Ua faailoa e le Minisita o Faatoaga ma Faigafaiva, Laaulialemalietoa Leuatea Polataivao Fosi Shmidt, le faamavaega a le Pule Sili o le Matagaluega, le afioga ia Tilafono David Hunter.
O le saunoaga a le Minisita i le Palemene o Samoa i le vaiaso nei sa folasia ai, ua faamavae Tilafono, ona o ni fuafuaga tau le aiga.
I le saunoaga a le Minisita ia Laaulialemalietoa, sa ia momoli aloaia ai lana fa’afetai i le sao o le afioga ia Tilafono i lana tautua i le tele o tausaga mo Samoa.
O le tausaga e 2016 na uluai filifilia ai le afioga Tilafono e taitaia le Matagaluega o Faatoaga ma Faigafaiva.
Sa toe filifilia o ia i le tausaga 2019 e faaauau le tofiga o le Pule Sili o le Matagaluega mo le isi tolu tausaga faaopopo.
O Tilafono David Hunter, ua ia umia tomai faapitoa i mataupu uma tau Faatoaga ma Faigafaiva.
O le afioga ia Tilafono, sa ia galue punoua’i i le tautuaina o Samoa mo ni tausaga se tele. O se tautua e lē leoa ma lē gaoia le tautua a lea tamalii.
Faamanuia tele Le Atua i le Afioga I le Pule Sili ma fuafuaga uma faaleaiga i le lumanai.
- Associate Minister of Police and Prisons Forced To Resign - November 28, 2023
- Winston Peters & David Seymour To Take Turns As NZ Deputy Prime Minister - November 27, 2023
- Samoa Welcomes Home Faith Vui – 2023 New Zealand Women’s Amateur Golf Champion - November 12, 2023
