi.
Saunoa le Sui Komesina o Leoleo, Leiataua Afamasaga Samuelu, o le faamoemoe i le malae i Tiafau, e lē faatagaina soo se tasi, ae ua na o le au valaaulia, ae o le a malu foi ma faamalosia puipuiga o le saogalemu e le Matagaluega, e le gata i Apia nei, ae faapena i soo se vaega o le atunuu, o le a mata’itu e ofisa o leoleo soo se vaega ina ia saogalemu ma manuia le faamoemoe o lena aso.
Sa saunoa foi le afioga ia Tanuvasa Petone Mauga, o le Komesina o Tinei Mu, o le po o le Aso Lua 31 o Me i le vaeluaga, e faae’ē ai sailini mo faailoilo mo le agai ai o le atunuu e faamanatu lona tutoatasi.
E faatuaina ai le mamalu o le atunuu ina ia aua nei faapopoleina pe ā faalogoina sailini. Tā’ua e Tanuvasa o le a galulue foi ma le mataalia le aufaigaluega e tali atu soo se taimi e manaomia ai se fesoasoani e le mamalu o le atunuu.
Na toe faapupula e Agafili lana saunoa, o le a lē vaaia le tulaga o le tuuina ifo i lalo o le fua, e pei ona masani ai, ae faatoa tuuina i lalo le tagavai pe ā aulia le Aso 31 o Me 2023.
O le isi itu tāua o le polokalame, o le faaiuga lea o le masina o Setema o le a faatoa faatino ai faafiafiaga ma polokalame ua fuafuaina e le Malo, e fai faatasi ma polokalame o le Teuila – e pei o tuugavaa, o nisi o tauvaga ma isi fuafuaga masani.
Ua tatalo mai foi le komiti i susuga i faafeagaiga ina ia tāina uma logo i le vaeluaga o le po o le Aso Lua.
Sa tuuina mai foi se talosaga mo le pule mamalu a Alii ma Faipule lea ua tatalo mai le komiti o le tutoatasi ina ia latou galulue faatasi.
O tapenaga uma e pei ona tuuina atu i itumalo taitasi e fastino ai lava a latou polokalame, ua saunoa manino le komiti, e lē o iai se seleni o loo faagagaina. E tapena lava e itumalo taitasi a latou polokalame.
(4)
