Lauga fa’afetai a le Afioga le Palemia i totonu o le Fono Aoao Faitulafono a Samoa
O le saunoaga lenei a le Afioga le Palemia e fa’afetaia ai galuega a Sui Mamalu o le Fono Aoao Faitulafono a Samoa, e pei ona fa’ataunuuina i le Maota Fono a le TATTE i Sogi i lenei lua vaiaso, aemaise o le tapua’iga leoleoa a Samoa aoao.
“Lau Afioga le Fofoga Fetalai, fa’apea foi Sui Mamalu o le Maota nei, ua mae’a tatou galuega sa fuafua, mo lenei tauaofiaga a le Palemene, o se tauaofiaga na faia i le tausaga ua te’a, ma toe fa’aauau mai ai i lenei tausaga, o lea la ua tatou taunuu mai i le siui o la tatou tauaofiaga, o le a sa tatou upu e fai, ia o le fa’afetai, na’o le fa’afetai,” o le saunoaga lea a le Afioga le Palemia.
“Fa’afetai i Lau Afioga le Fofoga Fetalai i le fa’afoefoeina o le tatou tauaofiaga, na’o lau Afioga lava o lo o taumafai e fa’afoefoe mai le fonotaga nei, auᾱ e to’atele i matou, o lo o mata’ituina foi e le’o atoatoa lou malosi, tulu’i atu e le Alii le malosi fa’afouina, e fa’aauauina ai ou tiute fa’ata’ita’ifono i le Maota nei.
“E momoli foi le fa’amalo i le tatou Maota, fa’afetai le usufono, tatou fonotaga foi i le tulaga masani, e i ai lava le anava, e lē milia fa’au’u a tatou upu, o le fa’atinoina lea o le tatou tautoga, tautoga i le Atua ina ia fa’atino o tatou tiute i le tulaga silisili, e saunoa ai le Sui e tusa ma ona talitonuga i le amiotonu, e fa’atino ai ona tiute o lona sao i le fa’aleleia atoa o le tatou atunuu, i ona tulaga eseese, e i ai foi taimi e silia’i ai a tatou upu, o aga a ia masani o le Palemene, ae le mafai ona aveesea tu ma aga, e pei ona fa’aupu ai e le to’atele, e tetele lava pesega ae tua a i le ōō.
“O le a fa’ai’u le tatou fono i le asō, ona aga’i foi lea o a’u ma le aigᾱ Kapeneta, fa’apea foi Minisita Lagolago ma le Aufaigaluega a le Malo e fa’atino o outou finagalo, e pei o a outou fautuaga na tu’uina mai, auᾱ le galuega fai mo le manuia au i luma o nai o tatou tagata, na filifilia ai i tatou, tatou te faia mea silisili mo le atunuu aemaise le viiga o le Atua, e tusa ai ma lo tatou tomai, e pei ona foai fua mai e lo tatou Matai mo i tatou.
“E lē mafai foi ona aveesea lo tatou foi talitonuga fa’aletapua’iga, o a outou Afioga totofi e le Atua, ma o lo outou valaauina, tatou te faia galuega lelei mo lo tatou atunuu na totofiina i tatou nei, ia ae galulue pea ia outou, i tulaga fa’akomiti.
“O le fautuaga faifaipea a le Kapeneta ia i latou o Fa’auluuluga o Matagaluega i taimi e mo’omia ai i latou e a outou Afioga o Komiti, e tou te o atu e fai molimau mo le fa’amalamalamaina o mataupu, ia tu’u uma a outou galuega ae saga’i ane ai o le tai, fai la outou tautua, e tatau ona fa’amalamalama galuega o lo o outou faia, o le tou pitolaau lena i totonu o le Maota lenei, o a fo’i ni fautuaga tou te silafia e fa’aleleia ai galuega a le Maota lenei, ‘aua le tuua le mea e tatau ona fai, ‘aua le tuua foi le tu’ualalo.
