Faagasolo Suesuega a Leoleo i le Maliu o se Alii i le Vili Ma’a i Alafua

August 31, 2026

400

InShot_20260221_171229716 — Acting Police Commissioner, Leiataua Samuelu Afamasaga. Photo: Perolini Nuumia, Gvt Press.

O loo faagasolo suesuega a leoleo i le maliu o se alii na maua lona tino i le nofoaga o loo iai le vili maa i Alafua, i le Aso Toanai o le vaiaso talu ai.

Sa faamaonia mai e le Sui Komesina o Leoleo, Leiataua Samuelu Afamasaga, o le Aso Toanai 22 Aukuso 2026 sa maua atu ai le tino maliu.

Ina ua uluai fesiligia Leiataua, sa ia saunoa mai, “Sa pule i le ola.”

Peitai na faailoa mai e paaga a le Samoa Global News, o lē o mautinoa i le taimi nei le mafuaaga o le maliu, ona e iai itū e masalomia ai e le’i pule lea alii i le ola.

“E leai ni foliga e atagia ai o le mafuaaga lea o le maliu o le taulealea.. E maua atu lea taulealea o loo papa’i lava ona vae i lalo le palapala, ma e lē malosi foi le lālā e gafatia ai ona tauave le mamafa.”

Sa ia tā’ua, e tai tutusa lava le vaaiga sa maitauina fo’i i le mataupu i suesuega o le maliu o se tasi o Ofisa Sili o le Malo lea na tu’uaia e lona to’alua sa pule i le ola, peitai, o le’i ogatasi ma le tulaga o le laau, lea sa masalomia ai loa o se gaioiga faasolitulafono na afua ai le maliu.

Ina ua toe fesiligia le Sui Komesina i le mataupu i Alafua, sa ia faailoa mai o loo ua faagasolo suesuega a leoleo pe sa iai ni gaioiga faasolitulafono.

“O lea ua fai lava le suesuega fa’a homicide ona iloa ai lea pe sa iai se foul play pe leai.”

E lē o matuinoa tausaga o le matua o lē ua maliu, poo se alii talavou o ia.

Ina ua fesiligia le afioga i le Sui Komesina o Leoleo pe fia tausaga o lē ua maliu, ae tali mai lona finagalo, sei oo i se isi aso faailoa mo le silafia o le atunuu lena tulaga.