Faafotu Tupu le Faiaoga a le Toa Samoa

0
912
Pu’e Ata: Marc Membrere.

Tusia: Tusiga Taofiga, Sooupu a le Malo.

E lē itiiti le maualuga o le tulaga ua i ai Samoa i le lalolagi atoa, ona o le fa’aeaea ma le taumafaiga a le susuga i le Fai’āoga Ta’iulu a le Toa Samoa, le Pulega ma le Komiti Fa’atonu.

Ua sila maimoa le lalolagi atoa i le suamalie ma le matagofie o le oso ua teu fa’aaloalo ai nei tamafanau a le atunu’u, ae o lo’o ta’imua ai le galuega fitā ua leva ona tapena fa’afafine to’aga e le Fai’āoga Ta’iulu.

Na molimauina le tali fa’aaloalo a Samoa e tauala atu i le pulega mamalu a ali’i ma faipule o le afio’aga o Fatausi Safotulafai, ina ua o latou to le matū palapala a’o le igagatō e ala i le suafa matai o le afio’aga e igoa o Mauāpule mo le susuga i le Fai’āoga iā Matt Parish.

O se tali fa’aaliali lea a le afio’aga o Fatausi Safotulafai, e fa’afo’i ai le fa’afetai iā Parish ona o lona taimi ma lona malosi sa finauina ai se lelei mo le Toa Samoa.

Ma ua avea ai lea ali’i palagi, o se matai Samoa moni, o le a ia tau’aveina fo’i lona suafa matai i so’o se vaega o lenei lalolagi e malaga ma galue ai.

Na fofogaina e le pāia o le pulega mamalu a ali’i ma faipule o Fatausi, le agaga fa’afetai i le i’uga o taumafaiga a fanau, o se tali fa’aaliali lea, o le galuega lelei sa fai ma ositaugālaga a Mauāpule Matt Parish mo Samoa i nei tausaga e tele.

Na fa’asuafaina fa’atasi le fai’āoga ta’iulu a le Toa Samoa ma se tasi o tamafanau a le afio’aga iā Kelma Tuilagi i lona suafa matai o Oloipola.

Na momoli le fa’afetai fa’apitoa a Mauāpule i le fa’aeaea mauāluga ua tōfā i ai le pāia o le afio’aga o Fatausi, ma o le a fai lea ma ona nu’u moni.

O le malaga ta’amilo lea a le Toa Samoa i Savai’i e momoli le fa’afetai fa’apitoa i le tapuā’iga leoleoa a Salāfai a’o fa’agasolo ai le Ipu o le Lalolagi 2022.

Ua fa’ailoa fo’i e Mauāpule o le a matuā tapena malosi le Toa Samoa mo le isi Ipu o le Lalolagi o loloma mai i le tausaga e 2025.

Ata: Fa’afotu tupu a le fetalaiga iā Mauāpule Matt Parish, o le Fai’āoga Ta’iulu a le Toa Samoa i totonu o le nu’u o Fatausi, Safotulafai i Savai’i.


Tusiga Taofiga