“Fa’apitoa la’u tautalaga ia i tatou to’atele, Faipule o le Vaega To’atele, o le HRPP, o lo o faia pea a tatou fonotaga faifaipea, ‘aua foi le tuua la outou tu’ualalo, e fa’apena foi ona feiloa’i pea, feiloa’i pea Fa’auluuluga o Matagaluega, fa’apea foi i latou uma, o lo o fa’atalanoaina le fa’agasologa o le fa’atinoga o a tatou galuega, tasi lena auala o lo o fa’agaioi ai le fa’atinoga o galuega i tua i tatou Itumalo, matau mai foi, o lo o malaga pea i tua Afioga i Minisita ma feiloa’i ma Itumalo, i taimi e matauina ai le amatalia pe fa’ai’uina foi lea atina’e ma lea atina’e, auᾱ o le tiute lena a tatou e ao ina o i tua, o e vaai, e lē mafai ona tatou vaaia le atoatoa o mea e ono mo’omia e tatou Itumalo pe a tatou le o i tua, ia ma matau atina’e o lo o fai, o le amataga foi lea o pulega lelei (Good Governance, Transparent), ia malamalama le atunuu i tatou galuega o lo o fai, ma ia fa’amauina ma fa’aalu atu le TV, Leitio ma Nusipepa ma fa’asalalau atu i le ea, nei galuega ua fa’ai’uina ma le manuia.
“E le tuua foi le galuega a le Kapeneta o le fa’asilasila, fa’alauiloa i le tatou atunuu, mea o lo o fa’aalu ai tupe a le tatou atunuu, o le a mata’itu i le fa’agasologa o tatou galuega, e tᾱua tele le fonotaga lenei, sa tatou lauliliuina ai le tala fa’atatau fa’aopoopo o le tupe, e le gata i na, a’o tulafono tetele, auᾱ e tele tulafono nei ua pasia i totonu o le Maota i le fonotaga lenei.
“O le feau tᾱua a o le tala fa’aopoopo o le tupe lenei, e toe fa’amanatu ai pea, o le tala fa’aopoopo ua na’o se tala fa’aopoopo e fa’amae’a ai galuega e tatau ona fa’amae’a, e toe ioeina ai nisi seleni e tatau a ona ioeina e le Palemene, ina ia fa’atino ai ma fa’amae’a ai tatou Polokalame, mo lenei tausaga fa’aletupe mai lena tausaga seia fa’amae’a mai ia Iuni o le tausaga nei 2019, ia ona mae’a ai lea o lenei tausaga fa’aletupe o lo o fa’agasolo pea.
“A’o le tele o galuega ua uma lava ona fa’ata’oto mai i le tala autu, o mea ia e tatau foi ona fa’amalamalama, ma le tuua ai le fa’ailo pea, e le’o taofia a tatou galuega o lo o fa’agasolo pea, ua tatou fa’alogologo i le CNN, e o’o a i le Malo tele o Amerika, taofi galuega, close le Malo, aisea?, auᾱ e o’o foi i le Malo tele o Amerika e oa, o le atunuu aupito i mauoloa lea o le lalolagi, ae fa’agasolo a latou galuega e fuafua i le tala fa’atatau autu o le tupe, a alualu a ua leai se seleni e o’o a i le Malo, ua tatou ona taofi galuega, lea tatou te vaai atu e le’o se taimi muamua lenei ua tupu ai, na tupu foi i i si nofoaiga muamua, a’o se tala lelei foi lea tatou te tilotilo i ai, auᾱ o mea e fai e Malo tetele, o lea foi e fa’atino e le tatou Malo.
“O le fa’atᾱua la o le tala o le tupe o lenei tausaga, o lea e fa’amatalatala ma fa’amanatu mai ai pea, ma fa’amalamalama atili ai pea, leai se mea e soona popole vale ai, tatou fa’alogo so’o a i upu felafoa’i solo e tagata lē malamalama, o lea ua tatou aitalafu, o lea ua tatou o e aumai i si aitalafu e totogi ai i si aitalafu, a’o lea a ua fa’amalamalama ma saga fa’amalamalamaina pea, ina ua uma ona totogi a tatou aitalafu, ina ua uma ona fa’ata’atia ese le seleni e fa’agaioi ai le Malo, ona ova ai le o le 154 miliona, lea la ua fa’aaoga e le Malo mo atina’e, aisea? leaga o atina’e nei lau Afioga le Fofoga Fetalai e tupu ai le mafai i le Malo tagofia fa’afitauli tau le atina’e.
