O le aso na faalauiloa ai le anavatau a le vaega faaupufai a le Faatuatua i Le Atua Samoa ua Tasi – FAST Party.
O le Poloketi Miliona o le a siitia atu i le $2 miliona mo itumalo uma.
O le a tuu faatasi Sui o Nuu ma Sui Tamaitai o Nuu e avea ma se itutino o Fono Faavae, ma o le siitia uma totogi o Sui o Nuu ma Sui Tamaitai mai le 300 i le 400 tala i le 2 vaiaso.
ÌE faapena fo’i ona siitia totogi mo Sui o Fono Faavae mai le $300 i le $400 i le masina. Ae mo le aufaigaluega a le Fono Faavae o le a toe iloilo totogi ina ia o gatasi ma galuega o loo faatino.
Mo le Matagaluega o Tina ma Tamaitai, o le a suia le igoa i le Matagaluega o le Atinae o Aiga, Afioaga ma Aga Fesootai poo le Ministry of Family Affairs and Social Development.
Mo pepe fou ua tuuina mai i le anavatau a le FAST – e maua le $200 pe a maea ona resitalaina le pepa fanau o le pepe fou, ma le $100 tala i le masina se ia aulia le 3 tausaga o le pepe. O lona uiga e $3,800 tala le aofai.
E le totogia fo’i se pili e vaai ai le fomai, poo se tala vai e moomia e tinā maitaga.
E faapena fo’i ona lē totogia se pili e vaai ai le fomai ma free talavai moonia e tagata e iai manaoga faapitoa. O le siitia foi le latou seleni faale masina mai le $100 tala i le $300 tala.
Mo Penisione – o le a $300 i le masina le penisione a ē ua aulia le 65 tausaga ae siitia i le $500 tala le penisione pe a aulia le 75 tausaga.
Mo aoga o le a tapena e le Malo e ala atu i Fono Faavae, mea taumafa talafeagai mo Aoga Amata, Aoga Tulaga Lua ma Kolisi.
O le a fetuunai fo’i le tuuina atu o fesoasoani e totogi ai faiaoga o Aoga a Ekalesia i le toe iloiloina o faigafaavae o le OGG – One Government Grant lea e auala atu ai fesoasoani mo Aoga a Ekalesia.
Mo le aufaisaofaga a le SNPF, o le a siitia i le 75% le aofaiga o tupe e mafai ona loan mai lau saofaga – Entitlement Loan.
Ae o le a faaitiitia le pasene o le tului poo le interest rate ma tuu faatasi nonogatupe ina ia faamama avega ai le totogiina (Long term loan and Entitlement Loan).
Mo Faalapotopotoga Tumaoti o loo gafa ma polokalame fesoasoani mo e puapuaga – e tele faamanuiaga o loo tuuina mai i le anavatau a le FAST.
O le SVSG e miliona. O le ADRA e miliona. O NGO o loo galulue i auaunaga tau soifua maloloina e pei o le Samoa Cancer Society, METI, Samoa Family Health e faasafua iai le miliona.
O faalapotopotoga e pei o le Goshen Trust, o le NOLA, Mapuifagalele ma le Mapuipulotu e faasafua foi iai le miliona.
O nisi NGO Aga Fesootai e le’i lisiina mai ae o loo aofia i NGO Aga Fesootai e pei Aoga Tumaoti mo fanau e iai manaoga faapitoa e pei o le Fia Malamalama, Lotu Taumafai ma le SENESE.
E $300 miliona le tupe faagaganaina mo le toe tuuina mai o se vaalele mo le Samoa Airways ma femalagaiga faa-va-o-malo International Travel.
E $50 miliona e faaleleia ai vaa mo femalagaiga i le va o Upolu ma Savaii faapea Upolu ma Amerika Samoa.
E $100 miliona e faamatuu atu mo faletalimalo tau atiae mo latou anofale.
E $50 miliona mo pisinisi faatoaga e siitia ai oloa faatau atu i fafo.
E $50 miliona mo le atinaeina o pisinisi gaosi oloa e faaititia ai le aumai o oloa mai fafo.
E $50 miliona e tuuina atu i le Faletupe o Atinae e faasoa mo nonogatupe a pisinisi laiti ma atinae fai faatoaga ma faiga faiva.
E $50 miliona e faaleleia ai le auaunaga a le EPC.
E $50 miliona e faaleleia ai le auaunaga a le Suavai le SWA.
E $50 miliona mo poloketi Malosi Faafouina e pei o le Solar ma le Suavai.
E $30 miliona e tuuina atu mo le faaleleia o nofoaga e faia ai taaloga ma pulega tau taaloga.
Mo le totogi pito maualalo o le a $6 tala i le itula i lalo o le FAST, ae o le a siitia le totogi e amata ai ona totogi lafoga. Lea e $15k i le taimi nei. Ae o le a faatoa totogi lau lafoga pe afai e te ausia le totogi faaletausaga e $20,000.
O le a faaititia fo’i lafoga a le au fai pisinisi mai le 27% o loo iai nei, o le a pa’u i le 23%.
O le a faapena fo’i ona faaitiitia lafoga a tagata faigaluega lea o loo 27% (PAYE) i le 23%.
