E 12 matagaluega a le malo o loo galulue so’oso’otauau faatasi mo le poloketi e faaigoaina ai auala ma faanumeraina ai maota ma laoa o le atunuu (street naming project).
Sa taua i se faatalanoaga ma le au faasalalau, o se tasi nei o galuega tele a le malo, ma o le a amataina i le Aso Faraile o le vaiaso nei.
Sa taua e le ofisa sili o pulega o le matagaluega o le Palemia ma le Kapeneta ia Agafili Tomaimano Shem Leo, “Ua mafua ona o le tulaga televave ua iai le atiinaeina o le atunuu.”
O nisi o tulaga na taua ua agai ai le malo e faatino lea taumafaiga, 1) Ia faafaigofie femalagaiga i totonu o le atunuu, 2) Faafaigofie galuega fesoasoani poo galuega lavea’i e pei o fuimu, poo se ambulance, 3) Ia silafia e turisi nofoaga e tutu ai auaunaga, e le gata i le malo ae o pisinisi tumaoti foi, o aoga ma lotu ma isi lava tulaga o le a faafaigofieina aua auaunaga eseese.
O le a amata lenei poloketi i le 2 kilomita i totonu lava o le taulaga, mai le uati agai atu i Vaimoso ma Lepea, ma le agai atu i Leufisa i Moata’a.
Na faailoa e Magele Hoe Viali o le Ofisa Sili o le Matagaluega o Galuega, “E le gata i faalavelave faafuasei, ae o le taimi foi e faaletonu ai le auaunaga (utilities) e pei o le suavai, ma le eletise”.
O loo galulue faatasi i lalo o le Sector o le Matagaluega o Galuega ma Felauaiga.
“O Matagaluega nei e iai le Eletise, SWA, ma le LTA”
O ia atiinae ma auaunaga uma o le a faalagolago i le GPS ma e faalagolago le GPS i le Google Maps, ma na taua e Viali e faigata ona faatino ia tulaga pe a leai igoa o fale ma auala.
Ua maea faatulaga e le malo se division i lalo o PUMA latou te faatino lea taumafaiga, afai e maea le 2 kilomita i le talafatai o Apia, o le a faauau loa i vaega uma o le atunuu.
O le isi vaega taua na saunoa iai Ulu Bismarck Crawley o le Ofisa Sili o le MNRE, “E ao foi ona silafia igoa o auala poo se street poo se avenue. O le isi foi vaega o le a silasila iai o le tulaga o le fanua, pe o se free hold poo se customary status le fanua.”
O le tulaga lava ia tau seleni i le faatinoga o lenei galuega e pei ona taua e Leasiosiofaasisina Oscar Malielegaoi o le Ofisa Sili o Pulega o le Matagaluega o Tupe, “O loo faatino lenei galuega i le tulaga o le faigofie ma taugofie mo le malo (least cost option)”.
“O lea ua tuuina mai aufaigaluega mai matagaluega e 12, e oo i masini komepiuta, o taavale o loo fesoasoani mai ai ia matagaluega mo le taumafaiga e faataugofie le tau e fai ai le poloketi.”
Na taua e Leasiosiofaasisina o loo ua taoto nei i totonu o le tala o le tupe faaopoopo o loo ua i luma o le Palemene i le taimi nei mo le uluai taimi, se vaega tupe tusa ma le $30,000 e fesoasoani e faatino ai nisi galuega o le poloketi.
E le o le taimi mulimuli lenei o le a tuuina ai se vaega tupe i lea poloketi ona o lea ua maea tofia e le malo se division e gafa ma lea foi faamoemoe.
Na faailoa o Samoa o se atunuu atiae i le taimi nei (progressive economy) ma e tatau ona faatino uma galuega e lagolagosua ai i le tamaoaiga.
O le a fesoasoani tele lenei poloketi i le taumafaiga o le Apia Waterfront lea o loo faagasolo i le taimi nei.
O le a fesoasoani foi i le atiinae o turisi, e ala lea i le faasino tonu i turisi auaunaga eseese, e pei o faleaiga, faletalimalo ma isi.
O le tulaga tau faatoaga o lea aoga foi iai lenei poloketi, e ala i le digital economy, e pei o le e-market ma o se tasi o vaega o loo misi mai lea app sa fausiaina o le tuatusi (address).
O lea tulaga o le a faigofie ai ona fesootai le tagata faatau ma le au faifaatoaga e faafaigofie ma sefe ai le taimi alu.
Saunoa Leasiosiofaasisina “O le a unlock ai economic opportunities mo le atunuu, o se galuega lenei ua au tausaga o tapena ma e le o toe mamao ona tatou savavali faatasi lea ma atunuu tetele i lenei galuega taua.”
Matagaluega o loo galulue i le poloketi:
1. Ministry of the Prime Minister and Cabinet
2. Ministry of Finance
3. Ministry of Works, Transport and Infrastructure
4. Ministry of Natural Resources and Environment
5. Office of the Attorney General
6. Ministry of Women, Community and Social Development
7. Ministry of Communications and Information Technology
8. Land Transport Authority
9. Office of the Electoral Commissioner
10. Samoa Bureau of Statistics
11. Samoa Water Authority
12. Electric Power Corporation