“O le fesili o a fa’afitauli ia?”
“Lau Afioga le Fofoga Fetalai mai le taimi na amata ai le nofoaiga lenei, e le to’atele i latou na fananau mai, ae uma ane le nofoa’iga lenei ua ta’ilima tausaga o isi fanau, auᾱ e fananau pea, fananau pea le atunuu.
“Le a le uiga o lea tulaga, e mo’omia faleaoga, e fa’aao’oga ai fanau, e mo’omia falema’i i auaunaga ia si’itia, mo i latou e fananau pea, e pei a ona ou fa’amanatu atu, ua fia afe ta’ilima tausaga, na tatou tauto i lea aso e le’i fananau mai, e tupu pea, tupu pea, tupu pea, ia le mana’o ua tatou ona fa’atino e tatou, ae ua leai se i si e toe ai silia.
“O lea ua totofi mai i tatou i totonu o le Palemene lenei, ia tatou omai e fai le tatou galuega, ina ia fōfo ai le fa’afitauli lea e tula’i mai pea, tula’i mai pea.
“E pei ona ou tᾱua atu i le tele o fa’asilasilaga lē malamalama, ma tagata e fa’atupu vevesi, e 154 miliona le seleni lea e faigaioi ai le Malo i atina’e fou pei o polokalame ma atina’e fa’aauau, fesoasoani mai ai ma Malo mai fafo, ae 154 miliona le tatou sao, ua ova atu i luga i aitalafu a le atunuu, lea a la e lava a le fa’asoa, ma e le’o tuua foi lau Afioga le Fofoga Fetalai, le saili seleni, saili seleni, saili seleni pea auᾱ e tele a mea fa’afuase’i e oso mai, lea na fa’asalalau atu e le Malo, la ua taofi mai e Niu Sila i le faiga fou ia fanau a le atunuu, ua a’afia ai le luasefulu o tatou fanau ua maua sikolasipi, le a le mea na fai e le Malo, mo’omia le 600 afe, silia ma le afa miliona, na fa’atino a i le i’uga a le Kapeneta, o mea na e fai e Kapeneta e mataala a i taimi uma i mea e tatau ona fai.
“Lau Afioga le Fofoga Fetalai, o le vaega telē a na o le fonotaga lenei ma le tᾱua, o le vaega lona lua, o le sao lena o le nofoa’iga lenei, sao ogaoga i le fa’atulagaina lea o le fa’atinoina o tuaoi nei fa’apalota o Itumalo, ina ia fōfo ai le fa’afitauli lenei, i le tupu pea, tupu pea, o tagata palota i totonu o Itumalo, ae le’o paleni le tulaga o lo o fa’atino ai, o i si Itumalo ua to’atele tagata, ae tatau ona atagia Sui e tatau ona tula’i mai totonu o le Palemene.
“Le a le fōfo lea sa fai, ia na’o le pau a lea o le fōfo, fa’alua sui, ona aga’i atu ai lea i isi mau mea sēse, le paleni, o le te’i a ua ave le i si sui le i si Itumalo, ma fa’alua ma palota a na Itumalo, a’o le a le mea ua lua ai?, ae ta’itasi i si Itumalo, i le itu tau palota, le a le mea ua lua ai Sui ae tasi i si Itumalo, tasi le tagata tasi le palota, ma toe fa’atulaga le tuaoi.
“A’o le toe fa’atulagana la o Itumalo, e le’o se taimi muamua lenei ua faia ai, na amata mai i le fa’atulagana o tuaoi o Safata, o Fa’asaleleaga Numera Muamua, o Salega, ma palota a i latou tututa’ito’atasi ia ma le Itumalo to’atele a Falealili lea na amata muamua ai iina.
