O le aso Lua o le vaiaso nei na tapunia ma faamuta ai le avanoa mo kamupani ma soo se tasi sa fia talosaga mo le tusiaina o le Ata o le toe fausiaina o le filī maketi i lona nofoaga tuai e pei ona iai muamua. O lea filī maketi, e silia ma le 300 le au faipisinisi laiti sa mafai ona faamautu ai a latou atiinae eseese mo ni tausaga se tele.
Saunoa se tasi o faauluuluga o le Samoa Land Corporation, “E tolu masina sa tatala ai le avanoa mo i latou e fia talosaga ma tuuina mai a latou ata, peitai o lea na faamuta i le aso Lua Aso 10 Mati, ae o le a iloilo foi e le Komiti o Talosaga, ma filifili ai se ata mo le faamoemoe.
O le maketi tuai sa iai, sa faaleagaina i le malaia i le masina o Ianuari, 2016. lea na mafua ai loa ona tapena e le faigamalo talu ai se nofoaga i Sogi mo le fausiaina o le flee maketi, peitai, o se fuafuaga sa toatele nisi sa faaalia ai lo latou lagona faanoanoa, ona o le mamao o lea nofoaga mai le mea o loo faatali ai pasi. E pei ona molimauina e nisi o finagalo o le atunuu o loo faaogaina le nofoaga filī maketi mo latou pisinisi mea taulima, lavalava, faapea le au fai faleaiga.
Peitai o le tulai mai o le faigamalo o le Faatuatua i Le Atua Samoa ua Tasi (FAST) o loo ua iai nei, sa toe faasalalauina mai ai se faaiuga, o le a fausiaina le maketi i lona nofoaga tuai.
O se taimi e le o toe mamao ona faalauiloa lea o le Ata ua filifilia mo le toe fausiaina o le flee maketi.
