Faagasolo Fuafuaga a le Minisita o Faatoaga mo le Faatuina o se Kamupani Gaosi Moa i Samoa

0
3278

Ua faagasolo nei se fuafuaga mo le faatuina o se atiinae gaosi moa i totonu o Samoa, aua le fofoga taumafa o le atunuu. O se saunoaga lea a le Afioga i le Minisita o Faatoaga ma Faigafaiva, Laaulialemalietoa Leauatea Polataivao Fossie Schmidt, i se tulaga o loo iai le vaai mamao a le Matagaluega mo le faaitiitia lea o moa taumafa o loo aumai i atunuu i fafo (imports).

O le tulaga ese lea ua iai Samoa, i le saunoaga a le Minisita, ua silia ma le 70 container moa (40″) e aumai i totonu o Samoa, i le masina e tasi.

O le talitonuga a le Minisita, o lenei fuafuaga o le a faatinoina, o le a fai ma lavea’i mo le tamaoaiga o Samoa.

O le naunautaiga i le Minisita, o le a mafai ona taofia le tele o container moa e la’uina mai atunuu i fafo (import substitution).

E talitonu foi Laauli, o le a mafai ona auina atu foi i fafo nei moa (export) i atunuu tuaoi o le Pasefika. “E mafai lava ona faaogaina ai a tatou vaa e pei o le Lady Naomi ma le Fotu-o-Samoa.”

Na saunoa Laauli e faapea, o le Aso 10 o Iuni o le a taunuu mai ai ni sui o se kamupani fasi moa, e faatalanoa ma suesue atili le auala e faatuina ai se atiinae mo Samoa – e fofoa ai moa, ma seia oo atu lava i le gaosiina mo le fofoga taumafa o le atunuu, faapea foi ma le auina atu i fafo.

Saunoa manino Laauli, “E toasefulu mai Ausetalia, Niu Sila ma Isalaelu, e omai e faatalanoa ma faamautu ma silasila foi i le ituaiga eleele e moomia mo le fausiaina o lea ituaiga atiinae..”

O le fuafuaga lea pea manuia, o le a mafai ai ona tali manaoga i le tatou atunuu, ma o se polokalame e amata mai i le faafofoaina o moa, seia oo atu lava ina maua tamai moa, ona tausi lea. Ma oo atu ai lava i le tulaga e tafasi ai, mo le taumafa poo le avatu i fafo.

Saunoa foi Laauli, ua ma’ea ona ia asia foi le pisinisi faapea o loo faatinoina e Frankie, ma o loo tapena foi auala uma mo le faa’auauina o lea foi ituaiga pisinisi, ina ia aua lava nei motusia, aemaise o le a mafai ona tatou tua iai e aunoa ma so tatou faalagolago i fafo mo le sapalai.

Sa maua le avanoa e fesiligia ai nisi o kamupani oloa siiatoa. O le kamupani a Amau, e 6 i le 7 container moa e aumai i le masina e tasi. E faapena foi le fainumera sa saunoa mai ai se sui a le Ah Liki Supermarket. Saunoa Laauli, “a oo ina lelei ona tapena vaega ia ma manuia, tatou te le toe faalagolago i atunuu i fafo, ae o le a tali lava o tatou manaoga i Samoa nei, ma o le a taugofie foi aua o le a leai se tau o le vaa, le tau totogi foi se tiute ma isi lava mau fees.

O le tau o le pusa moa 33lb i le taimi nei, e i le va o le $62.90 e pei ona iai i nisi o faleoloa, ma le $63.90 i nisi faleoloa.