“O lea la ua tatou o’o mai i le fa’aiuga o teuteuga ma suiga, i le tulaga o tatou faigapalota, i le 28 tausaga o fa’agasolo pea e le HRPP, o le la’asaga fa’ai’u lea, na amata mai i le tatala atu i tua o le palota i le tausaga 1991, ina ia palota loa faifeau ma o latou faletua, tinᾱ, taulele’a, mea ia sa le mafai ona fa’atinoina e tatou i le tausaga e 1962, ae tu’u mai a e tatou tuaᾱ a o’o loa i le taimi ua talafeagai suiga, ona fa’atino loa lea e tatou, na fa’atino e tatou tuaᾱ, tamᾱ o le fa’avae i le teuteuga i lena foi taimi, ae lafo mai i ‘ai latou e mulimuli mai e fa’atinoina i le taimi e tatau ai mo teuteuga ua talafeagai.
“Tatou te le faia ni mea e afaina ai o tatou Itumalo, a’o le tofia o i tatou lau Afioga le Fofoga Fetalai, o le tofia lea tatou te omai e galulue, e le fa’apea na ona tatou omai ma fa’alue ai i nofoa nei, toe tasi le matᾱti’a maoa’e lea e le’i te’a nei, auᾱ o lea ua te’a atu le matᾱti’a lea, o lo outou sao lena i le atunuu, e ta’u ai mea na fai e le nofoa’iga lenei, ae e i ai le sao lea e mulimuli mai lea na tᾱua nei, o le tatou liliu ane e fōfo le i si fa’afitauli tele, lea e fa’afeagai ma i tatou ma o tatou aiga, measina a o tatou aiga, e le gata o eleele a’o i tatou ma le fa’amasinoga, fa’amasinoga o suafa o aiga, i le fa’afitauli lea e feagai nei ma nai o tatou aiga.
“O ai lea e tua i ai nai o tatou aiga?
“E leai nisi e tua i ai, ua faulala’i le mau fa’aiuga e le’i faia, o ai la e faia mea ia?, o ai e fofoina?, e leai nisi e mafai ona fofoina, e na’o le pau a le malosi e mafai ona fofoina mataupu ma’aleale fa’apenei, o totonu le Palemene lenei, ae a tatou nofonofo ai a ma tatou nofonofo ai a, Lau Afioga le Fofoga Fetalai e matuᾱ afaina measina a Samoa.
“E mo’omia e le Fa’amasinoga se fesoasoani, matuᾱ mo’omia a e le Fa’amasinoga se fesoasoani, fea e sau ai le fesoasoani lena, e sau mai totonu o le Maota lenei, o le ala lena ou te fa’amᾱlo atu ai le Komiti, le Komiti sa latou lauliliuina fa’afitauli nei, na latou aumaia ai ni fautuaga tᾱua tele, ua uma ona fai e latou le galuega, o le valaau o Samoa atoa, e omai i totonu e fai se latou molimau, o le a le tatou sao e fesoasoani ai i le fa’afitauli lea e tula’i mai i le Matagaluega o Fa’amasinoga i le Vaega o Fanua ma Suafa.
“Ua ova i le 300 le mau mataupu apili, ua fia sefulu tausaga o ta’atitia e le faia i ai ni galuega, ae fa’atali ai i si fa’aiuga fai, e le gata la o suafa a’o fanua, a’o fe’ese’esea’iga i tuaoi, o le tuaoi o Ātua na fai i le 1989, 30 tausaga talu ona fai le i’uga a’o lea fa’atoa amata ona fua i le taimi nei tuaoi o Ātua, i le tulaga o le tuai ona fa’atino le i’uga, e pei ona tatou fa’alogo pea, fa’alogo pea i le mau fa’aloia ma le mau fa’a-le-fa’amasinoga, O le a lena mau? Justice Delay is Justice Deny, O le tuai ona fa’atino le fa’amasinoga ole amiotonu, o le atili fa’aauau pea na o le lē amiotonu, i le faiaga, tuᾱ mo’omia ai lava e le Fa’amasinoga se fesoasoani.
