25 Me 2022, Apia Samoa. O le taeao nei na faailoa ai le anavatau a le sui tauva tutoatasi mo le faigapalota laititi a Gagaifomauga 2 o loo loma nei mo le Aso 3 Iuni 2022.
Na saunoa le tofā ia Falesaopule Vaialia Iosua e faailoa nisi o vaega o lana anavatau pe āfai e to mai le pule a lona itumalo i le faigapalota.
Saunoa Falesaopule, o le tasi ai o le tofa a lona nuu ia te ia, e mafua mai lea i sana tautua sa faia e pei o le faamaite ai o le tele o atinae mo le manuia o le itumalo.
Sa ia talosagaina le suavai ina ia oo uma i aiga o Fatuvalu, faapea foi ma nisi o talosaga ina ia mumū mōli o auala, aua feoaiga ma femagalaiga, aemaise foi o le faamaite lea i le galuega tele poo le maota fou o le nuu i Safune e pei ona iai nei.
O le fale tuai ua 40 tausaga talu ona iai ao lea ua ma’ea fausia le maota fou.
O nisi foi o galuega e aofia ai ma le faamaite lea o auala e atinae ai agavaa faataitai mo tina ma tamaitai le itumalo, “aua o le mea mautinoa, a lelei tina o le lelei foi lea o aiga.”
O ia vaega uma ua manatu Falesaopule ua mafua ai ona a’e se tofa i lona nuu, e filifilia ia e fai ma sui i le faa’alagamaea o lona itumalo, peitai, sa saunoa foi Falesaopule e iai lava nisi o vaega e ao ona ave iai le faamuamua pe afai e manuia le faamoemoe.
O le tulaga o aoaoga, e ao ona iai se potu computer mo le aoga Alofi Taoa, faapea ni computer mo aoga a le itumalo mo nai fanau aoga, faapea foi ni computer mo le faatinoina o le pito laau a faiaoga.
“E moomia foi le sailia lea o auala poo sponsper e faatupe ai le polokalame online platform a le Matagaluega o Aoga, ona o aafiaga o le koviti ua le gafatia ai e matua ona faatupe ia tulaga.
Sa saunoa Falesaopule, o le 25% o fanau i totonu o Samoa, e faaletonu mai vasega maualuluga ma le mafai ai ona faaiuina taumafai i aoga (drop-out rates).
Sa ia taumafai e saili fesoasoani e galulue faatasi ai ma matua, PTA poo komiti a matua, komiti o aoga faapea le Ofisa o Aoga, e saili auala ina ia foia ai le faafitauli ma maua ai avanoa e faa’auau ai pea aoga a le fanau.
I le tulaga o le soifua maloloina, e 81% o Samoa lea ua aafia i faama’i lē pipisi (non communicable diseases), ae 70% ua aafia i tino puta (obesity).
“Ia, e lē mafai ona faatino atinae eseese i totonu o le itumalo pe afai e aafia le soifua maloloina. Ua lava tapena auala ina ia maua ai e le itumalo le soifua maloloina..”
Saunoa Falesaopule, ua toe faamaopopo komiti tumama i totonu o itumalo ina ia malolosi ma tulai mai e taulamua i le faatinoga o le tumama lautele.
Saunoa foi Falesaopule e 16.4% le tupulaga e leai ni galuega e tua iai, “e aofia ai ma si ou itumalo”.
“O lea e tapena ai auala poo atinae (small business activities) faatoaga, togalaau aina, poo aoaoga tau pisinisi (business training) e talosagaina ai le galulue faatasi ma le Samoa Business Hub.
I nisi foi o itu e atinaeina ai le itumalo, sa saunoa ai Falesaopule, e moomia le talosagaina lea o le faaleleia o auala galue o Paia, Lefagaoalii, ma Matāvai.
O ia vaega uma ua faailoa e Falesaopule o le a ave iai lana faamuamua pe afai e manuia mai i le palota.
Saunoa le tofi faaolioli a le itumalo, “O a’u o le tama o le eleele, e nofo i totonu o le itumalo, e tautua foi i le itumalo, ou te malamalama foi i manaoga a lona itumalo, e pei ona faatalanoaina ai le district development plan i le tausaga 2018, aemaise foi, o le Samoa Pathway Development lea ua limataitaia ai nei galuega a le Malo.
“O na vaeaga uma, sa ou filofilo ai lava i le faatalanoaga o nei polokalame uma..”
O Falesaopule ua 43 tausaga o le soifua. Sa galue i le Matagaluega o Aoga, sa galue foi i le Matagaluega o le Soifua Maloloina, atoa ai ma le silia i le 10 tausaga o galue i le Matagaluega o Tina ma Tamaitai, Nuu ma Agafesootai.
O le taimi nei o lo galue o ia i le ofisa o Malo Aufaatasi poo le UNDP.
O le itumalo o Gagaifomauga 2 i Savaii e aofia ai Samauga, Pai’a, Lefagaoalii, Leagiagi, Matavai, Safune, Faletagaloa ma Fatuvalu.
E taitoatasi sui a le FAST ma le HRPP ma le isi sui tutoatasi, e toafa iai i latou o loo tamomoe mo le faamoemoe.