“Lea la na fai ai e le Palemene lenei le Komiti Fa’apitoa, auaua’i mai le atunuu, e fai a latou mau, ona aumai lea o le lipoti lena i totonu o le Palemene lenei ma talia e le Palemene lenei, ona toe tu’u atu foi lea i tua e tapena se tulafono e tu’u ai i totonu mea ia, auᾱ e le mafai ona alu loa e leai se tulafono e tu’u ai totonu mea ia, lea la ua toe tu’uina mai totonu lea tulafono lea, na afua mai i le tofᾱ mamao a outou o Ta’ita’i o Samoa na filifilia, lea foi ua uma ona fa’ailoa ai outou finagalo, ma toe tu’uina atu ai i tua i aga fa’apalemene, e toe valaau foi le atunuu e toe omai, e le uma le ta’ita’iga i Pulega ma Faigamalo lelei a le Vaega Fa’aupufai lenei (HRPP), auᾱ o le Faigamalo lelei e fai ma tapᾱ se finagalo o le atunuu i mataupu ogaoga nei mo le manuia lautele o Samoa aoao, lea la ua toe tu’uina atu i le Komiti e toe galulue ai, ona toe foi mai foi lea i le Palemene ma pasia loa lea, i la’u matau i le nofoa’iga lenei, o sao ogaoga nei ua o tatou faia, o le ave o le fesoasoani i le Fa’amasinoga ina ua mo’omia le fesoasoani atu, auᾱ na’o tatou a le Palemene e mafai ona ave le fesoasoani lenei, e mafai ai ona fa’atinoina i se tulaga maopoopo, malosi ma le mautu i le fa’atinoga o a latou fa’aiuga, ma le vaega lua lea ua mae’a ona tou fa’ata’otoina, o le la’asaga mulimuli lenei o le fa’agasologa o le fa’atinoga o tatou faigapalota, e pei ona fa’aalia ai outou finagalo i le po anapo, ia ma fa’aalia loa i totonu o le toe teuteuina o le fa’avae lenei, ina ia atagia ai suiga tetele nei, lea e tasi a le vaega e aga’i i ai, ia manuia le atunuu, ia uma atu tatou a’o lea ua mae’a fa’ata’oto faiga fa’avae e lima ta’ita’iina ai le atunuu i le filemu a Samoa i le aga’i atu i le lumana’i.
“O tatou tiute na na tofia ai tatou, le ala lena e le uma ai le agaga fa’afetai, ia outou Afioga i le onosaia pea o le umi se’i soalaupuleina ia mataupu ogaoga nei, o mataupu e totogo ane i totonu o tatou felafolafoa’iga e mafua mai i le tofᾱ mamao ma le fa’autautaga o’oo’o, ua tatala mai, e na’o na pau a lea o le fonousu a Samoa, e omai ai sui filifilia o Itumalo, outou o lo o tauavea to’oto’o au o o outou Itumalo, o lea ua fa’ae’e i o outou aao, mamalu ma paia o outou Itumalo Fa’apalota.
“Lau Afioga le Fofoga Fetalai, o le fa’afetai lea, o le talosaga i le Atua manatu, ia saga fomai mai pea i le Maota lenei i Sui Filifili o Itumalo ta’itasi le tofᾱ mamao ma le fa’autautaga o’oo’o ma le soifua fa’afouina auᾱ le fa’atinoina o o tatou tiute, e le’o toe umi foi lea ua tatou o’o mai i le afa o le nofoa’iga o lenei foi nofoa’iga, ia saga’i ane ai o le tai ma ia fa’aosofia moe aluaga, ia maua le loto fa’amagalo, ia maua le tofᾱ mamao, auᾱ le fa’atinoina o o tatou tiute na o tatou tauto ai i luma o lo tatou Atua.
“Lau Afioga le Fofoga Fetalai ia manuia foi le tapua’iga a Samoa aoao, amata mai lau Afioga le Ao o le Malo o Samoa, fa’apea foi le Sui Tofia, ia fa’apea foi Tama ma a latou Aiga, o Aiga ma Tama, Tumua ma Pule, Ituau ma le Alataua, Aiga i le Tai ma le Va’a o Fonoti, aea le fa’amalumaluga a le mamalu o Fa’afeagaiga taulagi o lo o nōno manū auᾱ Samoa ma lona manuia auiluma, aemaise foi o Samoa o lo o tapua’i mai.
“Fa’ata’i lea o se matou leo, fa’aifo mai lagi se manū mo le Maota lenei, Soifua ma ia Manuia.”
